Hazrat Umar bin Abdul aziz aur uska farzand Abdul Malik

Jaleel-ul-Qadr tabiee Umar bin Abdul Aziz apne pesh roo khalifah Abdul Malik bin Suleiman ki qabar par mitti daal kar abhi apne haath jhaad hi rahe thay keh unhone apne irdgird zameen pe thar tharaahat ki awaz suni, Poocha yeh kya hai? Paas khade logon ne btaya: Janab apki sawari ke liye yeh sarkari gaadiyon ki Naqal-o-Harkat hai. Hazrat Umar bin Abdul Aziz ne unki taraf aik taiaranah nigaah dali aur us shakhs ki maanind kapkapaati, larzaati aur dheemi awaz se bole: Jise thakawat ne laaghar kar diya ho, Ya musalsal bedaari ne muzmahal kar diya ho. Farmaya: Mera in gaadiyon se kya waasta. Inhen yahan se peechy hata do. Mere liye meri khachhar kaafi hai woh laao main usi pe sawar hounga. Abhi khachhar par baithna hi chahte thay keh security guard ka Chaaq-o-Choband commander aapke aage aage chalne ke liye aa dhamka. Aur uske dayen bayen hifazti daste ke ghabru jawan thay, Jinke hathon mein chamakdaar naize pakade huye thay, Unki taraf dekha aur farmaya: mera in se kya kaam?

Main Ummat-e-Muslimah ka aik fard hun wese hi Subah-o-Shaam zindagi basar karta hun jis tarah doosre musalman basar karte hain, yeh keh kar aap chal pade, Log bhi apke humrah chal pade, Aap masjid mein aaye ailaan kiya gaya ke sab log masjid mein jamaa ho jayein. Ailaan sunte hi log masjid ki taraf daudey aur har taraf se giroh dar giroh woh masjid mein daakhil hone lage. Jab majma bhar gaya to aap khitaab ke liye khade huye, Hamd-o-Sanaa aur Salaat-o-Salam ke baad farmaya: Logon! Meri raaye liye baghair mere naatawan kandhon par khilafat ka bojh laad diya gaya hai, Na maine kabhi uska mutaalba kiya na musalmanon se iske mutalliq mashwara liya gaya aur na hi khilafat ki is aham zimmedaari ko apne liye pasand karta hun.

Meri taraf se tumhein khulli chutti hai jisey chaho apna khalifah muntakhib kar lo. Yeh sun kar majma bayak waqt baa awaz buland pukaar utha. Aye Ameer ul Momineen hum apko apna khalifah maante hain, Hum aap par raazi hain. Aap hukoomat ki baag dor sambhalein. Allah apka Haami-o-Naasir hoga. Jab aapne yeh Soorat-e-Haal dekhi ke koi aik bhi awaz uske khilaaf na uthi sab is par mutmayin hain ke main Masnad-e-Khilafat par baithoon, Abhi logon ka shor tha. Aap ne dubara Hamd-o-Sanaa aur Durood-o-Salam padha aur logon ko taqwah ikhtiyaar karne, Duniya se be niyaazi baratne aur aakhirat ki fikar karne ki talqeen ki, Logon ko apni maut yaad dilane ke liye aise dilsoz lehje mein talqeen karne lage jis se patthar dil bhi mom ho jayein, Gunahgaar ankhon se aansu tapak padein. Unki Zuban-e-Mubarak  se naseehat aamoz kalmaat nikal kar sunne walon ke dilon mein paiwast ho rahe thay. Phir aapne dilsoz, Thakawat numa lekin qadre buland awaz mein kaha: Jo hukmraan Allah ka farmabardaar ho uska kaha mano aur jo Allah ka nafarmaan ho uski baat manna tumhare liye zaruri nahi. Logon: Suno! Jab main Allah ta’ala ka farmabardaar rahun meri baat maante rehna aur jab kabhi Allah ki naafarmaani par utar aaun to tum mere ahkamaat ko thukra dena phir mimbar se utre seedhy ghar gaye. Apne kamre mein ja kar kuch dair sustaane ke liye bistar par daraz ho gaye, Choonke apne pesh roo khalifah ki wafat aur uska kafan dafan ki wajah se aap bohat thak chuke thay.

Ameerul Momineen Umar bin Abdul Aziz abhi apne bistar par pahlu ke bal lete hi thay ke unka satrah (17) saala farzand-e-Arjumand Abdul Malik kamre mein daakhil hua. Usne kaha: Ameerul Momineen aap kya karna chahte hain? Farmaya: Beta main thodi der sona chahta hun main bohat thak chuka hun, Bete ne kaha: Ameerul Momineen kya aap mazloom logon ki daadrassi ke baghair hi so jana chahte hain? Unka woh maal jo Zulm-o-Istabdaad se chheena gaya hai unhen wapis kaun dilayega? Farmaya: Beta! Choonke main khalifah Suleiman ki wafat ki wajah se gazishta saari raat jagta raha. Thakawat ki wajah se mere jism mein sakat nahi. In shaa Allah thoda aaram karne ke baad Namaz-e-Zuhar logon ke humrah padhunga aur phir yaqeenan mazloomon ki daadrassi hogi aur har aik ko uska haq diya jayega. Koi mahroom nahi rahega. Bete ne kaha: Ameerul Momineen iski kaun zamanat deta hai ke aap zohar tak zinda rahenge. Bete ki yeh baat sun kar Umar bin Abdul Aziz tadap uthay, Ankhon se neend jaati rahi thake huye jism mein dubarah tawanayi laut aayi aur yakdam jast laga kar baith gaye aur farmaya: Beta zara mere qareeb aao. Beta qareeb hua to usey gale laga kar maathay ko choomne lage. Aur farmaya: Allah ka shukar hai jis ne mujhe aise honhaar farzand ata kiye jo deeni aitebaar se mera muaawan banega. Phir aap uthay hukm diya ke yeh ailaan kar diya jaye jis par koi zulm hua hai woh apna muqaddama khalifah ke samne aa kar pesh kare.

Yeh Abdul Malik kaun hai? Is naujawan ki daastaan kya hai jiske mutalliq logon ka khayaal hai ke usne apne waalid ko ibaadat guzaari par uksaya, Zaahidon ki raah par chalaya aur auliyaa ki saff mein laa khada kar diya. Aaiyye ab saalih naujawan ki kahani ibteda se aapko sunate hain.

Ameerul Momineen Umar bin Abdul Aziz ke barah (12) bete aur teen (3) betiyan thin, Tamam aulad muttaqi, Parhezgaar aur honhaar thi, Apne behen bhaiyun mein Abdul Malik lk darakhshan sitarah aur Gauhar-e-Aabdaar tha. Ilawah azeen woh bohat zaheen aur Mahir Adeeb tha. Yun to woh naukhaiz jawan tha lekin Aqal-o-Daanish mein boodhon ko bhi maat karta tha. Usne neki aur taqwe ke mahaul mein parwarish payi, Us mein khaandan-e-Farooq-e-Aazam ke ausaaf paye jate thay, Khaas taur par taqwa, Pakeezgi aur khashiyat-e-Ilaahi mein Hazrat Abdullah bin Umar ke hum palla tha.

Uska chacha zaad bhai Aasim bayan karta hai keh main aik dafa Damishq gaya aur wahan apne chachere bhai Abdul Malik ke paas thehra, Abhi uski shaadi nahi hui thi. Ham ne ishaa ki namaz padhi aur sone ke liye dono apne bistar par daraz ho gaye. Abdul Malik ne charagh gul kar diya, Hum donon ne apni ankhein neend ke hawale ki jab adhi raat ko meri aankh khuli to kya dekhta hun ke Abdul Malik andhere mein khada namaz padh raha hai aur Qur’an majeed ki yeh ayat tilawat kar raha hai:

افرایت ان متعناھم سنین. ثم جا ٕ ھم ما کانوا یوعدون. ما اغنی عنھم ما کانوا یمتععون. الشعرإ ٢٧. ٢٥

“Bhala dekho to agar hum inhen barson fayeda dete rahe phir unpar woh azaab aa waaqe’ ho jiska inse wada kiya jata raha, to jo faidah yeh utha rahe hain, Inke kis kaam aayenge“.

Maine dekha ke woh dil ko hila dene wali gidgidaahat aur Aah-o-Zaari ke sath baar baar is ayat ki tilawat kar raha hai aur Zaar-o-Qataar roye ja raha hai, Jab maine mehsoos kiya ke yeh Aah-o-Zaari uska kaam tamam kar degi to maine qadre oonchi awaz se لاالہ الااللہ والحمد للہ kaha: Maine yeh jumlah is andaaz mein kaha jaise koi neend se bedaar hote waqt kehta hai. Meri niyyat yeh thi ke woh meri awaz sun kar rona band kar de aise hi hua jab usne meri awaz suni woh khamosh ho gaya aisi chup saadh li jaise woh kamre mein maujood hi nai.

Is honhaar Aal-e-Farooq-e-Aazam ke naukhaiz jawan ne apne daur ke akaabir Ulama se Kitaab-o-Sunnat ka ilm haasil kiya. Qur’an-o-Hadees ke uloom se apne seene ko munawwar kiya, Deeni masaail mein faqih ki masnad par fayez huye aur nau umari ke bawajood shaami Ulamaa-o-Fuqaha par fauqiyyat haasil ki, Aik martabah Ameerul Momineen Umar bin Abdul Aziz ne shaami Ulama’a-o-Fuqaha ko ikhattha kiya aur unse yeh masley daryaft karte huye farmaya: Aye Ulamaye karaam aur fuqahaay izzaam: Main tumhein khush aamdeed kehta hun. Mere khandan mein se jin ashkhaas ne logon ka maal Zulm-o-Istabdaad se cheena hai inke mutalliq apki kya raye hai?

Sab ne yeh jawab diya: Aye Ameerul Momineen yeh kaam apke daur e hukoomat  mein nahi hua iski zimmedaari aap pe nahi aati uska gunaah usi par hoga jis ne maal ghazab kiya, Aap bari uz zimma hain, Lekin Ulama ke is bayan se aap mutmain na huye. Aik aalim jo deegar se mukhtalif raye rakhta tha kehne laga: Ameerul Momineen aap apne farzand-e-Arjumand Abdul Malik ko bulayen. Woh Ma shaa Allah ilm, Fiqh aur Aqal-o-Daanish mein mumtaaz maqaam rakhta hai. Is masley mein uski raye daryaft karen.

Usey bulaya gaya. Jab Abdul Malik paighaam ke mutabiq Darbaar-e-Khilafat mein pohcha to Ameerul Momineen ne kaha: Beta un amwaal ke mutalliq teri kya raye hai, Jo hamare chachaa ke beton ne logon se cheene hain? Kyun keh mazloom log is waqt apna haq wasool karne ke liye mere paas aaye huye hain.

Bete ne jawab diya: Abba jaan in mazloomon ki daadrassi karte huye inka maal wapis lautana apka farz hai. Agar aapne aisa na kiya to aap bhi is zulm mein barabar ke shareek samjhe jayenge. Kyun keh aap ko is zulm ka ilm ho chuka hai. Lihaza is se gullu khalaasi apka farz hai. Yeh baat sun kar Ameerul Momineen Umar bin Abdul Aziz ka chehra khil utha, Dili itminaan mila aur woh gham kaafor hua jis ne apko nidhaal kar rakha tha.

Khandan Farooq-e-Aazam ke azeem sapoot ne Damishq ke pur ronaq bazar, Lehlahaate huye taro tazah baghaat, Suhaane dilkash thande saaya daar darakht aur bal khaati hui rawan dawan nadion unke dilfaraib manaazir ko chod kar sanghlakh (سنگلاخ) sarhaddi ilaaqe ko apni rehayish ke liye muntakhib kiya taake har dam har ghadi Haalat-e-Jihaad mein rehne ki saa’adatein haasil hon. Ameerul Momineen Umar bin Abdul Aziz ko is baat ka ilm hone ke bawajood ke uska beta, Honhaar, Muttaqi, Moaddab aur parhezgaar hai phir bhi inhen andesha laahaq rehta ke kahin shaitaan ke daao mein na aa jaye woh jawani ki kharmastiyon se bohat khaufzadah thay, Woh apne farzand ke mutalliq har tarah ki maloomaat rakhte aur is se kabhi ghaflat na barat tey.

Ameerul Momineen Umar bin Abdul Aziz ke wazeer, Qazi aur Musheer janab Maimoon bin Mehraan bayan karte hain keh main aik din khalifah Umar bin Abdul aziz ke paas gaya, Woh apne bete Abdul Malik ko khatt likh rahe thay jis mein naseehat, Raahnumayi, Tanbeehah aur basharat par mabni jumle likhe us khatt mein unhon ne yeh bhi likha: Beta! Meri baat sun kar ise yaad rakhna auron ki nisbaat tera farz zyada banta hai. Zara khayaal karo. Allah Subhana-o-Ta’ala ne ham pe kitne karam kiye hain. Har chhote bade kaam mein usne hm pe be intahaa ehsaanaat kiye.

Beta! Allah ta’ala ke us fazal ko yaad karo jo usne tujh par aur tere waalidein par kiya hai. Beta! Takabbur, Nakhowat aur gharoor se bachna. Bilashubah yeh shaitaani ausaaf hain aur shaitaan mominon ka azli dushman hai.

Beta! Yeh khat main tujhe is liye nahi likh raha ke mujhe koi teri shikayat mili hai. Mujhe tum par aitemaad hai. Albattah yeh mujhe maloom hua hai keh tere dil mein khud pasandi ke jazbaat maujzan hain. Yaad rakhna agar is khudpasandi ki wajah se tu ne koi gul khilaya to main aisi sarzanish karunga jise tum zindagi bhar yaad rakhoge phir na kehna ke sakhti hui.

Wazeer-e-Mausoof  Janab Maimoon bin Mehraan kehte hain khat likh kar Ameerul Momineen ne meri taraf dekha aur farmaya: Maimoon mujhe mere bete ke sath bohat pyar hai. Mujhe andeshah hai ke yeh pyar iski tarbiyat mein aade na aa jaye aur main bhi ankhein band kar ke isi dagar par chalne lagun jis tarah aksar baap apni aulaad ke bare mein naram rawaiyyah ikhteyaar karte hain aur inke uyoob par pardah dalte rehte hain. Yeh Tarz-e-Amal aulaad ke haq mein qat’an behtar nahi hota.

Maimoon aap abhi Damishq jayein aur achhi tarah is cheez ka jayezah lein. Kahin mere bete ke dil mein takabbur, Nakhowat aur khud pasandi jaisi qabahatein to nahi payi jaatin. Kyun ke abhi woh bachha hai, Kahin shaitaan us par panja na jama le.

Janab Maimoon bayan karte hain main Darbaar-e-Khilafat se hukm paa kar Damishq ki taraf rawanah hua. Raaston ki Nasheb-o-Faraz se guzarta hua Abdul Malik ke ghar pohcha. Andar aane ki ijazat talab ki. Maine dekha ke khoobroo jawan raa’na badi inksaari ke sath safed qaleen par jalwah afroz hai. Yun maloom hota tha jaise aasmaan se zameen par mahtaab utar aya hai.

Usne aage badh kar mujhe khush aamdeed kaha: Jab main iske paas baith gaya to usne kaha: Main ne Abba jaan se aapki tareef suni hai, Mujhe ummeed hai ke Allah ta’ala apke zariye ummat ke afraad ko fayeda pohchayega.

Maine kaha aapka kya haal hai? Usne jawab diya Allah ka ehsaan aur shukar hai main bilkul theek hun lekin mujhe har waqt yeh khatka laga rehta hai ke kahin mujh se koi aisa kam sarzard na ho jaye jis se mere Waalid-e-Mohtaram ke dil ko thes pohche aur mujhe yeh bhi andeshah hai ke kahin unki mere sath mohabbat mere mutalliq durust maloomaat haasil karne mein rukaawat na ban jaye aur main unke liye aik musibaat ban jaon. Mujhe is jawan ki baatein sun kar bada ta’ajjub hua ke baap aur bete ki soch kis qadar aik doosre se milti julti hai, Maine is se poocha mujhe yeh batao tumhara guzarah kaise chalta hai? Usne bataya: Maine yhaan aate hi zameen ka aik tukda khareed liya tha aur uski qeemat maine apni aisi kamayi se ada ki hai jiske halal hone mein koi Shak-o-Shuba nahi us zameen se mujhe itna kuch mil jata hai jo mere guzaare ke liye kaafi hai. Alhamdulillah main musalmanon ke tax ka mohtaaj nahi. Allah ne mujhe us se be niyaaz kar rakha hai. Main us Rabb ul Aalameen ka behad shukr guzaar hun. Maine poocha tumhari khuraak kya hai? Usne bataya kabhi gosht, Kabhi daal aur kabhi sirka aur yahi mere liye kaafi hai.

Maine poocha kya tere dil mein khudpasandi ke jazbaat paye jate hain?

Usne bataya: Haan mere dil mein khudpasandi ke jazbaat paye jate thay. Lekin jab se Abba jaan ne mujhe samjhaya aur shafqat bhare andaz mein mujhe is qabahat se baaz rehne ki talqeen ki maine usey apne dil se bilkul nikaal diya hai. Ab mera dil bilkul saaf hai aur yeh Abba jaan ka mujh pe bohat bada ehsaan hai. Allah mere Abba jaan ko Jaza-e-Khair ata kare. Main Abdul Malik ke paas kaafi der baitha, Khul kar baatein huin, Dauraan-e-Guftagu bohat hi mufeed aur qeemti maloomaat haasil huin. Maine apni zindagi mein is se badh kar khoobsoorat, Aqal mand aur nau umri ke bawajood ba-adab aur saleeqa shuaa’ar koi naujawan nahi dekha. Jab shaam hui aik ladka uske paas aaya, Usne bataya ham faarigh ho chuke hain. Phir woh khamosh ho gaya.

Maine poocha yeh kis kam se faarigh huye hain?

Usne bataya: Hammaam se.

Maine poocha woh kaise? Usne bataya ke unhone mere liye ghusal khana khali karwaya hai, Ab main us mein nahaunga.

Maine Kaha: Janab yeh sun kar mujhe hairat hui hai. Aap se mujhe yeh tawaqqo na thi.

Mera yeh andaz dekh kar woh dar gaya usne انا للہ وانا الیہ راجعون kaha. Aur poocha chacha jaan Allah aap par rehem kare kya hua?

Maine usey kaha:yeh ghusal khana tera hai?

Us ny bataya: nahi!

Main ny kaha: phir aap ko usy khali karany ka kia haq phuchta hy? Kuin tum apny aap ko dusry logon sy bulnd tar samjhty ho. Kia tumhin Surkhab ky par lagy huiy hain? Tum ny gusal khany ky malik ko bhi nuqsan phuncaya oy aur jo log gusal khana istimal karny ki zararat mahsoos karty hain un ko bhi teri wajah sy dushwari uthana padi. Yeh sab kuch kia ha?

Tujhy yeh bat qat’an zeeb nahi deti. Who meri talkh batin sun kar pahly muskuraya aur phr bady adab sy khny laga: Chaca jan! Naraz na hun, Main gusal khany ky malik ko din bhar ki ujrat dy kar khus kar dun ga.

Main ny kaha: is tarha tun aisy israf ka irtikab karo gy jis main takabbur ki a’ameezish pai jati hy.

Yaad rakho tum bhi dosry musalmanoo jaisy ho, Aam logon ki tarha tum bhi hammam istimal karny jaya karo.

Us ny kaha: Chaca jan! dar’asal baaz uqat ganwar qisam ky loog barhanah hammam main nahaty hain, Mujhy is sy ghin aati ha. Is liy main akely nahana pasnd karta hun, Aur yahi aik tariqa ha jis sy satar ko malhoz-e-Khatir rakha ja sakta ha. Ya aap mujhy koi tadbeer batain ky main kia karun?

Maine kaha aaplogo ki faraghat ka intezaar kiya karen. Jab woh hammam mein ghusal kar ke az khud chale jayein to phir aap nahane ke liye jaya karen. Usne kaha: Main aapse wada karta hun ayindah aise hi kiya karunga. Aaj ke baad kabhi bhi din ke waqt Hammaam ka rukh nahi karunga. Darasal is ilaqey ki sardi aur raat ki khanki ka andeshah na hota to main pehle bhi din ko Hammaam ka rukh na karta. phir woh sar neecha kar ke kuch sochne laga. Phir sar uthaya aur mujhe kaha: Ba khuda yeh bat mere Abba jaan ko na batana unhen yeh baat sun kar dili koft hogi. Main nahi chahta ke woh mujh se naraz hon aur isi halat mein unka dam nikal jaye aur main door hone ki wajah se maafi bhi na maang sakun, Maimoon bayan karte hain ke main ne aise nazuk mauqa par uski Aqal-o-Danish ka imtehaan lene ka irada kiya.

Maine kaha agar Ameerul Momineen ne mujh se poocha kya dekh kar aaye ho? Tumhara kya khayaal hai main unke samne jhooth bolun?

Usne kaha: Chacha jaan aap jhooth na bolen. Is se Allah bachaye jab Abba jaan yeh sawal karen to aap poori wazahat se yeh keh dena main ne aik naa gawaar aadat dekhi thi. Lekin maine usey samjha diya aur woh baaz aa gaya. Mujhe ummeed hai ke Abba jaan posheeda ayb ko kuredenge  nahi, Kyun keh Allah ta’ala ne unhein posheedah uyoob ko kuredne se mehfooz rakha hai.

Janab Maimoon kehte hain ke main ne Umar bin Abdul aziz jaisa baap nahi dekha aur na hi Abdul Malik ke jaisa koi beta. Allah donon par apni be paaya rehmat kare.

Allah paanchwe (5) khalifah-e-Raashid Ameerul Momineen Umar bin Abdul Aziz par razi ho aur usey apne khusoosi inamaat se nawaz kar khush kar de, Uski aur uske lakht-e-Jigar Abdul Malik ki qabar ko taro taza baagheecha bana de. Jab yeh baap beta apne rab se milen to inhein salam kiya jaye. Jab yeh naik logon ke sath qayamat ke din uthaye jayein to inhein salam pesh kiya jaye. Ameen.

Ameerul Momineen Umar bin Abdul Aziz aur unke bete Abdul Malik ke mufassal Halaat-e-Zindagi maloom karne ke liye darj zail kitaabon ka muta’ala  karen:

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer