Hazrat Aamir Bin Abdullah Al Tamimi (رحمہ اللہ تعالی)

8 Aath Ashkhaas (Jinhen Zuhd-o-taqwa mein urooj haasil hua.  In mein se pehle number par Hazrat Aamir Bin Abdullah Al Tamimi (رحمہ اللہ تعالی) hain. (Alqamah Bin Marsad)

★ Hijrat ke chaudah (14) baras beet gaye.  Ameer ul Momineen Farooq-e-Aazam Hazrat Umar Bin Khattab (رضي الله عنه) ke hukum ke mutabiq M’ammaar-o-Karigar Sahaba Kiraam aur Tabi’een Izaam ne Sarzameen-e-Iraaq mein aik naye sheher Basrah ko abaad kiya.  Unke azaim yeh thay ke is naye sheher ko fauji chhawni ke taur par istawaar kiya jaye.  Taake yahan se Lashkar-e-Islaam Iraan ko apne zer-e-asar laane  ke liye fauji kaarwayi ko ba aasani tarteeb de sake.  Aur isi tarah unke azaim mein yeh bhi baat thi ke yeh naya sheher Dawat-o-Irshaad ka markaz bhi ho aur Roye zameen par Allah ke nizaam ko naafiz karne  ke liye meenaarah noor bhi saabit ho.  Fauji ahmiyat ka ye naya sheher jab tayyar ho gaya to Jazeera-e-Arab ki har jaanib se musalman Joq dar Joq yahan aa kar aabad hone lage.  Isi tarah Najad, Hijaaz aur Yaman se bohat se mujahideen ke qaafiley Kushaan Kushaan Basrah chhawni pohanchne shuru huye aur wahan aa kar unhon ne dery jama liye. In aane wale qafilon mein Wadi-e-Najad ke aik maaroof Khandan Banu Tameem ka aik Chashm-o-chiraagh Aamir Bin Abdullah Al Tamimi bhi nihaan khana dil mein jazba-e-jihaad liye huye yahan pahuncha.

★ Aamir Bin Abdullah in dinon nek dil, Saleem ul fitrat, Pakeezah Zahn, khoobaru, kadiyal jawan tha. Basrah apni nou Abaadi ke bawajood maal-o-daulat ke Aitebaar se doosre shehron ki nisbat Imtiyaaz haasil kar chuka tha. Kyun keh musalsal fatoohaat ki binaa par yahan maal-e-Ghaneemat ke Ambaar lag rahe the. Aur khaalis Soney ke zakhaair jama ho rahe thay lekin is Tamimi Naujawan Aamir Bin Abdullah ko in mein se  kisi cheez ki khuwahish na thi. Wo logon se  beniyaz aur Allah ki Mohabbat mein waraftah, duniya aur iski raanaiyyon se  kabeedah khatir aur Allah ki raza ka talabgaar tha.

In dinon pur raunaq sheher Basrah ke Governor, Lashkar-e-Islaam ke Jarneel, bashindagan-e-Basrah ke murbabbi-o-murshad Jaleelul qadr Sahabi Hazrat Abu Moosa Ashari thay. Aamir Bin Abdullah Sulah ho ya Jang, Safar ho ya hazar, bahar soorat Hazrat Abu Moosa Ashari (رضي الله عنه) ke saath saath rehte. Unse  Quran Majeed ka Ilm-e-Noraani haasil kiya aur phir use  doosre logon ke samne  Min-o-‘Aan bayan kiya.

Jab Is Naujawan ne  Noraani uloom ke Jawahiraat se apni jholi bhar li. To apnay qeemti Auqaat ko 3 teen hisson mein taqseem kar liya. Aik hissah taleem ke liye waqf kar diya aur is hisse ko Basrah ki masjid mein logon ko Quran Majeed ki taleem dene ke liye waqf kar diya. Doosra hissah Ibaadat ke liye waqf kar diya. Aur is hisse  mein duniya-o-mafeeha se  be niyaaz ho kar Allah ki Ibaadat mein itni der khade rehte ke paon thak jaate. Teesra hissah Jihad ke liye waqf kar diya aur is mein Aslaha se lais ho kar aik tajurba kaar mujaahid ke roop mein maidaan Jihad mein Kaar’haaye numaayan sar anjaam dete. Inke ilawah unhon ne zindagi bhar koi chautha mashghalah ikhtiyar nahi kiya. Wo apne daur mein Basrah ke Aabid-o-Zaahid mashhoor thay.

Basrah ka baasi bayan karta hai keh main aik dafa safar mein is qaafiley mein shaamil hua jis mein Hazrat Aamir Bin Abdullah (رحمہ اللہ) safar kar rahe thay. Raat hui to hamare qaafiley ne jangal hi mein ghaney darakhton ke aik Jhund ke qareeb padao kiya. Hazrat Aamir (رحمہ اللہ) ne  apna saman ikattha kiya aur  apna ghoda darakht ke sath baandha. Zameen se  ghaas ikatthi kar ke iske saamne  phenk di taake use kha kar sair ho jaye. Aur khud darakhton ke jhund mein daakhil ho gaye. Mein bhi ye Azam le kar dabe paon uske peeche ho liya ke aaj main zarur ye nazara karunga ke Aamir Bin Abdullah raat ki tareeki aur darakhton ke khaufnaak jamghate mein kya karte hain. Wo darakhton ke darmiyaan door tak gay yahan tak ke wo aik aisi jagah par ja kar khade huye jahan kisi ki nazar na pade phir unhon ne Namaz padhna shuru kar di. Namaz aisi waraftagi mein padh rahe thay ke kya kehne! maine  aisi umdah, mukammal aur Khushoo’ se  bharpoor Namaz is se pehle kisi ko padhte nahi dekha tha. Namaz se  faarigh ho kar unhon ne  apne  Rab se  Sargoshiyan shuru kar di. Dildoz awaz mein farmane  lage:

Ilahi! Tune  apne  hukm se  mujhe paida kiya. Aur apni marzi se  mujhe is duniya ki Aazmaishon mein mubtala kiya, phir tu khud hi mujh se  farmata hai ke sambhal kar chal.

Ilahi! Tu janta hai ke agar mujhe saari duniya de di jaye aur phir koi mujh se teri raza ki khatir iska mutalba kar de to main teri raza ko tarjeeh dun aur saari duniya mutalbah karne waale ko de dun. Aur mujhe zarrah barabar bhi koi muzaiqa na ho. Aye Rehem karne wale mujhe Sukoon-e-Qalb ata kar.

Ilahi! Maine tujh se aisi mohabbat ki hai Jis se duniya ki har musibat jheelni mere liye asaan ho gayi hai. Aur tere har faisle ko ba’raza-o-Raghbat tasleem karne ka hausla mila hai.

Teri sachhi muhabbat ke hote huye mujhe din raat aane wale Nasheb-o-Faraz ki koi parwah nahi.

Basrah ka rehne  wala wo Shakhs bayan karta hai ke phir mujhe neend aagayi lekin neend gehri na thi mein poori raat neend aur bedaari ki kashmakash mein mubtala raha. Kabhi aankh lag jati aur kabhi khul jati. Lekin Hazrat Aamir poori raat Namaz aur manajaat mein masroof rahe yahan tak ke Subah Saadiq namoodaar hui. To unhon ne namaz-e-Fajr ada ki. Aur iske baad ye Dua ki.

Ilahi! Subah ho chuki hai. Aur tera Fazal talash karne ke liye logon ki chehel pehel shuru ho chuki hai, har shakhs ki koi na koi zarurat hai. Aur meri zarurat ye hai ke tu mujhe bakhsh de.

Ilahi! Karam farma. Meri aur in sab logon ki hajaat ko poora karde. Bila Shuba tu sab se  badh kar Karam farmaane  wala hai.

Ilahi! Maine  tujh se  teen (3) cheezen maangi thin. Tune  mujhe do (2) ata kar di. Aur aik abhi tak ata nahi ki. Ilahi! Wo teesri cheez bhi ata kar de taake main apni mansha ke mutabiq ji bhar kar teri Ibaadat kar sakun. Phir wo apni jagah se uthay, peeche mude to to unki nazar mujh par padi to ghabra gaye. Bade hi afsardah lehje mein mujh se kaha. Mery Basri bhai kya tu saari raat yahan mujhe dekhta raha hai? Mein ne  kaha: Ji Haan!

Farmaane lage: Khudara jo tune dekha kisi ko na batana, isko apne dil mein hi chupaye rakhna, Allah tumhari hifazat farmaye.

Maine kaha mujhe wo teen 3 cheezen batao jo tum ne Allah se maangi thin, do tumhen dy di gayi hain aur aik abhi tak nahi mili. Agar tum nahi bataoge to main bhi ye raaz faash kar dunga. Aur logon se aaj raat ka poora waqia bayan kar dunga.

Farmaya: Teri meherbaani aaj ka ye waaqiya kisi ko na batana.

Maine kaha: Meri wahi shart hai. Jab usne mery rawaiyya ko dekha to farmaya mujhe Allah ko gawah kar ke waada do keh tum meri is kaifiyat ko logon ke samne  bayaan nahi karoge. Maine arz ki ke main waada karta hun ke teri zindagi mein ye waaqiya main kisi ko nahi bataunga.

To wo farmaaney lage: Ke mujhe sab se zyada deen ko tabah karne ka khatra Auraton se tha. Maine  apne  Rab se  Iltija ki keh mere dil se  Auraton ki mohabbat nikaal de, Allah ne meri dua qubool kar li.

Ab meri ye halat hai ke Aurat aur deewaar ko dekhna mere liye barabar hai.

Meine kaha ye to aik cheez hui, Doosri kya hai?

Farmaaney lage: Maine  apne Rab se doosri iltaja ye ki ke main uske siwa kisi se na darun. Allah ne meri ye dua bhi qubool kar li. Ab Arz-o-Samaa mein se Allah ke siwa kisi se nahi darta.

Farmaaney lage: maine Allah se iltaja ki ke meri neend khatam ho jaye aur main raat din Allah ki Ibaadat mein guzaar sakun. Lekin meri ye dua qubool nahi hui.

Jab mein ne ye baaten suni to unse kaha: Huzoor apne  aap pe rehem kijiye, tum raat bhar Ibaadat mein masroof rehte ho. Aur din bhar rozey ki halat mein rehte ho. Jannat to is se kam amal pe bhi In Sha Allah tumhe inayat kar di jayegi aur Jahannum se bachao ke liye apne apko halkaan na kijiye. Allah ki Rehmat apky shaamil-e-haal hai.

Farmaaney lage: mujhe dar lagta hai ke kahin Qayamat ke din mujhe Sharamsaar na hona pade jabke us waqt Sharamsaari koi faida na degi. Ba Khuda main Ibaadat mein apni tamam tar tawanaiyyan sarf kr dena chahta hun.

Agar nijaat mil gayi to ye Allah ki rehmat hai. Agar pakda gaya to ye meri kotaahi hogi.

★ Aamir Bin Abdullah raat bhar Musally par khade ho kar Ibaadat karne  waale hi na thay balke wo din bhar ghodey ki peeth par sawar ho kar maidaan mein kaar’haaye numayan sar anjaam dene wale aik Jafakash Mujaahid bhi thay.

Jab bhi kisi ne Jihaad ke liye pukara sab se pehle Chaaq-o-Chauband yahi maidaan mein utre. Jab bhi kisi muarke mein hissa lene ke liye Mujahideen mein shaamil hote to apna aik qaafila tashkeel dete. Aur Jihad ke safar par rawana hone se pehle apne qaafiley ke Ahbaab se  mukhaatib ho kar kehte ke meri aapse teen(3) mutalbey hain. Wo poochte kaunse?

★★ Aap farmaate:

1: Aik mutaalba to ye hai ke main aapka Khaadim ban kar Shareek-e-Safar rahunga. Aur aap mein se kisi ko koi aiteraaz na hoga.

2: Doosra mutaalba ye hai ke jab bhi Namaz ka waqt hoga to Azaan main dunga. Aur aap mein se  koi bhi mera ye haqq chheenney ki koshish nahi karega.

3: Aur teesra mutaalba ye hai ke main apni haisiyat ke mutabiq aap par apni girah se  kharch karunga. Aur kisi ko koi aiteraaz nahi hoga.

Agar qafiley ke ahbaab ye teenon mutalbey Baraza-o-Raghbat qabool kar lete to inke sath rehte, Warna doosre qaafiley ki jaanib rukh karte. Aur us qaafiley ke sath mil kar safar karte jo inke mutalby bila choon charaan maan leta.

Hazrat Aamir Bin Abdullah (رحمہ اللہ) un Mujaahidon mein se thay jo Khatarnak mawaaqy’ par jawan mardi se aage badhte hain. Aur tama’a aur lalach ke waqt daaman samait kar kinaarah kashii ikhteyaar kar lete hain. Ghumasaan ki ladai mein mardana waar is tarah bey khauf-o-Khatar aage badhte jiski misaal Jangi tareekh mein nahi milti aur ghaneemat ka maal samait’te waqt yun kinaarah kashi ikhteyaar karte jaise koi ghair marghoob cheez ko dekh kar munh pher leta hai.

★ Faateh Iran Hazrat Saad Bin Abi Waqas (رضي الله عنه) Jang-e-Qudsiyah se  faarigh ho kar Iran ke Shahi mehal mein farokash huye, Umar Bin muqrin ko hukm diya ke maal-e-ghaneemat ikattha karen aur iski ginti Karen. Taake ghaneemat ka paanchwan(1/5) hissah Daar Ul Saltanat Madinah Munawarrah ko Baitul maal ke liye rawanah kar diya jaye. Aur baaqi ghaneemat ka maal Mujahideen mein taqseem kar dein. Aisa umdah maal, qeemti ashyaa ke unke saamne  dher lage huye thay ke kya kehne! Umdah sheeshey ki naqsh-o-nigaar wali deedah zaib tokriyon mein sone chaandi ke wo bartan nihayat saleeqe se rakhe huye thay jin mein Irani Baadshah khana khaya karte thay.

Wahan Saagwaan ki lakdi ke bane huye nihaayat umdah aur dilkash sandooqon mein Irani Hukmaranon ke libaas aur heery moti jadi hui ashyaa dekhne walon ki ankhon ko khairah kar rahi thin, wahan umdah, deedah zaib aur dilfareb Zevraat dabbon mein saleeqe se rakhe huye thay. Wahan Irani Baadshahon ki niyamon mein band talwarein aik naya rang jamaye huye thin. Aur wahan un Baadshahon aur generalu ki talwarein bhi padi huin thin jo mukhtalif adwaar mein Irani Hukamranon ke aage sar nagoon huye.

Kaarkun tamam Hazireen ke saamne Maal-e-Ghaneemat ki ginti kar rahe thay ke kya dekhte hain ke aik Paraagandah haal, Gobaar aalood shakhs aik bhaari matka uthaaye qalandaarana andaz mein chala aa raha hai. Hazireen ne apni zindagi mein us jaisa bartan nahi dekha tha. Maal-e-Ghaneemat ki jo cheezen unke samne  padi huin thin. Wo is matkey ke muqabiley mein heech nazar aane  lagin. Us bartan mein jab jhanka to wo heere jawahraat ka bhara hua tha.

Hazireen ne us shakhs se poocha:

‘Ye Qeemti khazana kahan se hath laga hai?’

Usne kaha ye ma’arka ke dauraan Ghaneemat ke taur par mere haath aaya hai.

Unhone poocha: Kya is mein se koi cheez tum ne alag ki hai?

Usne kaha Allah tumhen hidayat dy, ye kaise ho sakta hai? Allah ki qasam heere jawahraat se  ata hua ye bartan aur Iran ke Baadshahon ki milkiyat mein saari daulat mere nazdeek aik kate huye nakhun ke barabar bhi nahi hai.

Agar ye musalmanon ke Baitul maal ka haq na hota to mein kabhi bhi ye utha kar tumhare paas na lata. Unhnon ne kaha: Allah apko Izzat de aap kaun hain?

Usne kaha: Allah ki qasam main apne baare mein tumhen kuch nahi bataunga aur na kisi ghair ko mubaada ke tum meri tareef karne lago.

Main to Allah ka shukar ada karta hun. Aur iski baargah se sawab ki ummeed rakhta hun. Ye kaha aur wahan se chala gaya.

Woh ye manzar dekh kar shashdar reh gay. Unhone uske peeche ek aadmi bheja taake woh ye khabar laye ke ye kaun hai?

Woh shakhs uske peeche chalta gaya. Yahan tak ke wo apne Mujaahid saathiyon se ja mila. Unse jakar poocha ke ye Sahib kaun hain? Unhony  kaha: Kya tumhen maloom nahi! ye Basrah ke Zahid Aamir Bin Abdullah Tamimi hain.

★ Hazrat Aamir Bin Abdullah in Ausaf-e-Hameeda ke bawajood logon ki jaanib se paida kardah mushkilaat se aur masaaib se bach na saky. Unhen bilkul un logon ki tarah takaleef aur pareshaniyan jheelna padeen jo log haqq ka barmla izhaar karte hain aur buraiyyon ko Bazor-e-Baazu khatam karne ki koshish karte hain.

Aik dafa ye waqiah paish aaya ke Hazrat Aamir Bin Abdullah ne dekha keh Basrah ki police ke sarbraah ka mulazim aik ghair Muslim Zimmi ko gardan se pakde huye liye ja raha hai. Aur woh becharah logon se dard mandanah andaaz mein fariyad kar raha hai.

Logon! Mujhe bachaao!

Musalmanon! Apne  Nabi ﷺ ke Muahide ki hifazat karo.

Ye sun kar Hazrat Aamir age badhe, Zimmi se poocha kya tum ne  tax ada kar diyal? Usne  kaha: Haan.

Phir aap uski taraf mutawajjah huye jisne us bechaare ki gardan daboch rakhi thi.

Garajdaar awaz se kaha: Tumne ise kyun pakda hai?

Usne kaha ke main ise Sahib bahadur ke bagheechah ki safayi karane ke liye le ja raha hun. Hazrat Aamir ne Zimmi se poocha kya tum bakhushi ye kaam karne  ke liye tayyar ho?

Usne kaha: bilkul nahi. Main agar Bagheechah saaf karne mein lag gaya to main apne  bachhon ke liye kaise kamaunga?

Allah ke liye meri madad karo, mujhe is musibat se chhudao. Allah apka bhala karega. Hazrat Aamir ne  pakadne wale se kaha ke ise chhod do.

Usne kaha main nahi chhodunga.

Hazrat Aamir ne Zimmi pe apni chaadar phenk kar aik hi jhatke mein use chuda liya aur phir farmaya: Allah ki qasam! meri zindagi mein Hazrat Muhammad ﷺ  ke Muaahide ko nahi toda ja sakta aur is tootakaar mein jo log wahan jama ho chuke thay un sab ne Hazrat Aamir Bin Abdullah ki tarafdari ki.

Police Mulazimeen ne Hazrat Aamir Bin Abdullah par Sahib-e-Amar ki Ata’at tark karne ka ilzaam aa’yed kar diya. Ilawah azeen un par Jamat ul muslimeen se khurooj ka ilzaam bhi laga. Aur inke mutalliq ye bhi kaha ke isne shadi na kar ke Sunnate Nabvi ﷺ ka inkaar kiya hai. Aur ye na doodh peeta hai aur na gosht khata hai. Is tarah ye Halal cheezon ko haram qarar dene ka murtakib hua hai. Aur mazeed bar’aan ye Hukmaranon ki majlis se kanni katrata hai. In ilzamaat ki file bana kar Ameer ul Momineen Hazrat Usman Bin Affan (رضي الله عنه) ki khidmat mein bhej di.

★ Ameer ul Momineen Hazrat Usman Bin Affan (رضي الله عنه) ne  Basrah ke Governer ko hukm diya ke Aamir Bin Abdullah ko bula kar un par aa’ed kardah ilzamaat ki tahqeeq kar ke jald mujhe haqeeqat-e-haal se aagah karen.

Governer ne Hazrat Aamir ko bulaya aur kaha Keh: Ameer ul Momineen ke hukm ki tameel karte huye main aapse chand sawal poochna chahta hun.

Farmaya: Khushi se poochiye.

Governor ne poocha: Aap Rasool ﷺ ki Sunnat se airaaz karte huye shaadi se inkaari hain?

Farmaya: Maine Nabi ﷺ ki Sunnat ka inkaar karte huye shadi ke bandhan se Raah-e-Farar ikhteyaar nahi kiya. Main sidq-e-dil se ye ailaan karta hun ke Islaam mein Rehbaniyat-o-Duniya tark kar dene ka koi tassawur nahi paya jata. Albattah Shadi na karne ki asal wajah ye hai ke mere dil mein ye khayal aaya ke mera aik dil hai. Kyun na sirf aik Allah hi ke sath lau lagayi jaye, mujhe ye andeshah lahiq hua ke kahin biwi mere dil pe ghaalib na aa jaye.

Phir usne daryaft kiya keh tum Gosht kyun nahi khaate?

Aapne farmaya jab dil chahe aur asani se dasteyab ho to kha leta hun, usne poocha tum paneer kyun nahi khate? Aapne  farmaya: Main aik aise  Ilaqey mein rehta hun jahan Aatish parast aabad hain. Wo paneer banate hain, ye qaum murdaar aur zabah kiye gaye jaanwar mein koi farq nahi karti mujhe andesha rehta hai ke kahin paneer mein murdah jaanwar ka koi juzz istamal na kiya gaya ho.

Haan agar do(2) Musalman tasdeeq kar den ke is mein tamam halal ajzaa istamaal huye hain to main ba’Khushi kha leta hun.

Governor ne poocha: Tum Hukamranon ki majlis mein kyun nahi beith’tey? Unki majlis se  hamesha ijtenaab kyun karte ho? Iski kya wajah hai?

Farmaya: Tumhary darwazy pr Zaroratmand aty hain. Inhin apny paas bulao aur in ki zaroriat ko pura karo. Aur jis ko tum sy kuch garaz nahi us ke darpy kuin padty ho? Usy chod do aur apni halt main mast rahny do.

★ Governor ne Hazrat Aamir Bin Abdullah ki ye tamam batein Ameer ul Momineen Hazrat Usman Bin Affan (رضی اللہ عنہ) tak pohncha dein. Aur unhen ittalaa di ke na to Hazrat Aamir Ata’at-e-Ameer se  Gurezaan hain. Aur na hi unhon ne Musalmanon se  koi alag rawish ikhteyaar ki hai, Lekin is se bhi unke khilaaf saazishon ki yalghaar maand na pad saki. Unke Khilaaf bohat se man gahrat qisse  tarashe gaye, naubat yahan tak pohonch chuki thi keh Hazrat Aamir ke haami aur mukhallif do(2) mazboot girohon mein taqseem ho chuke thay, qareeb tha ke koi Andohnaak Fitnah sar utha leta، lekin Ameer ul Momineen Hazrat Usman (رضی اللہ عنہ) ne Hazrat Aamir ko shaam bhejh diya. Aur wahan inhen mustaqil rehaaish faraham kardi. Aur Shaam ke Governer Hazrat Ameer-e-muawiyah (رضی اللہ عنہ) ko inki Takreem-o-T’azeem ka hukm de  diya.

★ Jis din Hazrat Aamir Bin Abdullah Basrah se kooch karne lage. Bohat se Mu’taqideen aur Shagird alwidaa ke liye jama ho gay. Aur Jamm-e-Ghafeer Alwidaa kehne  ke liye Basrah Sheher ke bahir tak gaya. Sheher se bahir nikal kar sab Hazireen se mukhatib huye aur Farmaya: Logon! Main Dua karta hun aur tum Ameen kehna.

Sab log unki taraf tiktiki baandh kar dekhne lage, Sab mujassamah Huzn-o-malal bane be his-o- Harkat khamosh khade thay, sabki ankhon se  aansu rawan thay.

Aapne  hath uthaya aur ba awaz buland kaha:

Ilahi: Jis kisi ne mujh par ilzaam lagaya aur mujhe badnaam karne ke liye koshaan raha. Jo mujhe mere sheher se nikalne ka sabab bana, Mery aur mery bhaiyon ke darmiyan judai ka bayes bana. Aye Allah! main ne use maaf kiya, tu bhi use maaf kar dena.

Use Deen-o-Duniya mein Aafiyat ata karna, Mujhe aur tamam Musalmanon ko apni rehmat, Ahsaan aur maafi ki chadar ke parde  mein dhaanp lena. Bilashubah tu bohat bada rehem karne wala hai.

Phir apni sawari ko Sarzameen-e-Shaam ki taraf rukh kar ke Airr lagayi aur sooye manzil chal diye.

★ Hazrat Aamir Bin Abdullah ( رحمہ اللہ) ne  baaqi zindagi Shaam mein basar ki aur Bait ul Muqaddas mein dere dale rakhey. Aur iske ilawah jo Sarkari rihayish faraham ki gayi thi us mein aik din bhi qiyaam nahi kiya. Albattah Shaam ke Governer Hazrat Ameer-e-Muawiyah (رضی اللہ عنہ) ne unki Tazeem-o-Takreem ke liye koi kasar baaqi na chhodi jis se ye dili taur par bohat mutaasir huye.

Jab Hazrat Aamir (رحمہ اللہ) Marz ul maut mein mubtala huye to kuch teemardaar aaye, wo kya dekhty hain ke aap zaar-o-qataar ro rahe hain.

Sab ne kaha:

Aap rote kiun hain? Aap to zindagi bhar kaar’haye numayan aur kaar’haye Khair hi saranjaam dete rahe hain.

Farmaya:

Allah ki qasam! Mujhy na to duniya ka lalach hai aur na hi maut se ghabrahat, Main rota is liye hun ke safar lamba hai aur Zaad-e-Raah bohat thoda hai, Main isi Nasheb-o-Faraz aur kashmakash mein mubtala hun ke kya Jannat milegi ya jahannum>

Mujhe Ilm nahi ke main kis Safar par rawanah ho raha hun.

Phir unki pakeezah rooh is haal mein Qafs-e-Unsari se parwaz kar gayi ke unki zuban Zikr-e-Ilahi se tar thi, kya naseeb hai! Aur kya Khush bakhti ke Qiblah-e-Awwal,Haram-e-Salis, Mairaj-e-Rasool ﷺ ki manzil-e-Awwal yani Bait ul Muqaddas ki qurbat mein hamesha ke liye sukoon ki neend so gaye.

Allah Hazrat Aamir (رحمہ اللہ) ki qabr ko munawwar kare.

Allah Jannat ul Firdous mein uske chehre ko Tar-o-Tazah kare.

Hazrat Aamir Bin Abdullah Al Tamimi ke mufassil Halat-e-Zindagi maloom karne ke liye darj zail Kitaabon ka muta’ala Karen:

1: Al Tabaqat ul Alkubra Ibn-e- Saad                                      7/103-112 2: Sifat ul alsafwah Ibn-e-Jawzi                                              3/201-211 3: Hilyat ul Aoliya Asfahani                                                    Page: 87-95 4: Tareekh-e-Tabri Az Muhammad bn Jareer altabari           302-327-333

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer