Hazrat Rabee’a Al Raayi (رضی اللہ عنہ)

“Main ne Rabee’a se badh kar sunnat ka Haafiz koi nahi dekha” ابن ماجشون

Hum 51 hijri ke dahane par khade hain.

Wohh dekho Islami lashkar bani Nao-e-Insan ki raahnumai ke liye tauheed ka parcham hath mein liye insani muashare ki islah ke liye mohabbat ka hath badhaye aur aik aise Dastoor-e-Hayat ki barkaat ko phailate huye Insan ko Insan ki ghulami se nijaat dilane ke liye Mashriq-o-Maghrib ki taraf sirf is aik hi dhun mein musalsal aage badhta ja raha hai ke yahan roye zameen par hukm sirf aik Allah ka hi chalega jiska koi shareek nahi.

Udhar dekho Khorasaan ka governer Sajistaan ka faateh aik kamyab general Jaleel-ul-Qadr sahabi Hazrat Rabee’ bin Ziyaad Harisi, Allah ki raah mein jihaad karne wale lashkar ki qiyadat karte huye kis shaan se ja raha hai aur uske sath uska bahadur ghulam Farrukh bhi hai.

Sajistaan aur uske nawahi ilaqon ko fatah karne ke baad unho ne yeh azm kar liya ke ab apni zindagi ka khaatma Dariya-e-Saihoon aboor kar ke Maawra Al Nahar ki buland chotiyon par tauheed ka parcham lehra kar karenge.

Is Azeem ul Shaan Muarke ke liye Hazrat Rabee’ bin Ziyaad (رضی اللہ عنہ) ne bharpoor tayyari ki aur jangi Saaz-o-Samaan se lashkar ko lais kiya. Dushman ko ladai ke waqt aur jagah se bhi aagah kar diya. Jab ghamasaan ka ran pada to Hazrat Rabee’ aur iske lashkar-e-Jurrar ne aise kaarhaye numayan sar anjam diye jinhein tareekh mein hamesha sunehri horoof mein Khiraj-e-Tehseen pesh kiya jata rahega. Unke ghulam Farrukh ne Maidan-e-Jang mein bahaduri ke woh johar dikhlaye aur dushman par taabad tod hamle mein aise paintre badle ke Hazrat Rabee’ yeh manzar dekh kar Angusht-e-Badanidaan reh gaye. Unke dil mein iski bahaduraana azmat ke naqoosh baith gaye Aur unhein pahli dafa uski jurrat, Shuja’at, be khaufi aur jangi maharat ka andaza hua. Is ladai mein musalmanon ko azeem fatah hasil hui. Dushman ke qadam ukhad gaye. Unki safon ko musalmanon ne bakhair kaar rakh diya. Phir Lashkar-e-Islam ne us darya ko uboor kiya jo sar Zameen-e-Turkey ki taraf pesh qadmi mein rukawat bana hua tha, Aur usey Cheen ki taraf rukh karne se roke huye tha. Jab is azeem general ne darya uboor kar liya to sab se pehle Lashkar-e-Islam ne darya ke kinare par baith kar wazu kiya, Wazu aisa acha, Aisa mukammal aur aisa dil laga ke kya kehne! Phir qibla rukh khade ho kar madad dene aur dushman par ghalbaha ata karne wale Allah ka shukar ada karne ke liye do (2) rakaat namaz ada ki phir is azeem General ne apne ghulam Farrukh ko jang mein shaandar kaarnama sar anjam dene ki bina par Tamgha-e-Shuja’at dete huye usey apni ghulami se azaad kar diya, Aur usey Maal-e-Ghaneemat mein se wafir hissa ata kiya, Aur iske ilawah bhi aur bhi Inamaat-o-Aizazaat se nawaza.

Is raushan chamkeele aur noorani din ke baad Rabee’ bin Ziyaad Harisi zyada der tak zinda na rahe, Apne khwab ke sharminda tabeer hone ke do (2) baras baad raazi khushi apne Rab ki Jawaar-e-Rahmat mein chale gaye.

انا للہ و انا الیہ راجعون

Raha yeh bahadur, Jawan mard aur batal-e-Jaleel Farrukh to woh apne hisse ka Maal-e-Ghaneemat uthaye azeem General ki taraf se diye gaye atyaat ko samaitey huye aur in sab se badh kar apni qeemti azadi ka jhoomar apni Jabeen-e-Niyaaz par lagaye maidan ki ghubaar ka taaj apne sar par sajaye Madina munawwarah ki taraf laut gaya.

Farrukh jab Madina munawwarah pohcha us waqt yeh ubharta hua kadiyal, Khoobsoorat aur bahadur jawan tha.  Isne abhi apni zindagi ki taiswi (23) bahar mein qadam rakha tha is ne sukoonat ke liye aik ghar aur sukoon ke liye aik biwi hasil karne ka irada kiya. Pahle usne Madina munawwarah mein matawasit darje ka aik ghar khareeda aur iske baad aik aisi danishmand, Saleeqa shia’ar aur deegar bohat si khoobiyon se muttasif biwi ka intekhab kiya jo iski hum umar thi.

Farrukh woh ghar dekh kar bohat khush hua jo Allah ta’ala ke Fazal-o-Karam se usey hasil hua tha. Biwi ki rafaaqat mein usey zindagi ka maza Husn-e-Moasharat ki khushboo, Hayaat-e-Musta’ar ki tarotaazgi Wahem-o-Gomaan se badh kar mayassar aayi. Ghar ke Dar-o-Deewaar khushiyon ke naghme alaapte huye mehsoos huye.

Lekin woh chaheti biwi jise Allah ta’ala ne umdah sifaat aur dilruba adaat se nawaza tha. Woh aik momin bahadur, Jangju ke moarakaon mein deewana waar shamooliyat ke shoq par ghalib na aa saki aur na talwaron ki jhankaar ke sunne ke shauq par aur Allah ki raah mein jihaad ki waalehaana mohabbat par ghalib aa saki.

Jab bhi Islami lashkaron ki kamyaabi ki khush kun khabrein Madina munawwarah mein gasht kartin to inka Jazba-e-Jihad Nuqtah-e-Urooj par pahuch jata aur Shauq-e-Shahadat mein be panah izaafa ho jata.

Bahadur-o-Nidar Farrukh ne Masjid-e-Nabvi ke khateeb ko Fazail-e-Jihaad par khutba dete huye suna. Woh hazireen ko Lashkar-e-Islam ki maidan haaye jihaad mein Kamyabi-o-Kamrani ki khushkhabri de rahe thay aur shahadat ki umang paida karne ke liye dilon ko garma rahe thay. Khutbah kya tha aik saahiranah alfaaz ka majmua, Riqqat angayiz jumlon ka moraqqa aur dilawaiz Khayaalat-o-Afkar ka aamekhta (آمیختہ) tha. Sunne wale namdeedah thay har fard Jazba-e-Jihaad se sarshaar nazar aata tha.

Jumma se farigh ho kar seedhy ghar aaye. Islami lashkar mein shamil ho kar Maidan-e-Jihaad ki taraf jane ka musammam iradah kar liya. Chaheti biwi ko apne iraade se aagah kiya usne kaha: Sartaaj mujhe aur mere pait mein palne wali amaanat ko kis ke hawale kar ke ja rahe hain.

Aap Madina mein ajnabi hain aur na hi apka yahan koi rishtedar hai.

Usne jawab diya main apko Allah ke sapurd kar ke ja raha hun. Yeh tees (30,000) deenar apne paas rakhen yeh Maal-e-Ghaneemat se mere hisse mein aaye thay. Inhein sambhalo ya tijarat mein laga dena khud bhi kharch karna aur maroof andaz mein apne hone wale bache par bhi kharch karna, Yahan tak ke main Maidan-e-Jihaad se sahih saalim wapis aaun ya Allah ta’ala mujhe shahadat naseeb kar de jo meri dili tamanna hai phir alvidai salam kaha aur apni manzil par rawana ho gaya.

Is moazzaz saleeqa shia’ar, Wafadar aur sughad khatoon ne apne khawand ki rawangi ke chand maah baad aik khoobru, Khush atwaar aur jaazib nazar bachhy ko janam diya usey dekh kar bohat khushi hui. Khayaal aaya ke shayad yeh apne baap ki judai ka gham ghalat karde aur yeh uski nishani aur amanat mere dil ka saroor aur ankhon ki thandak ban jaye, Is bachhey ka naam Rabiya rakha gaya, Taake uska wajood ghar ke angan ke liye sada bahar ka samaan paida karta rahe.

Is nannhe bache ke raushan chehre par Sharafat-o-Najabaat ki alamaat shuru hi se ashkaar thi. Bachpan hi se iski baaton aur kaamon se zahaanat tapakti thi. Maan ne iski Taleem-o-Tarbiyat ke liye mahir asaatzah ke supurd kar diya aur unhein achi tarah taleem dene ki talqeen ki aur tarbiyat dene walon ki khidmat mein istida’a ki ke woh isey achey andaz mein adab sikhlayen. Thodi hi der mein usne likhne padhne mein maharat paida kar li. Qur’an majeed hifz kar liya aur aisi tarteel Tajweed-o-Khush Ilhaani se padhne laga jaisa ke Rasool-e-Aqdas ﷺ ke Qalb-e-Mubarak  par nazil hua tha. Jis qadar mumkin ho saka Ahadees-e-Rasool علیہ السلام ko bhi zubani yaad kar liya aur is tarah Kalaam-e-Arab ka bhi Qabil-e-Qadar hissa zubani yaad kar liya. Ilawah azeen deeni ahkamaat ki maarfat bhi hasil kar li.

Rabiya ki walidah apne bete ki khaatir uske asaatzah par Maal-o-Daulat nichawar karne lagi aur unhein inamaat se nawazne lagi. Jab bhi yeh dekhte ke uska beta Maidan-e-Ilm-o-Adab mein chand qadam aage badha hai. Woh isi qadar Inam-o-Ikaram mein bhi izafah kar deti. Woh iske pardesi baap ki wapsi ka intezar karti thi aur is koshish mein thi ke beta bada ho kar aise maqam par fayez ho ke Awaam un naas ki rehnumai ka baayes bane. Jis waqt uska baap safar se wapis laute woh apna ba-adab, mohazzab taleem yaafta beta dekh kar bagh bagh ho jaye lekin iske khawand ki judai lambi ho gayi, Dil ke arman ansuoun mein behne lage.

Mukhtalif  khayaal araiyan hone lagin koi kehta dushman ke hathon qaid ho gaya hoga koi kehta nahi woh azad hai aur jihaad mein mashghool hoga, Maidan-e-Jihaad se wapis lautne wale kehte usne apni dili tamanna ke mutabiq Jaam-e-Shahadat nosh kar liya hoga. Umm Rabee’ ne is teesri baat ko tarjeeh di kyunke Arsa-e-Daraz se koi uski khabar na thi. Is judai ne uske dil ko pas murdah kar diya. Lekin usne Sabr-o-Shukar ke sath Allah ta’ala se sawab ki niyyat kar li.

Jab Rabee’ ne jawani mein qadam rakha, Khair khwahon ne iski walidah ko mashwarah diya Rabee’ ab likh padh chuka hai. Zarurat ke mutabiq itna hi kafi hai. Balke apne hum umaron se kahin aage hai, Aur is par mazeed woh Qur’an-o-Hadees ka hafiz bhi hai. Agar to iske liye koi pesha muntakhib kar le woh bohat jald is mein maharat paida kar lega phir woh munaafa se aap par aur apni zaat par kharch karne ke qabil ho sakega. Walidah ne yeh tajweez sun kar kaha: Allah ta’ala se dua karungi ke woh iske liye aisa kaam tajweez kar de jo uski duniya aur akhriat ke liye behtar ho phir Rabee’ ne apne liye ilm ko muntakhab kar liya aur usne musammam iradah kar liya ke zindagi bhar mut’ilm ya muallim ki haisiyat mein rahunga.

Rabee’ apney muntakhab raastey par baghair kisi kotaahi aur tasaahul kay gaamzan rahey aur in ilmi halqon ki taraf jin ki Masjid-e-Nabvi mein chehel pehel thi is tarah lapkey jaise koi pyasa meethay chashmey ki taraf lapakta hai aur in Sahabah-e-Kiraam  رضی اللہ عنھم ka daaman pakad liya jo abhi Baqiah hayaat thay, Aur in mein Sar-e-Fahrist Khaadim-e-Rasool ﷺ Hazrat Anas bin Maalik (رضی اللہ عنہ) thay, Taabieen kay pahley tabqey say bhi ilm haasil kiya jin mein Hazrat S’aeed bin Musaib, Makhool Shaami aur Salmah bin Deenaar Sar-e-Fahrist hain.

Maidaan-e-Ilm mein din raat ki musalsal mehnat ne usey jismaani taur par bohat kamzor kar diya tha. Aik saathi ne usey kaha: Pyare dost apney aap par zara rehem kijiye. Usney jawaab mein kaha: “Humne apney mashaa’ikh ko yeh farmatey huye suna hai ilm us waqt tak apna mamooli sa hissa bhi tumharey supurd nahi karega jab tak tum mukammal apna aap iskey supurd nahi kar dete”.

Din ka kuch hissa apney ghar mein guzaartey aur baaqi din Masjid-e-Nabvi kay ilmi halqon mein guzarta, Uski zindagi kay din isi tarah guzar rahey thay ke aik aisa waaqiya ronuma hua jiska unhein Wahm-o-Gumaan hi na tha.

Musam-e-Garma ki chaandni raat thi aik jangju shehsawaar hatheyaaron se lais, cah (6) hijri kay aakhari ayyaam mein Madina munawwarah aaya, Woh apne ghodey par sawaar Madina munawwarah ki galiyon mein apna ghar talaash kar raha tha. Woh yeh bhi nahi jaanta tha kay uska ghar maujood hai ya Hawaadsaat-e-Zamana ki nazar ho chuka hai kyun kay unhein apna ghar chod kar gaye. Taqreeban tees (30) saal beet chuke thay. Uskey nihaan khaana dil mein yeh tasawwar bhi jaaguzeen tha kay uski juaan saal biwi par is arsah mein kya guzri hogi? Kin mushkilaat ka usey saamna karna pada hoga? Bhala us bachhe ka kya bana hoga jo meri rawaangi kay waqt pait mein pal raha tha?

Khuda jaaney ladka paida hua ya ladki?

Woh zindah hai ya faut ho chuka hai?

Agar zindah hai to woh kis haalat mein hoga?

Aur us khateer raqam kya kya bana hoga jo maine Maal-e-Ghaneemat say haasil ki thi aur Samarqand-o-Bukhaara ko fatah karne kay liye Islaami lashkar kay hamraah rawaana hote waqt maine biwi kay supurd ki thi?

Madiney ki galiyon mein aane jaane walon ki chehel pehel thi log abhi Namaz-e-Ish’aa say faarigh huye hi thay lekin un aane wale logon se koi bhi usey pehchaanta na tha aur na hi usey koi ehmiyat deta tha, Aur na hi koi uskay ghubaar alood ghodey ki taraf Banazar-e-Ghaair dekhta tha aur na hi uskay kandhay par latakne waali talwaar ki taraf jhaankta hi tha.

Kyun kay islaami shehron kay baashindey un mujahideen say maanoos ho chukay thay jo Allah  ki raah mein jihaad ki gharz say Subah-o-Shaam aate jaate rehtey thay.

Lekin Madiney kay baasiyon ki bey parwaahi dekh kar shehsawaar kay Gham-o-Andoh mein izaafah aur khayalaat mein mazeed waswasay paida huye, Shehsawaar apne khayalaat mein mahw Madiney ki galiyon ka raasta talash karte huye chala jaa raha tha. Aakhir kaar woh apne ghar kay saamne pohncha ghar ka darwazah khula hua tha. Wafoor-o-Shauq mein Ahl-e-Khaanah say ijaazat liye baghair darwaazey say guzar kar ghar kay sehen mein aa khada hua jab ghar kay maalik ne darwaazay par kisi kay qadmon ki aahatt suni to balaai manzil say neechay jhaanka kya dekhta hai kay chaand ki raushni mein aik shakhs talwaar latakaye haath mein naiza thaamey ghar kay sehen mein khada hai aur uski naujawaan biwi us ajnabi shakhs ki nigaahon say qadrey door khadi thi. Yeh naujawaan ghusse say uchla aur nange paon yeh kehte huye tezi say neechey utra.

Arey Allah kay dushman tu raat kay waqt apne aapko chupaye huye mere ghar mein daakhil hua. Maloom hota hai tere iraadey ghalat hain woh is par is tarah jhapta jis tarah khoonkhwaar bhooka shair apney shikaar par jhapatta hai aur ajnabi ko baat karne ka waqt hi na diya. Donon aik doosrey say gutham ghutha ho gaye, unka Shor-o-Ghogha sun kar chaaron taraf padosi unkay ghar aa jama huye sab ne is ajnabi ko yun ghairey mein lay liya jis tarah kangan kalaai ko ghairey mein liye hota hai.

Is tarah un tamam ne apney padosi ki madad ki. Naujawaan Sahab-e-Khanah ne musaafir ki gardan ko mazbooti say apney giraft mein lay rakha tha aur ghussey say yeh keh raha tha Aye Dushman-e-Khuda Allah ki qasam! main tujhey yunhi nahi chhodunga. Balkay tujhey haakim kay paas lay jaunga.

Us shakhs ney kaha:

“Main Allah  ka dushman nahi aur na hi main ne kisi gunaah ka irtakaab kiya hai. Yeh mera ghar hai main iska maalik hun. Maine uska darwazah khula hua paya to andar aa gaya kya apney ghar aana jurm hai, Phir hazireen say mukhaatib hua aur kaha.”

“Aye meri qaum meri baat suno yeh mera ghar hai main ne khud isey khareeda hai. Mera naam Farrukh hai kya tum mein koi aisa shakhs nahi jo is Farrukh ko jaanta ho jo aaj say tees (30) saal pahley jihaad kay liye yahan say rawaanah hua tha, Naujawaan Sahib-e-Khanah ki waalidah soi hui thi Shor-o-Hangama sun kar bedaar hui baala khaaney ki khidki say neechay jhaanka to usay apna khaawand nazar aya jiski judai ne usey nidhaal kar rakha tha. Achanak is manzar ko dekh kar aisi dehshat taari hui daanton mein ungali dabaye tiktiki laga kar dekhti rahi phir buland awaz say kaha:

“Logon! Usey chhod do. Bete Rabee’ tum bhi usey chhod do. Yeh tera baap hai. Logon apney apney ghar waapis chaley jao. Allah  tumhara bhala kare. Phir apne khaawand sey mukhatib hui aur kaha. Aye Abu Abdul Rehman! Yeh tera beta hai! Tera lakht-e-Jigar hai. Tera Noor-e-Chashm hai. Jab yeh suna to Farrukh  Wafor-e-Musarrat say uchhal kar bete say baghal geer hua. Aur honhaar beta mohabbat say apney baap kay haathon, Gardan aur sar ko choomney laga, Log yeh manzar dekh kar hairaan reh gaye aur muskuratey huye apney gharon ko waapis chaley gaye. Umme Rabee’ baala khane say neechey utri apney khaawand ko salam kiya jiskey mutalliq usey yeh khayaal tha kay ab roye zameen par us say mulaqaat na ho sakegi kyun kay judai ko tees (30) saal guzar chukey thay aur is taweel judai mein koi khabar bhi to na mil rahi thi.”

Farrukh apni biwi kay paas baitha aur usey beetey huye dinon ki rawadaad sunane laga, Aur apney mutalliq ghar tak khabar na pohchaaney kay asli asbaab bayan karne laga. Lekin uski biwi yeh sab kuch bey khayaali mein sun rahi thi. Kyun kay us say mulaqaat aur baap kay apney bete ko Bachashm-e-Khud dekh lene ki khushi mein is khauf ki aamezish bhi shaamil ho chuki thi kay kahin mujh say isi majlis mein us khateer raqam kay mutalliq na pooch lain jo jatey waqt mere supurd kar gaye thay. Woh khayalaat ki duniya mein apney dil say keh rahi thi kay agar inhone us maal kay mutalliq pooch liya jo mere paas amaanat chod gaye thay aur yeh talqeen kar gaye thay kay main isey achey andaz mein kharch karun agar main ne inhein bata diya kay us mein say kuch baaqi nahi bacha to pata nahi kya Radde–Amal hoga? Agar main inhein yeh bata dun kay main ne tamam maal uske bete ki Taleem-o-Tarbiyat par kharch kar diya hai to kya yeh sun kar inhen khushi hogi ya tajjub? Kya mera yeh jawaab inkey liye kaafi hoga? Kahin ye ghusse mein na aa jayein kahin yeh dubara judai ka sadmah bardaasht karne kay liye mujhey akaila chod kar safar par rawaanah na ho jayein kya woh is baat ko bhi sach maan leinge kay is Lakht-e-Jigar baadal say bhi zyada sakhi hai?

Uske haath mein Dirham-o-Deenaar mein say kuch baaqi nahi rehta. Madiney ka bacha bacha jaanta hai ke usne Daairah-e-Islaam mein naye daakhil hone waalon par bey daraigh kharch kiya. Umme Rabee’ apney khayaalaat mein mustaghraq thi.

Khaawand ne uski taraf dekha aur kaha umme Rabee’ kya soch rahi ho? Kin khayalaat mein gum ho? Kaunsi bipta aan padi? Yeh dekho main char hazar (4000) dirham aur laya hun. Tum bhi woh dirham laao jo jaate waqt main tumharey supurd kar gaya tha, taakey is maal say hum baagh aur zameen khareed lein aur zindagi bhar uski aamdan say aasoodagi haasil karen. Woh yeh sun kar khamosh rahi aur usey kuch jawaab na diya. Farrukh ne biwi say dubarah kaha: Laiyye maal kahan hai taakey usey aik saath milaa dun.

Biwi ne kaha: Maine usey wahan rakha hai jahan uska rakhna munaasib tha in sha Allah chand din kay baad aap uskay samraat dekh lenge. Phir subah ki azaan ne inka Silsalah-e-Kalaam munqat’a kar diya. Farrukh wazu karne kay liye utha phir jaldi say darwaazey ki taraf gaya. Aawaz di Rabee’ kahan hai? Usey baataya gaya woh tahajjud ki azaan hote hi masjid chala gaya tha. Ahl-e-khanah ne kaha hamara khayaal hai ke ab aapko jama’at nahi milegi.

Farrukh masjid pohcha dekha ke Imam abhi thodi der pahley namaz padha kar faarigh hua hai, Unhone farz namaz adaa ki.Phir Rozah-e-Rasool par gaye Salat-o-Salam padha phir riyaazul Jannat ki taraf mude, Dil mein wahan namaz ada karne ka shauq tha. Uskay mo’attar aur nooraani maahol mein dil laga kar nafli namaz adaa ki aur gidgida kar duaen maangin. Jab masjid say jaane ka iradah kiya dekha ke uskey sehen mein aik aisi ilmi mehfil jami hui hai jo misaali no’iyyat ki thi aur us say pahle is qism ki majlis kahin nahi dekhi thi.

Log Sheikh-e-Majlis kay gird halqah bana kar baithe huye thay. Rash itna tha ke til dharne ki jagah bhi baaqi na thi. Usney Ahl-e-Majlis par aik taairanah nigaah daudai dekha ke us mein badi umar waley saron pay pagdiyan baandhe ba-adab andaaz mein baithe hain. Aur un mein aise log bhi hain jo ba-zaahir bade moazzaz dikhaai detey hain. Bohat say sanjeedah naujawaan qalam haath mein liye do (2) zaanon baithe Sheikh ki baat ko kaaghaz par is tarah qalamband kar rahey hain jaise kisi taaj par qeemti moti chune jaate hain, Woh apni copiyon mein Sheikh kay irshadaat ko is tarah qalamband kar rahey thay jaise umdah cheezon ko mehfooz kiya jata hai. Sabhi Sheikh ki taraf tiktiki laga kar dekh rahe thay is tarah khaamoshi, Adab-o-Ihtaraam aur kaamil tawajjo say bila Hiss-o-Harkat sun rahe thay jaise ke unkay saron par parinday baithe huye hon. Hazireen mein baat ko door tak pohchaane kay liye mukabbir Sheikh kay bayan ka aik aik jumlah ba-awaaz buland dohraa raha tha taakey door baithe huye ahbaab tak unki har baat aasani say pahuch jaye aur Ahl-e-Majlis mein say koi bhi kisi jumley say mehroom na rahe.

 Farrukh kay dil mein Sheikh-e-Majlis kay deedaar ka shauq paida hua lekin zyada faasla hone ki wajah say chehra saaf dikhaai na dey raha tha Sheikh ki khush bayani, Ilmi Riff’at, Hairat angaiz Quwwat-e-Haafizah aur logon ki be-panah mohabbat say uskay saamney Aajiz-o-Inkasaari ne iskey dil par goya jaadu kar rakha tha.

Thodi der baad Sheikh ne majlis barkhaast kar di aur uth khade huye. Hazireen-e-Majlis deewana waar uski taraf lapke, Unkay paas logon ki bohat bheed ho gayi. Mohabbat bhare andaaz mein unhein apney ghere mein le liya aur unhein alvida’a karne Masjid-e-Nabvi kay baahir tak unkay peeche gaye. Is mauqa par Farrukh ne apney paas baithe huye aik shakhs say poocha khudaara mujhey yeh to bata dein ke yeh buland paya Sheikh kaun hain?

Us shakhs ne tajjub say kaha: Kya aap Madina Munawwarah mein nahi rehtey?

Farrukh  ne kaha: Kyun nahi. Main Madina ka baasi hun.

Us shakhs ne kaha: Madiney mein aisa kaun hai jo is shakhs ko nahi jaanta.

Farrukh  ne kaha: Agar main usey nahi jaanta to mujhey ma’azoor samjhen kyun ke main tees (30) saal qabl jihaad kay liye Madina say chala gaya tha kal waapis lauta hun.

Us shakhs ne kaha chalo koi baat nahi. Aiyye mere paas baithiye main apko is Sheikh kay mutalliq batata hun. Jis Sheikh ka bayan aapne majlis mein suna hai yeh tabi’een kay sardaar aur Ummat-e-Muslimah kay bohat bade aalim aur nau umari kay bawajood Madiney kay muhaddis, Faqeeh aur Imam hain. Yeh sun kar Farrukh ne kaha: ma sha Allah nazar bad duar. Us shakhs ne apni baat jaari rakhtey huye kaha: Iski yeh majlis Maalik bin Anas, Imam Abu Haneefa, Yahya bin Sayeed Ansari, Sufyan Soori, Abdurrahman bin Umar Auzaa’i aur lais bin Saad  رحمة اللہ عليهم jaise akabireen ki yaad dilaaati hai.

Farrukh kuch kehne laga lekin us shakhs ne usey baat karne ki mohlat na di ke usney baat ko jaari rakhte huye kaha: In khoobiyon kay ilawah Sheikh khush ikhlaaq, Farishtah-e-Seerat, Munkasir ul mijaaz aur sakhaawat ka dhani bhi hai, Ahl-e-Madina ne insay badh kar koi sakhi nahi dekha aur na hi insay badh kar koi Muttaqi-o-Parhez gaar.

Farrukh ne kaha aap unki ta’reef hi kiye jaa rahe ho lekin abhi tak unka naam nahi bataya. Us shakhs ne baataya uska naam Rabee’ Al Raayi hai.

Farrukh ne tajjub say poocha Rabee’ Al Raayi!!

Usne kaha: Haan uska naam Rabee’ hai, Lekin Madiney kay Ulama’a wa mashayekh isey Rabiya Al Raayi kay naam se pukaartey hain. Unki ilmi Shaan-o-Shaukat kay kya kehne!

Jab Ulama-e-Madina ko kisi darpesh masle mein Qur’an-o-Sunnat say Sareeh nass nahi milti to woh unsey rujuo’o karte hain aur woh apney ijtehaad say uska aisa hal pesh karte hain. Jis se Ulama’a mutma’in ho jate hain. Farrukh ne poocha yeh kis ka beta hai? Us shakhs ne kaha: Yeh us mujaahid ka beta hai jiska naam Farrukh hai. Yeh uskay jihaad pay rawaana hone say chand maah baad paida hua tha.

Uski waalida ne uski Taleem-o-Tarbiyat par poori tawajjo di. Main ne abhi Namaz-e-Fajar say pahley kuch logon ki zubaani suna hai ke uska baap tees (30) saal kay baad guzishta raat Madina waapis aya hai. Yeh baat sun kar Farrukh ki aankhon say do (2) aansu tapke lekin yeh shakhs in aansuon kay girney ka sabab na jaan saka, Phir Farrukh jaldi say apney ghar pohcha. Biwi ne dekha ki unki aankhen aansuon se tar kyun hai? Koi aafat aan padi. Usne kaha ghabrayein nahi sab khair hai.

Aaj maine apne bete Rabee’ ki niraali shaan dekhi hai. Ye manzar dekh kar be intehaa khushi mein meri aankhon se aansu tapak pade. Aaj uske ilmi maqaam, Khush bayaani aur logon ki uske sath be panaah mohabbat ne mujhe ghaayel kar diya. Main kis qadar khush naseeb hoon ki mujhe buland maqam beta mila.

Umme Rabee’ ne iss mauqe ko ghaneemat jaante huye kaha. Mere sartaaj aapko in do cheezon mein kaunsi cheez zyada Mahboob-o-Marghoob hai? Teees Hazar (30,000) Dinar ya apne bete ka Ilm-o-Fazal mein ye buland maqaam?

Usne kaha: Allah ki qasam! Mujhe poori duniya ke maal se zyada apne Lakht-e-Jigar ka ye maqaam qeemti aur mahboob dikhlayi deta hai. Biwi ne kaha jo maal aap mujhe Bataur-e-Amaanat de gaye the vo maine uski Taaleem-o-Tarbiyat par kharch kar diya hai, kya aap is se khush hain?

Farmaya: haan! kyu nahi. Mujhe is se bohot khushi huyi hai. Allah Ta’ala aapko meri, Mere bete aur tamam musalmaanon ki jaanib se Jaza-e-Khair ata kare.

Hazrat rabee’a bin Farrukh Al Ray ke mufassal Halat-e-Zindagi maloom karny ky liy darj zeel kitabon ka muta’alh karen:

1: Tazkirat ul Huffaz                                                          1/148 2: Hilyat ul Awliya                                                              3/259 3: Sifat ul Safwah                                                                2/83 4: Zail ul Mizyal                                                                     101 5: Tarikh-e-Bhagdad                                                      8/420 6: Meezan ul Aitidal                                                           1/136 7: Al Taaj                                                                                 10/141 8: Wafayat ul Aayan                                                          1/138 9: Tarikh-e-Tabari                                                               jild 10 ki fahrist dikhiy

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer