Hazrat Abdul Rahman Bin Abdullah Al Ghafiqi (رحمہ اللہ)

Quran-o-Hadees kay maahir Jood-o-Sakhaa kay Mehr-o-Wafa Jurrat-o- Shuja’at aur Fahm-o-Faraasat kay paikar, Maidan-e-Jihaad kay aik aazmoodah kaar General aur Shoq-e-Shahaadat ka be paayan jazbah rakhnay waalay aik azeem mujahid. (Al Maorkhoon)

Paanchwe Khalifah Rashid Ameer ul Momineen Hazrat Umar Bin Abdul Azeez عليه الرحمہ ne apnay paish ru Suleiman bin Abdul malik ko Sapurd-e-Khaaq karnay kay ba’ad Inaan-e-Iqtadaar sambhaltay hi waaliyan-e-Hukkum ka jaizah liya, Un mein say chand aik ko m’aazool kar diya aur un ki jagah munaasib afraad ki ta’eenaati kay ahkamaat jaari kiye jinhein nai tarraqi ka parwaana mila. Un mein say Hazrat Samah Bin Maalik Khoolaani ko Andlus aur France kay Gird-o-Nawah kay ilaaqa jaat ka governor muqarrar kiya woh naye mansab par faaiz hotay hi aisay afraad kay intekhab mein Ghaur-o-Khoz karnay laga jo Sidq-o-Safa Meher-o-Wafa aur Jood-o-Sakhaa kay paikar hon, Jurrat-o-Shuja’at ki mujassmah tasweer nazar aatay hon unhon ne is hawaalay say Ghaur-o-Khoz kartay huye apnay saathiyon say dariyaft kiya keh kya ab is ilaaqay mein koi taab’ee maujood hai? Tamaam hamnasheenon ne bayak zubaan kaha haan!

Ameer mohtaram aik Jaleelul Qadr taaba’ee Hazrat Abdul Rahman Bin Abdullahul Ghafqi baqaid hayaat hain woh baday Aamil-o-Faazil, Quran-o-Hadees kay maahir Faham-o-Farasat kay paikar Maidaan-e-Jihaad kay aik aazmoodah kaar General aur Shoq-e-Shahaadat ka jazbah be payaan rakhtay hain, Aik azeem mujahid kay roop mein zindagi kay din dili itminaan say guzaar rahay hain. Unhein duniyawi Maal-o-Manaal aur Jaah-o-Jalaal say qat’an koi dilchasapi nahi unhein Jaleelul qadar Sahaabi Hazrat Abdullah Bin Umar bin Khattaab رضی اللّٰہ عنه ki ziyarat ka sharf haasil hua, Un say faiz haasil karnay ki s’aadat mayassar aayi aur un ka Tarz-e-Hayaat apnaanay mein Darja-e-Kamaal ko pohchay.

---

Ameer-e-Andlus Samah Bin Maalik Khoolaani ne Hazrat Abdul Rahman Ghafqi رحمہ اللہ ko mulaqaat kay liye dawat di, Aap tashreef laaye to un ka waalehaana istaqbaal kiya, Mohabbat bharay andaaz mein Khush aamdeed kaha, Apnay paas bithaya deeni masaail dariyafat kiye pechida siyaasi masaail ko hal karnay kay liye mashwara talab kiya, Tabaadlah-e-Khayaal par unhein pata chala keh yeh azeem shakhsiat to us say kahin badhkar hai jo un kay mut’alliq bataya gaya unhein apni salaahiyaton ki buniyaad par kisi baday ahem ohde par fayez hona chahiye, Yeh khayaal aatay hi unhein Andlus ki kaleedi aasami par fayez honay ki pesh kash kar di yeh sun kar Hazrat Abdul Rahman Ghafqi رحمہ اللہ ne kaha: Aye Ameer mohtaram main aik aam ma’amooli aadmi hoon. Main yahan Diyar-e-Ghair mein sirf sarhadi ilaaqe mein pehra denay ki gharz say aaya hoon takeh dushman ko sar Zameen-e-Islam ki jaanib jaarhaana iqdaam say roka jaa sakay.

Main to sirf Allah Subhana Wa Ta’ala ki raza ka khwahan hoon, Main ne Allah kay paighaam ki sar bulandi kay liye talwaar ko thaama hai. Allah kay Fazal-o-Karam say main aap ka us waqat tak saaye ki tarha saath doonga jab tak aap Allah aur Rasool-e-Aqdas ﷺ kay ita’at guzaar hain main aap kay har hukm ki taa’meel karoonga, Kisi ohde, Kisi mansab yaa Amaarat-o-Siyadat say koi gharz nahi aur na hi meray dil mein is qism ka koi shoq hai.

---

Thoday hi arsay ba’ad Samah Bin Maalik kholani ne France ko fatah kar kay usay Saltanat-e-Ilsaamiah ki ladi mein pironay ka pukhtah iraadah kar liya takeh yahan say Europe kay Janub-o-Sharq mein waaqia aham tareen mumaalik Rumiah, Albania, YoGo, Saladiyah, Bulgaria, Turkey aur Yunaan tak pohchany ka raastah bana diya jaaye aur is tarhan Qustuntunia par qabzah kar kay Rasool-e-Aqdas ﷺ ki peshangoi kay mutaabiq behtareen lashkar aur behtareen imaarat ka ai’zaaz haasil kiya jaaye, Yeh azeem tareen hadaf haasil karne kay liye zaroori tha keh France kay bohat baday aham tareen sheher Arlona ko sarnagoon kiya jaaye, Arlona France ka bohat bada sarhadi sheher tha difaa’ee aitebaar say usay badi ahmiyat haasil thi, Jab musalmaan silsilah-e-Kohistaan par nasheeb ki taraf say utarnay aur France mein daakhil hona chahtay to sab say pehlay sheher Arlona hi saamne aata hai is sheher ko sar Zameen-e-France ka darwaaza tasawwur kiya jata hai. Mumlikaat-e-France say dilchasapi rakhnay waalon kay nazdeek sheher Arlona ko badi ahmiyat haasil thi.

---

Samah Bin Maalik Khoolaani ne Arlona sheher ka muhaasra kar liya us kay baashindon say kaha: Islam qabool kar lo warna jizia denay kay liye tayyaar ho jaao. Ahl-e-Arlona ko yeh badi nagawaar guzri unhon ne jizia denay say saaf inkaar kar diya Lashkar-e-Islam ne un par taabad tod hamlay shuru kar diye bedaraigh top ka golay barsaanay shuru kar diye aik gola un kay badan mein pewast ho gaya jis say chakraa kar ghoday sey gir paday aur girtay hi Jaam-e-Shahaadat nosh kar gaye.

Jab musalmaanon ne apnay general ko Khaak-o-Khoon mein lat pat dekha to un par gham kay pahaad toot paday, Mujahidon ki safon mein intishaar  paidah honay laga, Lashkar-e-Islam kay aik azeem jawaan mard bahadur aur nidar sipaahi jo aagay chal kar askari tareekh kay azeem general Abdul Rahman Ghafqi kay naam say mashoor huye aagay badhkar Lashkar-e-Islam ko sambhaala diya Hikmat-o-Danaai aur zahaanat aur tajurba ko baroy kaar laa kar lashkar ki qiyadat ka fareeza nihayat khush asloobi say sar anjaam detay huye puray lashkar ko bacha kar wapis Hispania lay jaane mein kaamyab ho gaye takeh dobaara taazah dam ho kar aur puri tayyaari kay saath France par hamlah kiya jaye.

---

Kya tum jaante ho keh Andheri raat mein maah kaamil kay chehray say siyah baadal kaise chatay? Tareek raahon mein raushni kesay namudaar hui? Thakay huye raahiyon ko qandeel ki raushni say apni aankhon ko khaira karnay ka kis tarhan mouqa mayassar aaya? karkadaati dhoop mein tilmilaatay sehra ki tapti hui rait par pyaas say taraptay huye afraad ko apni jaan bachaanay kay liye thande paani ki chamak kaisay dikhaai di? dar haqeeqat unhein hayaat bakhsh kiran azeem general Hazrat Abdul Rahman Ghafqi ki surat mein dikhayi di, Tamaam Mujahideen ne un kay haat par bai’t ki.

Jab musalmaanon ne Europe mein qadam rakha to yeh ma’arkah un kay liye gehra zakham tha lekin Hazrat Abdul Rahman Ghafqi ne apni wus’at zarfi, Khushada dili, Fayyazi, Sakhaawat aur mohtaat andaaz ko baroye kaar laatay huye is paspaai kay gehray zakham ko mundamil karnay kay liye bohat aham kirdaar ada kiya.

---

Sar zameen-e-France mein Lashkar-e-Islam ko pesh aanay waali shikast ki ghamnaak khabron say Mumlikat-e-Islamia kay daarul khalifa Damishq mein baichaini ki leher daud gayi aur azeem bahadur general Samah Bin Maalik Khoolaani ki shahaadat ka badlah lenay kay liye daarul Khalifa Damishq say Hispania mein Islami fauj kay naam parwaana jaari kiya gaya, Tamaam fauj pehli fursat mein Abdul Rahman Ghafqi kay haat par bai’t kar kay usay apna Ameer tasleem kar kay unhein markaz-e-Islam ki jaanib say puray Andlus ka Ameer naamzad kar diya gaya hai aur isi tarhan sar zameen-e-France kay maftuha ilaqajaat kay ikhtiyaraat bhi unhein kay sapurd kar diye gaye aur unhein ikhtiyar de diya gaya keh apni swabdeed kay mutaabiq jis tarhan munaasib samjhein pesh qadmi ka mansuba tarteeb dein. Hazrat Abdul Rahman Ghafqi baday danish mand, Jurrat mand, Muttaqi parhaizgar aur azm-e-Raasikh kay paikar thay.

---

Jab Abdul Rahman Ghafqi رحمہ اللہ ne Andlus ki amaarat kay ikhtiyaraat sambhaltay hi lashkar-e-Islam kay har sipaahi kay dil mein khud aitemaadi, Izzat-e-Nafs, Khuddaari, Taaqat aur ghalbah haasil karnay kay azaaim paidah karnay ki tehreek shuru ki takeh woh bada hadaf haasil karne kay liye raastah hamwaar kiya jaaye jo Andlus mein musalmaanon kay qaaideen Musa Bin Naseer say lay kar Samah Bin Maalik Khoolaani tak Pesh-e-Nazar tha. Un bahadur qaaideen ne Deen-e-Islam ka jhanda France say Italy, Germany aur Qustuntuniah tak lehra diya aur Behra-e-Beez ko Behra-e-Islamia mein badal diya aur un ka naam Behr-e-Room ki jagah Behr-e-Sham rakh diya.

---

Hazrat Abdul Rahman Ghafqi baday ma’arkah sar karnay kay liye Tazkiyah-e-Nafs par yaqeen rakhtay thay aur unhein is baat par pukhtah yaqeen tha keh koi qaum us waqt tak dushman par ghalbah haasil nahi kar sakti jab tak woh androoni aitebaar say Mahfooz-o-Mamoon na ho unhon ne puray Andlus ka daura kiya aur sheher mein munaadi karwa di agar ri’aaya kay kisi bhi shakhs par kisi bhi Judge, Governor ya kisi bhi shakhs ne koi ziyadti yaa zulm kiya us ki shikayat mujh tak pohchaye.

Yaad rahay keh musalmaan aur zimi aur dono bilaa rok tok apni shikayat Ameer Andlus tak pohcha saktay hain phir unhon ne aik aik shikayat ka baghor jaaiza liya, Bilaa takheer haqdaar ko us ka haq de diya gaya. Mazloom ki daadrasi ki gayi, Kamzor ko taqatwar kay muqablay mein tarjeeh di gayi phir woh tamaam girjay jo nasara say zabardasti cheen liye gaye thay woh wapis kiye woh tamaam aurtain jo rishwat say banaai gayi thein unhein giraa diya gaya. Hakumat kay kaarindon ka jaaiza kiya jis ki khayaanat saabit hui usay m’aazool kar diya aur us ki jagah kisi doosray danishmand aur baa silaahiat afsar ki ta’eenaati ka hukm saadir kiya.

Junhi kisi sheher mein waarid hotay tamaam baashindon ko aik Masjid mein jama’ honay ka hukm detay, Namaz say faarigh ho kar logon ko khitaab karnay kay liye khaday hotay unhein jihaad ki targheeb detay, Raghbat dilaatay, Allah Subhana Wa Ta’ala ki raza aur Ajar-o-Sawaab haasil karne ki talqeen kartay.

---

Hazrat Abdul Rahman Ghafqi ne Andlus ki imaarat kay faraiyz sambhaltay hi Qoul-o-Fail ki yaksaaniat ka muzaahira kiya, Ummeedon ko amaal say mehmeez kiya, Faraiz-e-Mansabi sambhaltay hi foj ko hathiyaaron say lais karnay ki taraf tawajjah di aur isi tarhan pahaadon ki chotiyon par morchon ko durust karne ka kaam shuru kiya, Qila’ banaanay mein dilchasapi li, Dariyaaon aur nehron par pul banaye, Sab say bada pul Andlus  kay daarul hakumat Qurtaba kay dariya par ta’meer kiya gaya tha, Yeh Fann-e-Tameer ka shahkaar tha, Sailaab say sheher ko bachaanay kay liye dariya kay pushtay pukhtah ta’meer kiye gaye, Yeh pul duniya kay ajayebaat mein shumaar kiya jaanay laga us pul ki lambaai aath sau ghaz, Bulandi saath ghaz aur chaudayi bees ghaz, Is mein athaarah adad daatein daali gayein aur us kay unnees satoon banaye gaye.

Yeh pul us daur mein Ajuba-e-Aalim aur Fann-e-Tameer ka shahkaar tasawwur kiya gaya hai.

---

Ameer-e-Andlus Hazrat Abdul Rahman Ghafqi jis sheher mein waarid hotay lashkar kay qaaideen aur qaum kay sardaaron say zaroor mulaqaat kartay, Un ki baat ghor say suntay un ki tajaaviz ko ahmiat detay baqaidah zabt tehreer mein lay aatay aur un ki nasihat amaiz guftagu say bhar poor istafadah kartay, Un majaalis mein yeh boltay kam thay aur un ki suntay ziadah thay. Aur aisi tarah Hazrat Abdul Rahman Ghafqi muslim aur zimi har do tabqaat kay aham tareen shakhsiaat say mulaqaat kartay, sar Zameen-e-Andlus mein pesh aanay waalay waqiyaat say agaah rehnay ki puri koshish kartay.

---

Aik dafa ka zikar hai, Hazrat Abdul Rehman Ghafqi ne France ki aik aham tareen shakhsiat ko mad’oo kiya us say mukhtalif masaail par tafseeli guftagu kartay huye pucha keh aap kay general Martar ka kya haal hai?

Na woh khud hamaaray muqablay mein aata hai aur na hi hamaaray muqablay mein aanay waalay sardaaron ka saath deta hai us ne Adb-o-Ahtraam ka muzaahira karte huye arz kiya: Ameer mohtaram aap hamaaray saath Husan-o-Salook say pesh aaye har waade ka kamaal Wafa-o-Mohabbat say paas rakha.

Ab hamara bhi yeh farz hai keh aap say har baat sach sach keh dein aur kisi baat ko Seegha-e-Raaz mein na rakhein, Bilaa shuba aap kay azeem qaaideen Musa Bin Naseer ne kamaal Hikmat-o-Jurrat say tamaam Hispania par qabzah kar liya, phir Silsilah-e-Kohistaan Barnia ko aboor kartay huye aagay badhay, Yeh pahaad Andlus  aur hamaaray khubsurat mulk kay darmiyan haail hai, Riyaasaton kay sarbarah aur hukkaam hamaaray hukmaran Sharal ki khidmat mein haazir huye un say kaha:

Janaab Aali!

Yeh kaisi ruswaai hamaaray muqaddar mein aayi hai, Is say to hamaari naslain bhi hamesha kay liye pispaai ka shikaar ho jayengi, Ham pehlay sirf musalmaanon kay baaray mein suna kartay thay keh woh maghrib ki jaanib say ham par hamlah karain gay lekin unhon ne mashriq ki jaanib say ham par chadhai ki, Saaray Hispania ko apnay qabzay mein lay liya jo kuch bhi us mein tha us par mukammal qaabiz ho gaye, Pahaadon ki chotiyon par bhi unhon ne qabzah jamaa liya, Halankeh woh taa’dad mein thoday hain un kay paas hathiyaar bhi puraane hain un mein say aksar kay paas dirah bhi nahi jis par talwaar ka waar rok saken.

Aur na hi umdah ghoday hein jin par sawaar ho kar Maidan-e-Jung mein asaani say utar sakaen un ki baatain sun kar hamaaray hukmaran ne kaha main ne is Surat-e-Haal par bohat gaur kiya hai badi soch vichaar kay ba’ad main is natijay par pohchna hoon keh is qaum ka muqablah na kiya jaaye, Yeh aik sael rawaan ki tarhan aagay badh rahi hai is kay raastay mein jo bhi aaye ga usay Khas-o-Khashaak ki tarhan bahaa kar lay jayegi. Yeh qaum aik aqeedah aur a’alaa maqaasid ki haamil hai yeh donon khoobiyan kisi bhi qaum ko Baam-e-Urooj par pohcha deti hain.

Imaan-o-Sadaaqat is qaum kay liye dirron aur ghodon kay qaaim maqaam hai, Meri raye mein unhein apni dhun mein aagay badhnay do, Ghanaaem say apni tijoriyan bhar lenay do apnay liye bade gharon aur mehlaat par qabzah jamaa lenay do, Us kay ba’ad aik waqt aisa aayega yeh qiyaadat haasil karne kay liye aik doosray par haawi honay ki koshish karengay, Jab is aqwaam par aisa waqt aayega to phir badi asaani say aur thodi si koshish say in par qaabu paaya jaa sakega, Yeh baatain sun kar Hazrat Abdul Rahman Ghafqi ne thandi saans li aur namaz mein mashghool ho gaye.

---

Hazrat Abdul Rehman Ghafqi musalsal do saal tak aik baday ma’arkay mein shirkat kay liye bhar poor tayyaari mein masroof rahay, Lashkar tarteeb diye lashkar ko keel kaanton say lees kiya har aik ki himmat badhaai, Dilon mein hoslay aur hoslon mein jaan paidah ki.

Africa kay Ameer say taazah dam fauj aur Jazba-e-Jihaad aur Shoq-e-Shahaadat say sarshaar foj bhejnay ka mutaalbah kiya aur sarhadi ilaaqe kay Ameer Usman Bin Abi Nas’ah ko paighaam bheja keh taabar tod hamlaon say dushman ko aagay badhnay say rokay lekin sarhadi Ameer Usman kay khayalaat kuch aur hi thay. Us ka seena bughaz aur hasad say bhara hua tha. Woh har azeem ul himmat aur a’alaa maqaasid kay haamil Ameer ko Hasad-o-Bughz ki nigah say dekhta aur yeh har woh kaam karta jis say us ki shohrat mein izaafa ho aur doosron ki gumnaami ka baa’is ho aur us par mustazaad yeh keh aik hamlay mein Sooba Iktaania ka hukmaraan ki beti usay haath lagi jis ka naam “Hanis” tha woh nazuk andaam pari pekar thi woh Husan-o-Jamaal ka aik nadir namuna thi. Fitna taraaz aur taqwa shikan husan kay saath saath usay shehzadi honay ka aizaaz bhi haasil tha. Us kay dil ko shehzadi ki mohabbat ne jakad liya aur us kay dil par aisi chhayi jis ki misaal aaili zindagi mein nadir hi milti hai. Us ne apni mohabbat kay jaal mein phansa kar sarhadi Ameer ko apnay baap kay saamne sarnagoon kar diya aur us say yeh tehreeri muaahida kiya keh un kay ilaaqay ki taraf pesh qadmi say rokay rakhay.

Jab say Ameer Andlus Hazrat Usman Ghafqi ka Iktania kay hukmaraan ki Zair-e-Kamaan ilaaqay par hamlah karnay ka hukm mila to us kay haathon kay totay udd gaye, Yeh aisa hawaas baakhtah hua aur usay kuch sujhaai na de raha tha keh ab kiya karay na jaye raftan na paay maand. Soch-o-vichaar kay ba’ad us ne Ameer Andlus ki khidmat mein khat likha keh aap hukm mein nazar saani karein kyunki meray liye Iktania kay hukmaraan, kay saath kiya gaya—– Pehlay say muaahida todna mushkil hai, Yeh khat dekh kar Hazrat Usman Ghafqi ghussay se musht’al ho gaye aur us ki taraf yeh paighaam de kar qaasid bheja.

Aik firangi kay saath apnay Ameer ki ijaazat kay baghair jo muaahida kiya us ki koi haisiyat nahi, Meray hukm ko tumhary liye baghair kisi Heel-o-Hujjat kay maanna azbas zaroori hai, Usman Bin Abi Nas’ah ko yakeen ho gaya keh yahan koi harba kaargar saabit nahi ho sakta to us ne Iktania kay sarbrah ko Surat-e-Haal say aagah kar diya aur yeh paighaam diya keh ahtiyaati tadabeer ikhtiyar karay.

---

Hazrat Abdul Rahman Ghafqi رحمہ اللہ ne apnay jasoos bhej rakhay thay jo Usman ki Harkaat-o-Saknaat par kadi nigah rakhay huye thay, Unhon ne sarhadi Ameer ki Millat-e-Islamia kay dushman kay sath mulaqaat aur us kay saath saaz baaz ko tasht azbaam kar diya.

Hazrat Abdul Rehman Ghafqi رحمہ اللہ ne tajarbah kaar mujaahideen ka qaafilah us ki sarkubi kay liye rawaana kiya aur unhein hukm diya keh Usman ko zindah yaa murdah haalat mein us kay paas laaya jaye.

---

Mujaahideen ka qaafilah Usman Bin Abi Nas’ah ki chaaoni mein daakhil hua lekin usay qaafilay ki aamad ka pehlay say ilm ho chuka tha, Woh apni Fransi hasina aalim biwi aur body guard amlay ko lay kar pahaad par chadh gaya, Apni Haseen-o-Jameel biwi Meena ko woh aik pal bhi khud say juda na karta tha us ki duniya aabaad hi us kay dam say thi Islami lashkar us kay peechay ho liya aur thodi hi door jaa kar usay aur us kay saathiyon ko gheray mein lay liya, Us ne apna aur apni biwi ka difa is tarhan kiya jis tarhan khoonkhwar sher apnay bachon ki hifaazat kay liye madaf’at karta hai. Woh apni biwi ki dhaal ban kar lashkar kay saamnay khada ho gaya aur aakhir kaar zakhmon say choor ho kar neechay gir pada aur neechay girtay hi dam tod gaya, Us kay jisam par Teer-o-Tafang kay beshumar zakham lag chukay thay us ka sar jisam alag kar liya gaya biwi ko hiraasat mein lay liya, Yeh dono cheezen Hazrat Usman Ghafqi ki khidmat mein pesh ki gayeen, Mosoof ki jab nigah shehzadi par padi to nazrein jhuka lein aur ghairat imaani say apna chehra doosri taraf phair liya aur usay Maal-e-Ghanimat kay saath daarul hakumat Damishq bhej diya, Wahan yeh Francesi shehzadi amwi Khalifah kay aqad mein aa kar apni zindagi kay aarzi din aasuda haali say guzarnay lagi.

---

Suzi naami aik angrez shaair Islami lashkar ki ta’reef kartay huye likhta hai: Yeh woh azeem ul shaan lashkar hai jis ne Andlus  fatah karnay kay ba’ad Europe par chadhaai ki jis mein Arab, Barbar, Romi, Tatari, aik jhande tale yakjaan dikhaai detay thay, Raasikh aqidah sab ko aik ladi mein piroye hua tha, Imaani ghairat mein Islami akhwaat aur deeni jazbay say sarshaar insaanon ka Qaabil-e-Rashk giroh Europe ki sar zameen mein is say pehlay kabhi na dekha gaya tha. Maidan-e-Jung mein fatah haasil kar lenay kay ba’ad lashkar-e-Islam ka general  aik aam sipaahi ki maanind Allah Ta’ala ki nusrat par yakeen rakhta aur fatah kay nashay mein sarshaar honay ki bajaae Allah kay Hazoor Sajdah-e-Shukar bajaa laane ko tarjeeh deta.

Lashkar mein shaamil tamaam sipaahi dushman par ghalbah haasil kar lenay kay bawajood nakhwat aur takabbur ki bajaae aajizi aur inkasaari ka muzaahira kartay.

Maidaan-e-Kaar zaar mein intehaai jaddo jehed aur ma’arkah aarai kay bawajood woh har waqat taazah dam hi dikhaai detay thay, Kabhi un kay Paaya-e-Istaklaal mein zarra barabar bhi koi larzish paida na hoti, Un ki taaqat, Jurrat aur bahaduri sada bahaar thi.

Is baat par un ka kaamil yakeen thaa keh jab bhi woh dushman ki taraf pesh qadmi karain gay Allah ki madad aur taaid un kay shaamil haal ho gi aur un ki Khudadaad taqat aur salahiyat hamesha unhein aagay badhnay mein madad degi yahan tak keh maftuha Europi ilaaqay mashriqi ilaqajaat ki maanind ho jayenge. Angrez shaair likhta hai keh main ne is baat ka bhi mushahidah kiya hai keh naam Muhammad ﷺ par musalmaanon kay sar fauran aqeedat say jhuk jaatay hain.

Yeh hasrat angez muzaahira bhi dekhnay mein aaya hai keh aik musalmaan Hajj karne kay liye qatab shumaali ki yakh Basta hawaaon say nikal kar Jazbah-e-Imaan say sarshaar sehraye Arab ki tapti hui rait par qadam rakhta hua apnay naseeb par rashak kunaan hai aur Makkah mu’azzmah ki garam tareen chattaanon par theherna apnay liye baa’is sa’adat samjhta hai.

---

Aye haqeeqat pasand shaair tum theek hi to kehtay ho tum ne bilashubah asbiat say baala tar ho kar haqeeqat ki tarjumaani ki hai yeh Islami lashkar teray khoobsurat ilaaqay mein isi liye to waarid hua thaa keh teray Abaa-o-Ajdaad ko gumraahi ki tareeki say nikaal kar hidayat ki roshan shah raah par gaamzan kar de, Yeh jazbah-e-Imaan say sarshaar mujaahideen mehez Allah ka paighaam sunaanay kay liye door daraaz ilaaqon tak pohchay unhon ne jis taraf bhi munh kiya seel rawaan ki tarhan Khas-o-Khashaak ko baha kar lay gaye. Is lashkar-e-Jaraar mein Hijaaz, Najad, Yaman balkeh Jazeera numaay Arab ki har jagah kay log Shareek-e-Safar thay.

Un mein Barbar bhi thay jinhein Islam ne sar buland kar diya thaa woh Koh-e-Itlas ki choti say tumhaari taraf seel rawaan ki tarhan badhay un mein Irani bhi thay jinhon ne Shahaan-e-Iran ko pooja paat say mutnafir ho kar deen Tauheed ko apnay seenon say laga liya aur woh Siraat-e-Mustaqeem par gaamzan ho chukay thay. Un mein Romi bhi thay jo zulm ki taariki aur jahaalat ko chod kar Arz-o-Samaa kay noor ki taraf aaye aur woh deen qayyam ka daaman thaam kar Aman-o-Sakoon aur aashti ki zindagi basar karne lagay.

Un mein Qabti bhi thay jinhon ne Shahaan-e-Rome ki bandagi ka qalada apni gardanon say utaar diya thaa aur yeh Islam ki panah gaah mein aa kar apnay aap ko asooda haal samjhnay lagay. Haan yeh Islami lashkar jis ki qiyadat Hazrat Usman Ghafqi aur un kay aslaaf ne ki yeh sirf teray Abaa-o-Ajdaad ko hi to jaahilyat ki ataah taarikion say nikaalnay kay liye sar zameen Europe mein daakhil hua tha. Us lashkar mein goray bhi thay aur kaaly bhi thay aur Ajmi bhi lekin woh sab Islam ki kuthaali mein par kar Kundan ban chukay thay aur woh Allah kay Fazal-o-Karam say aapas mein bhaai bhaai ban chukay thay.

Janaab shaair jesa keh tum ne haqiqat pasandana tabsarah kiya hai waqayi un ka asal maqsad ahle Europe ko Daaira-e-Islam mein daakhil karna tha jesa keh unhon ne ahle Mashriq ko musharraf Islam kiya tha, Woh roye zameen kay tamaam insaanon ko parwardigaar aalim kay saamnay jhuka dena chahtay thay. Un ka hadaf yeh thaa keh Islam ka noor Europe ki tamaam waadion say Nasheb-o-Faraaz mein aam ho jaaye, Islam kay suraj ki kirnon ki zufashaani sar zameen Europe ki tareekion ko raushni mein badal de. Islam Adal-o-Insaaf ki barkaat ko har Aam-o-Khaas mein pohcha diya jaaye. Unhon ne yeh azm musammam kar rakha thaa keh tumhary khoobsurat aur Naram-o-Naazuk jisam ko Jahannum ki aag say bacha liya jaaye aur is azeem maqsad kay liye apni jaanon kay nazraanay bhi pesh kiye.

---

Ab zara is azeemul shaan Islami lashkar aur us kay jawaan mard bahadur general Hazrat Abdul Rahman Ghafqi رحمہ اللہ ki dastaan khoonchkaan bhi sun lijiye.

Hua yeh keh Shah Iktania ko apnay damaad Usman Bin Abi Nas’ah kay qatal aur apni Haseen-o-Jameel aur laadli beti kay anjaam ka ilm hua to woh is natijay par pohcha keh ladai ka tabal baj chuka hai aur usay yakeen ho gaya keh Islami lashkar ka general hamaaray ilaaqay par hamlah aawar hone kay liye subah aaya yaa shaam to us ne apni sar zameen kay chappay chappay ki hifaazat karnay ka iraadah musammam kar liya aur apni mumlikat aur ri’aaya kay difaa’ kay liye mustad ho gaya, Usay yeh andesha laahaq tha keh aakhir kaar mujhe qaidi bana kar Damishq  bhej diya jaaega jaise meri beti ko haank kar wahan pohchaya gaya hai yaa phir mera sar tasht mein rakh kar Damishq kay bazaaron mein Nishaan-e-Ibrat kay taur par ghumaaya jaayega jaise keh mujh say pehlay Hispania kay hukmaraan ka sar kaat kar Damishq kay bazaaron mein nezay ki ani mein atkaa kar lehraaya gaya aur logon ne hairat, Ta’ajjub aur nafrat kay milay julay jazbaat say us ka bachasham khud mushahidah kiya.

---

Ma’arkah Toluz mein azeem general Samah Bin Maalik Khoolaani shaheed ho gaye aur un ki shahaadat say muslaman ranjida khaatir huye, Be intehaa gham aur preshaani ki wajah say mujaahideen ki safon mein kamzori kay asaar numayan nazar aanay lagay, Is mauqa ko ghanimat jaantay huye Aaral sheher kay baashindon ne jizia ada karne say saaf inkaar kar diya aur millat-e-Islamia kay hukmaraan ki ita’at karnay say saaf inkaar kar diya aur millat-e-Islamia kay hukmaraan ki ita’at say dastakash ho gaye.

Jab azeem general Hazrat Abdul Rahman Ghafqi lashkar-e-Islam ki qiyadat kartay huye Aaral sheher ki faseel kay paas pohchay wahan yeh manzar dekhnay mein aaya keh Shah Iktania apna laao lashkar lay kar muqablay kay liye maujood tha, Phir donon lashkar aamne saamne aaye, Donon kay darmiyan ghamasaan ka ran pada, Islami general  Abdul Rahman Ghafqi ne Maidaan-e-Jang mein aise jatthay utaaray jinhein maut is tarha azeez thi jis tarhan dushman ko Zindagi kay saath piyary hai, Un kay zordaar hamlay say dushman kay paaon ukhad gaye, Mujahideen ne dekhtay hi dekhtay dushman ki safon ko cheer daala, Deewana waar ladtay huye dushman ki gardanein udaatay huye sheher mein daakhil huye, Dushman paspaa hua aur mujaahideen ko bohat sa Maal-e-Ghanimat haath laga, Shah Iktania mauqa paa kar jaan bachaata hua baaqi mandah lashkar lay kar maidaan say bhaag niklaa takeh dobaara puri tayyaari kay saath lashkar-e-Islam ka muqablah kar sakay, Us ne socha yeh koi aakhri ma’arkah nahi abhi to Ibtida-e-Ishq hai jaan bachi to laakhon paye, Behter yehi hai keh filhaal musalmaanon ki zarab hedri say apni gajar mooli jaisi naram naazuk gardanein bachaai jaayen aagay dekhein gay phir kya hota hai?

Ham do bada kham thonk kar maidaan mein aise aayen gay keh musalmanon ko pata lag jayega, In ki aisi taisi, Chalo bhaago yahan say, Jaan bacha kar haan tumhein mein ne keh diya na meray azeez saathiyon meray raaj dulaaro, Chalo shabaash jaldi chalo warna hashar barpa ho jaayega, Hazrat Abdul Rahman Ghafqi ne apnay lashkar jarrar kay hamrah Dariya-e-Doon ko aboor kiya aur Suba Iktania ko daayen aur baayen itraaf say apni lapait mein lay liya, Phir kya tha sheher aur bastian mujahideen kay ghodon kay samon talay masli gayein jesay chuntiyan masli jaati hain.

Ilaaqon kay ilaaqay is tarhan sarnagoon honay lagay jis tarhan mousam khazaan ki tez aandhi kay dauraan darakhton kay pattay jhadte hain, Is ma’arkah aarai mein musalmaanon kay haath Maal-e-Ghanimat itni waafir miqdaar mein laga jis ki us say pehlay koi misaal nahi milti aur na hi kisi kaanon ne kabhi koi aisi khabar hi suni hogi.

Shah Iktania doosri dafa lashkar-e-Islam ka muqablah karne kay liye maidaan mein utra phir do bada dono lashkaron kay darmiyan ghamsaan kaa ran pada, Lekin mujaahideen ne thoday hi arsay ba’ad unhein ibrat naak shikast say dochaar kar diya, Aan-e-Waahid mein dushman kay chakkay chuda diye aur unhein tehes nehes kar kay rakh diya.

Kuch qatal huye kuch qaidi, Baki jo woh bachay dum daba kar bhaag gaye phir lashkar-e-Islam ne Suba Iktania kay markazi sheher Lordo ki taraf pesh qadmi ki, Yeh sheher subay ka daarul hakumat tha, Ameer lashkar ne us sheher par aisa zordaar hamlah kiya jo pehlay khoufnaak hamlaon say kisi tarhan kam na tha, Hamlah aawron ne kamaal Jurrat-o-Shuja’at ka muzaahira kartay huye Askari tareekh ko mujaahidana azmat say aashna kiya aur hairat angaiz daastaanein raqam kein, Yeh mahfooz aur mashoor sheher bhi lashkar-e-Islam kay aage sarnagoon ho gaya, Ameer sheher ko mout kay ghaat utaar diya gaya us sheher say musalmaanon ko bohat sa Maal-e-Ghanimat haasil hua, France kay mashoor-o-Ma’roof sheher Lordo ka saqoot bohat say doosray sheheron kay saqoot ka baa’is bana jin mein Leon, Siranson aur Sans sheher qaabil zikar hain, Yeh aakhri sheher France kay daarul hakumat Paris say koi sau meel kay faaslay par waqe’ hai.

---

Chand maheenon mein junubi France ka nisf hissa jab azeem general Hazrat Abdul Rahman Ghafqi kay haathon fatah hua to puray Europe mein aik konay say doosray konay tak iztaraab aur bechaini ki leher daud gayi, Pura Europe Khauf-o-Haraas say kaanp utha, Firangion ne us khatarnaak-o-Alamnaak Surat-e-Haal dekh kar aankh kholi, Jagah jagah apni hifaazat kay liye ailaan kar diya gaya, Har chotay baday darmaanda aur saahib haisiyat baashinde say apeel ki gayi keh mashriq say aany waale is khatarnaak toofan kay aage band baandhnay kay liye jo kuch Saaz-o-Saman hai lay kar maidaan mein nikal aayen, Ahl-e-Europe kay dilon mein yeh jazbah paida kiya gaya keh agar talwaarein jawaab de jaayen to apnay seenay taan layen, Jungi aslah khatam ho jaye to apnay jismon ko dhaal bana lein aur pura Europe lashkar-e-Islam kay saath muqablay kay liye baahir nikal aaya aur puri qaum general Sharal Martal kay jhande talay jama ho gayi takeh mashriq ki jaanib say aany waale toofan ko roka jaa sakay.

Lashkar-e-Islam Tod sheher tak pohcha tha jo saaray France mein sheheri aabaadi, Ta’meeri pukhtagi aur taarikhi aitebaar say mashoor-o-Ma’roof tha, Aur us sheher ko yeh aizaaz bhi haasil tha keh is mein bada Wasee’-o-Areez fan ta’meer ka naadar namuna aik girja bhi tha jis mein beshumaar Aasaar-e-Qadeema kay namunay rakhay huye thay, Door door say log us ki ziyarat kay liye aatay thay, Mujaahideen ne us sheher kay gird bhi ghera tang kar diya, Muhaasray kay ba’ad us sheher ki haalat aisi ho gayi keh jaisay kisi ki gardan mein toq daal diya jaata hai aur us par mout kay saaye mandlaanay lagay, Thoday arsay ba’ad sheher fatah kar liya gaya aur Franci general  Sharal Martal Kaf-e-Afsoos malta reh gaya.

---

San 154 hijri mein maah sha’ban kay aakhri ashray mein azeem general Hazrat Abdul Rahman Ghafqi lashkar-e-Islam ki qiyadat karta hua Boatia sheher par hamlah aawar hua wahan muqablay mein Europi general Sharal Martal aik bohat baday lashkar ki qiyadat kartay huye muqaablay mein aaya, Donon fojon mein aisi ghamsaan ki ladai jis ki askeer kya balkeh insaani tareekh mein misaal nahi milti, Yeh ladai ma’arkah Bilat ul shohda kay naam say mashoor hui.

Islami lashkar pay darpay fatah haasil karta hua azmat-o-Himat aur Jurat-o-Shuja’at kay Nuqta-e-Arooj par pohcha hua tha lekin us ki kamar bohat ziadah ghanaaem kay bojh say dabi jaa rahi thi Hazrat AbdulRahman Ghafqi is Surat-e-Haal say bohat ziadah preshan thay.

Un kay nazdeek yeh Surat-e-Haal lashkar-e-Islam kay liye bohat ziadah khatarnaak thi unhein yeh andesha tha keh larrai kay waqat mujahideen kay dil Maal-e-Ghanimat mein uljhay huye na reh jaaen is tarhan un kay Khayalaat-o-Aawaatif Muqasim-o-Muntashir rahen gay un ki aik aankh dushman par ho gi aur doosri Maal-e-Ghanimat par.

Unhone iraadah kiya keh woh mujaahideen ko hukm dein keh woh Maal-e-Ghanimat say dastbardaar ho jaayen lekin yeh andesha daamangeer ho gaya is tarhan un kay dilon mein intishaar ki leher daud jaayegi, Mumkin hai is kay nataaij achay baraamad na hon, Is qeemti khazanay say dastakash hotay hi inhein zabardast dhachka lagega, Badi soch bichaar kay ba’ad unhon ne chaaoni kay peechay khemay nasab karaa kay saara Maal-e-Ghanimat us mein rakh kar pehrah laga diya tekeh ladaai shuru karnay say pehlay har mujahideen ka zehen is taraf say mutmayin ho jaayega.

---

Dono baday lashkar aik doosray kay saamne chand din tak is tarhan kaamil khaamoshi say khaday rahay jis tarhan do pahaad aamne saamne khaday hon, Har lashkar apnay dushman ki taaqat say khauf zadah tha aur Madd-e-Muqabil par hamlah karnay say pehlay lambi soch bichaar mein mubtala tha keh pesh qadmi ka kya natijah hoga? Isi Surat-e-Haal mein jab bohat waqt beet gaya, Hazrat Abdul Rahman Ghafqi ne apnay lashkar kay sipaahiyon kay seenay mein jurrat, Shuja’at aur Ghairat-o-Himmat kay jot jagaayi, Madd-e-Muqabil par hamlah karnay kay iqdaam ko tarjeeh di, Unhein apni Khush naseebi ki buniyaad par Fatah-o-Nusrat ki ummeed thi.

---

Lashkar-e-Islam ka azeem general Abdul Rahman Ghafqi firangi lashkar par yun jhapta jaise bhooka sher apnay shikaar par jhapatta hai lekin firangi lashkar un kay saamne aik chattaan ki maanind data, Ladai ka pehla din baghair kisi haar jeet kay guzar gaya, Maidaan jung mein ladnay waalon kay haath siwaay andhery kay kuch na aaya.

Doosray roz ladaai shuru hui, Musalmaanon ne firangion par taabad tod hamlay kiye lekin yaksar be sood, Yeh ladaai musalsal saat din isi tarhan jaari rahi, Aathwen din musalmaanon ne aik zordaar hamlah kiya dushman ki safon mein daraar paida kar di jis say Fatah-o-Nusrat is tarhan dikhaai di jis tarhan pichli raat ki taariki mein subha ki raushni dikhaai deti hai.

Idhar firangi lashkar ne mouqa paa kar un khemon par hamlah kar diya jin mein Maal-e-Ghanimat mahfooz kiya gaya tha. Jab musalmaanon ne dekha keh Maal-e-Ghanimat par dushman qaabiz hua chahta hai to aksar mujaahid us ki hifaazat kay liye paltay jis say mujaahideen ki safon mein daraar paida ho gayi.

Bilaat ul shohda kay din musalmaanon ne apni ummeedon par paani pher liya, Us mein Ghazwah-e-Uhad ki tareekh dohraai gayi, Yeh Qanoon-e-Qudrat hai jis mein kisi daur mein bhi koi tabdeeli ronuma nahi hoti us din lashkar-e-Islam ko jo na qaabil talaafi nuqsan pohcha woh azeem general Abdul Rahman Ghafqi ki shahaadat ka saaneha hai.

---

Ma’arkah bilaat ul shohda ki ghamnaak khabrain millat-e-Islamia kay har fard kay liye ibrat naak saabit huin jin say un kay dil larzah bandaam ho gaye, Har sheher, Basti aur ghar mein Saf-e-Maatam bich gayi, Millat-e-Islamia kay jisam par yeh aik aisa gehra zakhm tha jis ki thees us waqat tak mehsoos ki jaati rahay gi jab tak roye zameen par aik bhi musalmaan baaqi hai.

---

Aap yeh khayaal dil mein na laaen keh yeh chot sirf musalmaanon kay dil par lagi hai balkeh firangi daanishwar bhi is mein barabar kay shareek hain, Un kay Abaa-o-Ajdaad ki kaamyabi un kay liye aik badi musibat ka pesh khema saabit hui jis mein sar zameen firang kay tamaam insaan mubtala huye aur European Tehzeeb-o-Tamaddan ko na qaabil talaafi nuqsan uthana pada, France ka mashoor-o-Ma’roof daanishwar aur adeeb likhta hai agar France kay general Sharal Martial ka lashkar musalmaanon par ghalbah haasil na karta to hamara mulk qaroon wustaa ki tareeki mein na doobta aur na hi mazhabi ta’asub say European maa’shray mein Qatal-o-Ghaarat aam hoti.

Agar Buatia sheher mein musalmaanon par European lashkar ko fatah haasil na hoti to Hispania Islam ki ne’mat say faizyaab hota aur Tehzeeb-o-Tamaddan kay aitebaar say aath sadiyan peechay na rehta.

Aik angrez daanishwar likhta hai keh hamaaray ghalbay kay mut’alliq mukhtalif Aara-o-Khayalaat kay bawajood yeh aik haqeeqat hai keh ham ilm, Funoon aur Sanat-o-Tijaarat mein musalmaanon kay Marhoon-e-Minnat hain, Ham khulay dil say aiteraaf kartay hain keh musalmaan aalim basheerat kay Darja-e-Kamaal tak huye thay yeh us daur ki baat hai jab angrez qaum Tehzeeb-o-Tamaddun say na aashna thi aur jaahilyat ki athaah gehraaiyon mein nihayat kasmpursi kay aalam mein zindagi ki gadi ko bamushkil dhakel rahi thi, Yeh sarasar iftiraa aur jhoot hai keh musalmaan us maqaam par khaday hain jahan ham qaroon wustaa mein khaday thay belkeh sachi baat to yeh hai keh aaj hamaari taraqqi millat-e-Islamia ki marhoon-e-minat hai.

---

Hazrat Abdul Rahman Ghafqi ki zindagi kay tafseeli halaat ma’loom karne kay liye darjzail kutab ka muta’ala karein:

1: Ghazawat ul Arab                                                                                     87-125 2: Al Bayan ul murib                                                                                     2/26-28 3: Nafh ul Tayyib                                                                                            1/111 4: Jamharat ul Ansab                                                                                  359 5: Ulmaa ul Undlus                                                                                        214 6: Jazwat ul Muqtabas                                                                                 255-353

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer