Hazrat Imam Abu Hanifa رحمہ اللہ

Khubroo, khush manzar, Shireen kalaam, Darmiyana qad na ziyada lamba aur na hi ziyada chhotay dikhne wala, Rashk bhari nigahon say dekhta hi reh jata. Libas bohat umdah aur saaf suthra pehantey, Saraapa baa raub, Mmdaa atriyaat ka istimaal badi kasrat aur ihtimama say kartay, Jin raahon say guzartay log inhey dekhay baghair khushboo hi say pehchan jatay kay iss raah say Hazrat ka guzar hua hai.

In ausaaf say araasta azim ul martabaat shakhsiyat ka naam Noman bin sabit marzaban hai jo Abu Hanifa kuniyat say mashoor huye, Jinho nay sab say pehlay Fuqha ki guthiyaan suljhayi aur umdah andaz main masalay ka istakhraaj aur deeni nukaat say logon ko mutarif karaya.

Imam Abu Hanifa nay Banu Umayyah ka aakhri aur Banu Abbas ka ibtadayi Daur-e-Hukoomat dekha, Imam mausoof nay in hukamranon kay daur mein zindagi basar ki jo ulama kay qadardaan thay, Inhay hukoomat ki janib say waafir miqdaar mein maali wasayel muhayya kiye jatay jis say in ki guzar basar khush hali say hoti aur inhay Talash-e-Ruzgaar ki zaroorat hi mehsoos na hoti. Lekin Imam Abu Hanifa nay khuddari ka Qabil-e-Rashk muzahira kartay huye Izaat-e-Nasfs aur ilmi waqar ko Peish-e-Nazar rakha aur apni iqtasadi halat ko hukoomat ka Marhon-e-Minnat na honay diya unho nay poori zindagi khud kama kar khaya aur un ki maqdoor bhar yahi koshish rahi kay in ka hath buland rahay kyun kay denay wala hath leinay walo say behtar hota hai.

Aik martaba Hukamran-e-Waqat Mansoor nay mulaqat kay liye Imam Abu Hanifa ko apne darbar main bulaya, Jab aap wahann pahunche us nay shahaana andaz say istaqbal kiya, Izzat-o-Ikraam kay sath apane sath bithaya. Deen-o-Duniya kay baday main bohat say sawalat kiye. Jab mulaqat kay baad aap wapis janay lagey to us nay Izzat-o-Ikraam aur adab ka bharpoor muzahira kartay huye aik thaili peish ki jis main tees hazar dirham thay. Halan kay Mansoor bukhal kay aitebaar say bohat mashoor tha. Imam Abu Hanifa nay irshad farmaya:

(Amirul momineen main Baghdad main ajnabi hoon. Ye maal sambahlnay kay liye mere paas jagah nahi, Mujhay andeisha hai kay ye zaya ho jayega, Aap isay apnay paas baitul maal main sambhal lein, Jab mujhay zaroorat hogi main aapsay lay lunga)

Mansoor nay aapki dili raghbat ka ahtaraam kartay huye woh maal amanat kay taur par baitul maal main rakh diya. Us waqiye kay thoday hi arsay baad Imam Abu Hanifa رحمہ اللہ Daayi-e-Ajal ko labbaik kehtay huye Allah ko pyare ho gaye, Wafaat kay waqt unkay ghar say logon ki amanatein itni miqdaar mein maujood thi jin ki maaliyat is say kahin zyada thi, Jo Hakim-e-Waqt Mansoor ki janib say baitul maal Bahaq-e-Imam Abu Hanifa mein mahfooz thi.

Mansoor ko jab is Surat-e-Haal ka pata chala to us nay aah bhar kar kaha: Allah Ta’ala Abu Hanifa par apni rehmat ki bharkha barsaaye, Us nay hamara atiya qabool karna gawara hi nahi kiya. Is main koi hairaani ki baat nahi kyun kay Imam Abu Hanifa رحمہ اللہ ka moqaf ye tha kay insan jo khud apane hath say kama kar khata hai woh zyada pakeezah, umdah aur dil pasand khana hota hai. Ham Imam mausoof ki zindagi ka mushahida kartay huye dekhtay hain kay aapnay Umoor-e-Tijaarat ko sar anjaam denay kay liye waqat makhsus kar rakha tha. Aap reisham aur is say tayyar kardah kapdon ki tijarat kiya kartay thay. Iraq kay mukhtalif shehron main tijaarati kaam ka khub chalan tha. Un ki aik Mashhoor-o-Maroof mandi bi thi jis main kharid-o-Farokht kay liye log kashan kashan pahuchtay wahan poori Sadaqt-o-Amanat say lein dein hota log baday itmenaan say sauda salf kharidtay kisi ko koi andeisha na hota aur na hi koi khatra mehsoos karta.

Logon ko mandi mein kharidne kay liye aala aur nafees varietay milti jis say buland zoqi ka ahsaas paida hota. Tijarat say Imam Musoof ko khatir khwa’h naafa hasil hota aur Allah Ta’ala kay Fazal-o-Karam say wafar miqdar mein Maall-o-Dolat mayassar aata. Halal kamatay aur apnay maal ko us ki asli jagha kharch kartay, Urfe-e-Aam mein ye baat mashoor thi kay jab saal poora ho jata to aap tijaarat say hasil honay walay tamam munafey ka hisab lagatay, Apnay zati akhrajaat kay liye rakhnay kay baad baqi maal say Ulama, Muhaddiseen, Fuqahaa aur tulba’a kay liye zaroori ashaya, Khurak aur libas kharidtay. Aur kuch jeb kharch kay liye inhay naqad raqam faraham kartay huye farmtay:

Ye maal tumhara hai Allah Subhan wa Ta’ala nay meray hath say tumharay maal main munafa ata kiya hai. Ba’khuda main apne maal say tumhey kuch nahi dey raha ye Allah ka khaas fazal hai jo merey zariye aap tak pohonch raha hai.

Allah kay rizq mein Allah kay siwa koi dam nahi maar sakta.

Imam Abu Hanifa رحمہ اللہ kay Jood-o-Sakha ki khabrein Mashriq-o-Maghrib mein phail chuki thee, Khaas taur par ham nasheenon aur saathiyon par bey dareigh kharch kiya kartay thay.

Aik roz Imam mausoof  ka aik ham nashiin mandi mein aya aur usnay kaha:

Aye Abu Hanifa mujhay resham ka kapda chahiye.

Imam Abu Hanifa رحمہ اللہ nay poocha kis rang ka kapda matloob hai?

Usnay rang kay baare mein wazaahat ki.

Apnay farmaya: Sabr karo iss rang ka kapda miltay hi terey liye mahfooz kar lunga.

Aik hafta guzar jane kay baad matluba kapda mila to aap ley kar apne sathi kay ghar gaye. Aur us say kaha lijiye aapki pasand kay mutabik kapda mil gaya hai.

Usnay dekha to usay bohat pasand aaya. Poocha kitni qemat paish karun?

Farmaya: Sirf aik dirham!

Usnay baday tajjub say poocha sirf aik dirham?

Apnay farmaya haan!

Usnay kaha: Aap mere sath mazak kar rahey hain. Mazak nahi kar raha darasal maine ye aur isskay sath doosara kapda bees dinaar aik dirham ka kharida tha, Doosray kapday say mere paise poore ho gaye hain, Ye baki reh gaya tha apsay aik dirham ka mutalba iss liye kar raha hoon kay mein apne sathiyon se munafa nahi liya karta.

Aik boodhi aurat nay Imam sahab say resham ka kapada maanga. Aapne matlooba kapaa uss kay liye nikala usnay kaha, Main aik umar raseeda aurat hoon, Ashayaa ki qematon ka mujhay ilm nahi baraye meharbani aap mujhe thoday say munafa par kapada dey dein. Main aik kamzoor naatawan aurat hoon.

Apnay farmaya: Mainay do thaan aik sath kharide thay. Aik thaan farokht karne say mujhey chaar dirham kam poori raqam mil gayi hai. Aap ye doosra thaan sirf chaar dirham dey kar ley jayein. Main apsay koi munafaa nahi chahta.

Aik roz aapkey paas aik sathi phatay poorane kapday pehne mulaqat kay liye aaya, Jab sab log chalay gaye aapne ussay kaha musalla uthayie iss kay neeche jo kuch hai woh le lein.

Us shakhs nay musalla uthaya, Dekha kay isskay nechay aik hazar dirham pada hai.

Imam Abu Hanifa nay irshad farmaya: Ye apne paas rakhiye, Apne liye naya umada libas tayyaar kariye.

Usnay kaha mere paas Allah ka diya sab kuch hai mujhey iss ki zaroorat nahi.

Imam Abu Hanifa nay ussay kaha agar Allah nay aap par apna Fazal-o- Karam kiya hai aur apni nImaton say nawaza hai to in neimaton kay asaar kaha hain? Aap in neimaton ko istImaal kyun nahi kartay?

Kya aap tak Rasul Allah (ﷺ) ka ye paigham nahi pohcha:

ان الله يحب ان يرى ائر نعمته على عبده

Bilashuba Allah Ta’ala pasand karata hai kay apni neimat kay asaar apne banday par dekhe.

Apkay liye ye zaroori hai kay apni haalat ko sanwaaro takey aapko dekh kar aapky kisi sathi ko kofat na ho.

Imam Abu Hanifa رحمه الله kay Jood-o-Sakha ka ye aalam tha kay jab kabhi apne Ahl-e-Khana par kharch kartay to itni hi miqdar mein masakeen, Fuqra’a aur haajat mandom kay liye maal sadqa kartay.

Jab kabhi khud koi naya kapda pehnatey, Itni hi qeimat kay kapday masakeen ko sila kar deitay jaba apky samne khana rakha jata, Aap itni hi miqdar mein ya issay dugnaa khana masakein mein taqseem kar deitay.

Imam mausoof kay baare mein waqiyat mashoor hain kay agar kabhi Dauran-e-Guftagoo unhonay kasam kha li to woh usskay badlay aik dirham Allah ki raah mein sadqa kar dete.

Phir unhonay apane upar ye lazim kar liya kay agar guftagoo kartay huye zubaan say halfiya kalmaat nikal jaye to soney ka aik dinaar Allah ki raah mein kharch kartay. Ye iss soorat mein tha jab kay apki qasam bilkul sachi hoti to aik dinaar Raah-e-Khuda mein sadqa kartay.

Hafs bin Abdul Rehman tijaarat mein Imam Abu Hanifa ke shareek thay, Imam mausoof inhein resham ka Saaz-o-Samaan day kar Iraq kay baaz shehron ki taraf rawana kiya kartay they.

Aik martba kafi miqdaar mein saman day kar bheja aur isay bata diya kay fal’a fal’a kapda daaghi hai jab aap isay frokhat karey to kharidar ko iss ayb say aagah kar deina.

Janab Hafs bin Abdul Rehman nay tamam saman bech diya aur kharidaaron ko naqis kapadon kay baare mein batana bhool gaye, Unhonay badi koshish ki kay un kharidaron kay naam yaad aa jayein jinhonay naqis kapda kharida hai lekin woh poorey jatan kay bawajood unkay naam yaad karne mein kamyaab na ho sakay jab Imam Abu Hanifa ko Surat-e-Haal ka ilm hua aur un logon kay pehchanne mein naakami ka pata chala to bade bechain hogaye.

Jab tak aapne iss poorey maal ki qemat ka maal Allah ki raah mein kharch nahi kar liya inhein dili itmenaan naseeb na hua.

Imam Abu Hanifa khush akhlaq, Khush atwaar, Haleem ul tabaa’ aur khush mazak thay. Aapkey paas baithane wala sayadat hasil karta.

Aap ka mukhalif bhi ghair haazri mein aapko achay alfaz se yaad karta.

Apkay aik kareebi sathi ka bayan hai kay mainey Hazrat Abdullah bin Mubarak ko Hazrat Sufiyan Soori رحمہ اللہ say ye baat kehtay huye suna kay:

Aye Abu Abdullah Imam Abu Hanifa gheebat say bohat nafrat kiya kartay they.

Mainay kabhi in ko apne dushman kay khilaaf bura bhala kehtey huye nahi suna.

Imam Sufiyan Soori nay kaha:

Imam Abu Hanifa baday danishmand they woh kisi aisi cheez ko apni nekiyon par ghalib nahi aane deitay they jo in par paani pher dey.

Imam Abu Hanifa رحمہ اللہ ko logon ki muhabbat aur ulfat shikar karne ka bohat shauk tha aur woh hamesha insay khushgwar talluqaat se khwahan rehtay.

Apkay baare mein mashoor tha kay jab koi ajnabi aapke paas aakar baith jata, Jab woh uth kar jane lagta to aap issay aamad ka maqsad zaroor darayaft kartay agar woh faqeer hota to aap us ki maali madad kartey, Agar woh bemar hota to us ki temaar daari kartay, Agar woh zaroorat mand hota to aap us ki zaroorat ko poora kartay.

Yahan tak kay us ka dil jeet laitay aur woh duayein de jata.

Imam Abu Hanifa رحمہ اللہ Aksar-o-Beshtar din ko roza rakhtay aur raat ko ibaadat mein masroof rehtay.

Quran-e-Hakeem ko badi muhabbat aur chahat kay sath padhtay, Yun maloom hota kay aap Quran-e-Hakeem kay bade gehray dost hain. Sehri kay waqt astaghfar kartay, Kasrat ibadat aur iss mein magan honay ka asali sabab ye tha kay aik din unhonay logon mein say chand afraad ko ye kehtay huye sun liya tha kay ye shakhs bada ibaadat guzaar hai raat bhar ibaadat mein masroof rehta hai, Jab aapne apane baare mein ye baat suni to farmane lagay kay mera Tarz-e-Amal to logon kay jazbaat kay bilkul baraks hai, Kyun na mein waisa hi ban jaun jaisa log meray baare mein khayal zahir kartay hain, Phir unhonay azm kar liya kay main zindagi bhar apne sar kay neechay takiya nahi loonga.

Phir un ki ye aadat ban gayi kay raat ka baishtar hissa woh ibadat mein sarf kartay.

Jab raat tareeki ki chadar ko kainaat par phaila deti jab log neend kay mazy lene lagtay to ye umdah libas pehentay, Dadhi mein kanghi kartay, Khushboo lagtay, Phir mehraab mein qiyaam, Rukoo aur sajdah ki halat mein raat ka baishtar hissa guzaar deitay, Kabhi gidgida kar Allah kay hazoor duayein mangtay aur kabhi ye aayat baar baar padhtay jatay:

بَلِ السَّاعَةُ مَوْعِدُهُمْ وَالسَّاعَةُ اَدْهٰى وَاَمَرُّ   46؀

Aur Allah ki khashiyat say Zaar-o-Qataar aisa rotey jissay dil dahal jatay, Khauf-e-Khuda say rotay huye baaz aukaat aisi ghighi bandhti jis say aam aadmi ka jigar chhalni ho jaye.

Aur jab aap Surat-e-Zilzaal padhtay to aapky jism par kapkapi taari ho jaati, Dil khauf say tharthar kanpne lagta.

Apni dadhi ko hath mein pakad kar ye kehtay: Aye zarra barabar neiki ka badla deine walay, Aye zarra barabar shar ki saza dene walay, Apne banday Noman ko Jahannum  ki aag say bacha leina.

Ilaahi apne banday ko in buraiyon say door kar day jo Jahannum kay qareeb karne ka bayis banti hai.

Ya arham ur rahimeen apni rahmat kay wasee saye mein apne banday ko dakhil kar laye.

Aik roz Imam Abu Hanifa رحمہ اللہ Imam Malik kay paas aaye, Wahan chand sathi aur bhi baithay huye thay, Jab mulaqat karkay wapis chalay gaye to aapne sathiyon say poocha kya tum jantay ho ye shakhs kaun hai?

Sabnay kaha nahi ham to nahi jantay.

Apnay farmaya ye Noman bin Saabit hai.

Ye woh shakhs hai kay agar ye iss satoon ko keh day kay ye sone ka hai isay sabit karne kay liye aisay dalail dega kay Madd-e-Muqabil ko tasleem karne kay baghair koi Chara-e-Kaar na hoga, Woh dalayel say maroob ho kar tasleem kar lay ga kay waqayi ye sone ka hi hai.

Imam Maalik ne Imam Abu Hanifa (رحمة الله) ki quwwat-e-Istadlaal, bedaar maghazi aur zood fahmi ke baray mein koi mabaalgha aaraai se kaam nahi liya.

Taareekh-o-Sair ki kitaabon mein aisay waqe’aat darj hain jin se pata chalta hai ke Imam mausoof apne Madd-e-Muqabil ko aisa zich karte ke woh baat karne ke qaabil hi na rehta. Jaisa ke Imam Maalik ne un ke baray mein farmaaya: “Ke agar yeh apne Madd-e-Muqabil ko keh day ke tere samnay jo matti padi hai yeh sona hai to usay saabit karne ke liye aisay dalayel denge ke bil aakhir usay tasleem karna padega ke waqayi yeh sona hai lekin agar yeh kisi deeni maslay mein moqaf ikhtiyaar kar lein to usay haq saabit karne mein to yeh Yad-e-Toola rakhte hain.”

Koofa mein aik aisa ghumraah shakhs rehaaish pazeer tha jisay ba’az log qadar ki nigaah se dekhtay they. Aur us ki baatein ghaur se suna karte. Us ne aik dafa logon se kaha: “Ke Usmaan bin Affaan haqeeqat mein yahoodi tha aur woh Islaam qabool karne ke baad bhi yahoodi hi raha.”

Imam Abu Hanifa (رحمہ اللہ) ne jab yeh baat suni to un ke tan badan mein aag lag gayi. Aap fauran us ke paas pohchay, Us se mulaaqaat ki aur farmaaya:

“Main aaj aik khaas kaam ke liye aaya hun.” Us ne kaha: “Chashm-e-Raushan maashaad farmaaiye. Kya kaam hai? Sar aankhon par. Khush aamdeed. Aap farmaayn aap jesay mu’aziz insaan ki baat ko qabool karna sa’adat hai.”

“Main chaahta hun keh aap ki beti ki nisbat main apne fulaan saathi se kar dun, Kya aap ko manzur hai?” “Kyun nahi, kyun nahi.

Lekin mangetar ka zara ta’aruf to karaayen ke woh kaun hai?”

Aap ne farmaaya: “Woh bada maaldaar aur apni qaum mein usay izzat ki nigaah se dekha jaata hai, Bada sakhi hai khulay haath ka maalik hai.

Haafiz-e-Quran hai. Shab zinda daar hai. Allah ke Khauf-o-Aahzaari kamaal andaaz mein karta hai. “

Us ne itni tareef sun kar kaha: “Bas bas itna hi kafi hai. Aisa shakhs hi mera damad bannay ke qaabil hai.”

Imam Abu Haaneefah (رحمہ اللہ) ne us ke khush gawaar mood ko dekhte huye kaha: “Meri yeh baat bhi zara ghaur se sunein, is mein aik buraai bhi hai.”

Us ne chaunk kar kaha: “Woh kya?”

Aap ne farmaaya: “Woh yahoodi hai.” Yeh baat sun kar woh shakhs bidka aur kehne laga: “Aray yahoodi hai.”

Aye Abu Hanifa (رحمہ اللہ) kya aap meri beti yahoodi ke nikaah mein dena chahte hain? Allah ki qasam aisa hargiz nahi ho sakta. Main apni beti ki shadi kisi yahoodi ke saath karne ka tasawwur bhi nahi kar sakta, khwaah is mein zamane bhar ki khoobiyan jama kayun na ho jayen.”

Imam Abu Hanifa (رحمہ اللہ) ne kaha: “Ab kyun uchhaltay ho.” “Apni beti ka yahoodi ke saath nikaah karne se kyun itna bidaktay ho?

Tujhe yeh kehte huye qat’an sharm na aai keh (نعوذ با اللّٰه) Rasool (ﷺ) ne yake deegaray apni do betiyon ki shaadi aik yahoodi se kar di. Kuch sharam karo, Kuch haya karo bay-ghairat insaan tere liye doob marne ka maqam hai.”

Woh shakhs yeh baatain sun kar kaanpne laga aur foran pukaar utha: “Ilaahi meri tauba mujhe bakhsh day. Yeh buri baat jo mere munh se nikli yeh iftiara aur bohtaan jo main ne baandha. Ilaahi mujhe ma’af kar day. Bila-Shuba tu bakhshnay wala meharbaan hai.”

Aik dafa ka waqiya hai ‘Zuhaak Shaari’ naami aik khaarji Imam Abu Hanifa (رحمہ اللہ) ke paas aaya aur us ne dekhtay hi kaha: “Abu Hanifa Allah se ma’afi maango. Tauba karo.”

Aap ne pucha: “Main ne kya jurm kiya hai? Jis ki ma’afi maangun.”

Khaarji ne kaha: “Aap ne Hazrat Ali aur Ameer Muawiyah ke mabain paida hone wale ikhtilaafat mein tahkeem ke jawaaz ka fatwa diya hai.”

Imam Abu Hanifa (رحمہ اللہ) ne kaha: “Tum is maslay par mere saath manaazrah karna chahte ho?”

Khaarji ne kaha: “Haan main tayaar hun.” Imam Abu Hanifa (رحمہ اللہ) ne kaha: “Hamaray darmiyaan hone wale manaazray ka faisla kaun karega?”

Khaarji ne kaha: “Jis ko aap chahayn judge bana lein.” Imam Abu Hanifa (رحمہ اللہ) ne khaarji ke saathiyon par nazar daudayi aur farmaaya: “Is ko hukkam bana lein.” “Main aap ke saathi ko judge bananey par raazi hun. Kya tum bhi raazi ho?”

Khaarji khush ho gaya. Us nay kaha: “Mujhe manzoor hai.”

Imam Abu Hanifa (رحمہ اللہ) ne farmaaya: “Baday afsos ki baat hai. Tum aaj khud mere aur apne darmiyaan hone wale jhagday ka faisla karne ke liye tahkeem ko jayez qaraar detay ho aur Allah ke do aali shaan Sahaaba ke darmiyaan hone wale ikhtilaafaat ko mitaanay ki khaatir tahkeem ka inkaar karte ho. Mujhe afsos hai teri Aqal-o-Daanish par.”

Yeh sun kar khaarji shashdar reh geya aur us ne koi jawaab sujhaai na diya.

Aik roz sar Zameen-e-Islam mein shar ka beej bonay wala ghumraah kun firqah bahmiyah ka sarbaraah Jaham bin Sufwaan Imam Abu Hanifa (رحمہ اللہ) se milne aaya. Us ne kaha: “Main aap ke saath chand zaruri baatein karne ke liye aaya hun.” Imam Abu Hanifa (رحمہ اللہ) ne kaha: “Tumharay saath baat karna ma’ayoob hai.

Jin nazriyaat ka tu haamil hai us mein Ghaur-o-Khauz aur Behas-o-Tamhees aag ka bhadakta hua shola hai.”

Jaham ne kaha: “Aap ne faisla mujh par kaisay saadar kar diya. Halaan kay is se pehle aap na mujh se kabhi mile hain aur na hi aap ne meri kabhi koi baat suni hai.” Imam Abu Hanifa (رحمہ اللہ) ne farmaaya: “Aap ki bohat si baatein mujh tak pahunch chuki hain. Jin ka sadoor kisi musalman se mumkin nahi.”

Jaham ne kaha: “Kya tum ghaib ki buniyad par faisla karte ho?”

Imam Abu Hanifa (رحمہ اللہ) ne farmaaya: “Tere nazriyaat logon mein aam phail chukay hain. Aam-o-khaas ba-khoobi in nazriyaat se waaqif ho chukay hain. Is bina par mere liye tere baray mein yeh faisla karna jaaiz hai. Kyun keh yeh Darja-e-Tawaatar ko pohonch chukay hain.”

Jaham ne kaha: “Main aap se sarf Imaan ke baray mein sawaal karna chaahta hun.”

Imam Abu Hanifa (رحمہ اللہ) ne irshaad farmaaya: “Abhi tak tujhe Imaan ka hi nahi pata chala keh aap us ke baray mein mujh se puchna chahtay ho?”

Jaham: “Nahi mujhe Imaan ka to ilm hai lekin us ke chand pehluyon mein chandaan Shukook-o-Shbhaat hain.”

Imam Abu Hanifa (رحمہ اللہ) ne farmaaya: “Imaan mein Shak-o-Shubha kufr hai.”

Jaham ne kaha: “Aap ke liye yeh durust nahi keh mujhe us waqt tak kufr ke saath munsalik karo jab tak meri taraf se koi aisi baat maloom na kar lo jo kufr ke mutraadif ho.”

Imam Abu Hanifa (رحمہ اللہ) ne farmaaya: “Chalo pucho jo tum puchna chahtay ho?”

Jaham ne kaha: “Mujhe koi aisa shakhs bataiye jis ne Allah ko apne dil se pehchana hai aur us ne jaan liya ho ke Allah aik hai us ka koi shareek nahi koi hamsafar nahi aur us ne Allah ko us ki sifaat ke zariye pehchana ho.”

“Haalan kay us jaisi koi cheez nahi.

Phir woh shakhs is haalat mein mar gaya keh us ne apni zubaan se Imaan ka ailaan nahi kiya.

Kya woh shakhs momin mara ya kaafir?”

Imam Abu Hanifa (رحمہ اللہ) ne farmaaya: “Us ki maut Haalat-e-Kufr mein hui. Woh Jahannami hoga. Jab kay us ne apni zubaan se is Imaan ka iqraar nahi kiya jis ki ma’afrat us ke dil ne haasil kar li thi. Jab kay zubaani wazaahat ke silsilay mein wahan koi mana’a aur rukaawat bhi nahi.”

Jaham ne kaha: “Woh bhala momin kyun nahi us ne to Allah ki ma’afrat usi tarah ki keh jis tarah karne ka haq hota hai.”

Imam Abu Hanifa (رحمہ اللہ) ne farmaaya: “Agar tum Qur’an ko hujjat maantay ho Qur’an par tera Imaan hai. To main Qur’an-e-Hakeem se dalaail paish karun aur agar Qur’an par tera Imaan nahi to main aqali dalaail se apni yeh baat saabit karunga.”

Jaham ne kaha: “Main Qur’an ko hujjat maanta hun. Aur Qur’an ki sadaaqat par mera Imaan hai.”

Imam Abu Hanifa (رحمہ اللہ) ne farmaaya:

“Allah Subhaan-o-Ta’ala ne Imaan ke jisam insaani ke do aza ke saath munsalik kar diya. Dil aur zubaan. Imaan ki sehat ke liye in donon ka Aitraaf-o-Iqraar zaruri hai.”

“Sirf aik aiteraaf Qaabil-e-Qabool nahi hoga. Kitaabullah aur hadees Rasool (ﷺ) mein is ki sifaat milti hain.” Jaisa ke Allah Ta’ala ne irshaad farmaaya:

وَاِذَا سَمِعُوْا مَآ اُنْزِلَ اِلَى الرَّسُوْلِ تَرٰٓي اَعْيُنَهُمْ تَفِيْضُ مِنَ الدَّمْعِ مِمَّا عَرَفُوْا مِنَ الْحَـقِّ ۚ يَقُوْلُوْنَ رَبَّنَآ اٰمَنَّا فَاكْتُبْنَا مَعَ الشّٰهِدِيْنَ  83؀ وَمَا لَنَا لَا نُؤْمِنُ بِاللّٰهِ وَمَا جَاۗءَنَا مِنَ الْحَقِّ ۙ وَنَطْمَعُ اَنْ يُّدْخِلَنَا رَبُّنَا مَعَ الْقَوْمِ الصّٰلِحِيْنَ  84؀ فَاَثَابَهُمُ اللّٰهُ بِمَا قَالُوْا جَنّٰتٍ تَجْرِيْ مِنْ تَحْتِهَا الْاَنْھٰرُ خٰلِدِيْنَ فِيْهَا  ۭوَذٰلِكَ جَزَاۗءُ الْمُحْسِنِيْنَ  85؀ سورة المائدة ٨٣-٨٥

“Unhon ne apne dil se haq pehchaan liya tha. Aur apni zubaan se us ka iqraar bhi kiya. Allah Ta’ala ne unkay zubaani aiteraaf ki bina par aisay baaghaat mein daakhil kiya jin mein nehrein behti hain.”

Isi tarah Allah Ta’ala ka irshaad hai:

قُوْلُوْٓا اٰمَنَّا بِاللّٰهِ وَمَآ اُنْزِلَ اِلَيْنَا وَمَآ اُنْزِلَ اِلٰٓى اِبْرٰھٖمَ وَاِسْمٰعِيْلَ وَاِسْحٰقَ وَيَعْقُوْبَ وَالْاَسْبَاطِ وَمَآ اُوْتِيَ مُوْسٰى وَعِيْسٰى وَمَآ اُوْتِيَ النَّبِيُّوْنَ مِنْ رَّبِّهِمْ ۚ لَا نُفَرِّقُ بَيْنَ اَحَدٍ مِّنْھُمْ ڮ وَنَحْنُ لَهٗ مُسْلِمُوْنَ   ١٣٦؁  سورة البقرة ﴿136﴾

“Allah ne unhay zubaani iqraar ka hukm diya. Sirf dili ma’afrat par iktifa nahi diya.”

Rasool (ﷺ) ne irshaad farmaaya:

“قولو الا الہ الا اللہ تفلحون”

“Tum iqraar karo keh Allah ke siwa koi ma’abood bar-haq nahi. Kaamyaab ho jaoge”

Aap ne sirf dili ma’afrat ko Falah-o-Kaamyaabi ka mayaar qaraar nahi diya bal kay us ke saath zubaani iqraar ko bhi laazmi qaraar diya.

Isi tarah Rasool (ﷺ) ne yeh bhi irshaad farmaaya:

 “یخرج من الناز من قال الا الہ الا اللهُ‎”

“Jis ne La-Ilaha-Il-Allah kaha woh Jahannum  se nikal jayega.”

Is farmaan mein yeh bhi nahi kaha keh jis ne Allah ko dil se pehchaan liya woh Jahannum se bahir aa jayega.

Agar Imaan ka ta’alluq sirf dil se hota zubaani iqraar ki koi haisiyat nahi hoti toh iblees bada momin hota woh apne Rab ko pehchaanta tha keh us ne usay paida kiya wohi usay maaray ga wohi usay zinda karega usi ne raandah dargah kiya.

Allah Ta’ala ne is ka mokaalmah Qur’an mein bayan kiya hai:

خَلَقْتَنِيْ مِنْ نَّارٍ وَّخَلَقْتَهٗ مِنْ طِيْنٍ    12 ؀ سورة الأعراف ﴿12﴾

“Tu ne mujhe aag se paida kiya hai aur is Aadam ko tu ne matti se paida kiya hai.”

Iblees ne kaha:

قَالَ رَبِّ فَاَنْظِرْنِيْٓ اِلٰى يَوْمِ يُبْعَثُوْنَ    36؀ سورة الحجر ﴿36﴾

“Mere Rab mujhe qayamat tak mohlat day dijiye.”

Us ne yeh bhi kaha: “Jaisa keh tu ne mujhe ghumraah kiya main bhi tere sidhe raastay par baithun ga.”

Imam Abu Hanifa (رحمہ اللہ) ne farmaaya:”Agar tera khayaal durust hota to aksar kaafir momin kehlaatay kyun ke woh apne dilon se Rab Ta’ala ko pehchantay the jab kay apni zubaanon se iqraar nahi karte the.”

Jaisa keh Allah Ta’ala ka irshaad hai:

وَجَحَدُوْا بِهَا وَاسْتَيْقَنَتْهَآ سورة النمل ﴿14﴾

“Dekhiye un ke dili yaqeen ki bina par unhay momin qaraar nahi diya bal kay un kay zubaani inkaar ki wajah se unhay kaafir qaraar diya gaya hai.”

Imam Abu Hanifa (رحمہ اللہ) musalsal Qur’an-o-Hadees ke dalayel diye ja rahay the. Jinhay sun kar Jaham kay chehray par Pareshaani-o-Pashemaani ke asaar wazeh dikhaai day rahay the. Dalayel ki bhar maar sun kar woh yeh kehtay huye khisaknay laga keh: “Aap ne mujhe bhula hua sabaq yaad dila diya hai main phir kabhi dobara aap ke paas aaunga.” Yeh keh kar woh chal diya. Is ke baad nah us nay aana tha aur na hi woh aaya.

Aik dafa Imam Abu Hanifa (رحمہ اللہ) ki mulaaqaat mulhideen ke saath hui. Jo wajood baari Ta’ala ke munkir thay.

Aap ne in se pucha:  “Ke aisi kashti ke baaray mein aap ka kya khayaal hai jo Saaz-o-Saaman se bhari hui ho. Taiz aandhi ke thapeday chaaron taraf se us se takra rahay hon lekin us ke bawajood woh seedhe raastay par apni manzil ki taraf baday itminaan se chali ja rahi ho. Is mein koi iztiraab, Khalal ya inhiraaf ka koi shaiybah tak nah ho. Aur nah us mein kashti ko chalaane wala koi mallah maujood ho. Kya yeh baat maannay mein aati hai?”

Sab ne bayak waqt ho ke kaha: “Koi aqalmand is baat ko tasleem karne ke liye tayaar nahi hoga.”

Apnay farmaaya: “Subhanallah.

Tum is baat ka to inkaar kar rahay ho keh samandar ki satah par aik kashti baghair kisi mallah ke seedhi simat chal hi nahi sakti aur is baat ka tum baghair soche samajhe iqraar kar rahay ho keh itni badi kainaat jis mein saat aasmaanon ki wase-e-tain aur zameen ki gehraaiyaan pahaadon ke silsilay samandaron ke gehray paani aur dariyaaon ke bahao baghair kisi sani’ ke Ma’ariz-e-Wajood mein aa gaye. Aur baghair kisi muhaafiz ke durust simat mein aur apne daairay mein reh kar apna farz Sar-Anjaam day rahay hain. Koi is ki tadbeer karne wala nahi. Koi in ki hifaazat karne wala nahi. Afsos tumhaari aqal par sad haif tumhaari soch par.”

Imam Abu Hanifa (رحمہ اللہ) ne zindagi phar apne dalayel se Deen ka difa’a kiya aur Allah Ta’ala ki ata kardah salaahiyaton ko baroye kaar laatay huye Deen ki bharpoor khidmat ki. Mantaq ko Zariya-e-Izhaar banatay huye baday baday jughaadari manaazraah karne waalon ke daant khattay kiye.

Jab mout ka waqt qareeb aaya to Aap (رحمہ اللہ) ne wasiyat ki ke: “Mujhe paakeezah jagah mein dafan kiya jaye. Aisi jagah mein dafan karne se ijtinaab kiya jaye jis mein ghazab ka koi shaibah tak bhi ho.

” Jab aap ki wasiyat haakim waqt mansoor tak pohchi to us ne barmala aiteraaf karte huye kaha:

“Imam Abu Hanifa (رحمہ اللہ) ki zindagi bhi Qaabil-e-Rashk hai aur in ki mout bhi Qaabil-e-Rashk hai. Unhon ne na apni zindagi mein humein angasht ka kabhi moqa’a diya aur nah mout ke waqt. Allah un par reham farmaye aur in par apni rehmat ki barkha barsaaye.”

Imam Abu Hanifa (رحمہ اللہ) ne yeh bhi wasiyat ki ke: “Mujhe Hassan bin A’amaaraah ghusal de.”

Wasiyat ke mutaabiq unhon ne baday ahtimaam se ghusal diya aur kaha:

“Aye Abu Hanifa Allah tujh par reham farmaye tujhe apni jawaar rehmat mein jagah day.

Aur in kaarnaamon ki bina par bakhsh day. Jo tu ne deen ki sar bulandi ke liye sar anjaam diye.

Allah tere marqad par reham ki barkha barsaaye.

Aasmaan teri lahad par shabnam afshaani kare.”

Imam Abu Hanifa (رحمہ اللہ) ke mufassal Halaat-e-Zindagi maloom karne ke liye darj-zail kitaabon ka mut’aala karein:

REFERENCE:

Book: “Hayat-e-Taba’een kay Darakhsha pahelo”

Taleef :  Dr. Abdur Rahman Rafat Al- Pasha.

Urdu Translation : By Professor Mehmood Ghaznofer