Imam Nawawi (رحمه الله)

 *Moallif-e-kitaab ka Naam o nasab*

Imam Nawawi Rahimahullah ka mukammal naam iss tarah hai:

Abu Zakariya Mohiuddin Yahya Bin Sharaf An Nawawi Bin Murri Bin hasan Bin Husain Bin Muhammad Bin Jummuah Bin Hazaam.

Apni Jaaye paidaaish Nawawi ki taraf nisbat ki wajah say An Nawawi kehlaatay hain aur yeh basti Damishq ke qareeb Howran naami muqaam ke muttassil hai. Imam Nawawi Rahimahullah ke aaba o ajdaad Hizaam say sakoonat khatam kar ke yahan aa kar rehaaish pazeer huay.

Wilaadat:

Imam Nawawi ki wilaadat issi ilaaqay Nawawi mein 631 hijri mein hui. Un kay waalid e muhtaram ne un ki taleem o tarbiyyat ka intezam apni khaas tawajjo say kiya aur Imam Nawawi Rahimahullah kay waalid e mohtaram khud bhi aik naik buzurg thay aur unho ne apnay pisar mein Khuda daad zahaanat o qaabiliyyat kay johar numayaa’n hotay uski awwaail umar hi mein parakh liay thay.

 Ibtidaai Taleem:

Imam Sahib Rahimahullah ko Rabb-e-Zuljalaal Wal Ikram ne teen cheezain yakjaa kar kay wadiyyat ki thee.

Un mein

(1)- *Ilm aur us par saheeh amal.

(2)- *Kaamil zohad

(3)- *Amar bil maroof wa nahi anil munkir* Mein aik Aala ikhlaaq ka namoona thay.

Imam Sahib Rahimahullah kay mutalliq *Shaykh Yaaseen Yousuf Maraakashi* kehtay hain keh:

“Main ne Imam Nawawi ko pehli martaba uss waqt dekha jab wo 10 saal ki umar kay hon gey. Imam Rahimahullah ko doosray bachhay apnay sath khilaaney pay bazidd thay aur wo un say darguzar kr kay katraatay thay lekin bacchay musalsal israar kar kay tang kar rahay thay aur yeh baccha (Imam Nawawi Rahimahullah) ro rahay thay aur iss haalat mein bhi waqfa waqfa say tilawat-e- Qur’an ko wird-e-zubaan banaye huway thay. Un ki Qur’an say yeh mohabbat dekh kar mein shashdar reh gya aur unkay ustad-e-muhtaram kay pass jaa kar kaha kay iss bacchay par khasoosi tawajjo dijiye. Unho ne kaha ‘kea tu nujoomi qism ki koi cheez hai?’

Main ne kaha ‘Har giz nahi….yeh alfaaz to shayad Allaah ne hi mujh say aap kay saamnay kehlwaaye hain.

Ustaad-e-mohtram ne un kay waalid say iss baat ka tazkirah kiya to unho ne iss bacchay(Imam Nawawi Rahimahullah) ko deen hi kay liay waqf kar diya. Bulooghat say pehlay hi Qur’an Majeed naazrah khatam kiya aur aagay padhnay ki lagan iss arsay mein badhti rahi.”

 Raah-e-ilm ki takaaleef-o-alaam:

Apni aap-beeti mein likhtay hain kay meri umar jab 19 baras ki thi to mere waalid mujhe Damishq lay aaye aur aanay ka maqsad sirf aur sirf tehseel-e-ilm hi tha.

Iqbal ne kea khoob kaha hay.

 “Tujhay kitaab say mumkin nahi faraag kay tu!”

 “Kitaab khuwaa’n hai, magar saahib-e-kitab nahi.”

Shayad Imam Nawawi Rahimahullah bhi apni iss awwa’il umri hi mein issi baat ka suraagh paa gaye thay kay Ilm kay bagair zindagi Laa yaa’ni o be maa’ni hai. Khud hi farmaatay hain kay:

 “Main Madarsa-e-Radahiya mein rehne laga. 2 saal aise guzaaray kay thakan say choor honay kay bawajood ik pal bhi araam na kiya. Madrasa ki rookhi sookhi roti per ba-khushi guzara karta tha aur *Tanbeeh* jesi kutub main ne taqreeban 4.5 maah mein yaad kr li aur main ne *Muhazzab* ki ibaraat ka 1/4 hissa bhi yaad ker liya.

Phir main Shaykh Is’haaq Maghribi kay pass reh ker Sharah-o-Tasheeh-e-kutub (nazr-e-saani) ka kaam karnay laga aur un kay pass diljamma’ee say kaam kiya”.

Khud hi farmaatay hain kay Allah ne mere auqaat-e-kaar mein itni barkat di thi aur main ne bhi iss say faaida uthaatay huye ussay behtar say behtar tareeqay per istemaal kiya.

Aap kay shaagird farmaatay hain kay Imam Sahib ne mujhe bataya kay main 12 sabaq padhta tha. 2 sabaq Waseet kay, 1 sabaq Muhazzab ka, 1 sabaq Jam’a ba’in assaheehain ka, 1 sabqa Saheeh Muslim ka, 1 sabaq ilm-e-nahaw mein Ibn Jinni ki Lamma ka, 1 sabaq Ibn Sikeet  ki Islah-e-mantiq, 1 sabaq Sarf ka aur ek sabaq Usool-e-Fiqh  ka. Kabhi Abu Is’haaq ki Lamma ka aur kabhi  Fakhar uddin Raazi ki Muntakhib ka aur 1 sabaq Asmaa Urrijaal ka aur 1 sabaq Usool-e-deen ka aur main in tamaam kutub ke muta’aliqaat (yani mushkilaat ki sharah aur Ibaarat ki tauseeh aur zabt-e-lughat kay baaray mein note ya hawaashi) likhta.”

Shayad Imam Rahimahullah ki issi aadat ne unki tehreeraat ko itna mudallal bana dia kay un per tanqeed karna jooye sheer laanay kay mutradif ho gya. Farmaatay hain kay mujhay ilm-e-tibb seekhnay ka bhi shauq payda hua lekin baad mein apni tabeeyat ka melaan deen hi ki taraf dekh ker kuch arsa iss sho’bay mein ser khapaanay kay baad waapis apni asal ki taraf aa gya.

 *Shuyookh o Usatza:

 

• Abu Ibrahim Is’haaq bin Ahmad Maghribi,
• Abu Muhammad Abdur Rehman bin Nooh al Muqadasi,
• Abu Hafs Umer Bin Assad Arrabayi Adduryli,
• Abu Al Hassan Salar bin Hassan Adduryli,
• Abu Is’haaq Ibrahim bin Eesa Almuraadi,
• Abu Albuqaa Khalid Bin Yousuf Annablusi,
• Saneaa Bin Tamaam AlHanfi,
• Abul Ibaad Ahmad bin Saalim Almisri,
• Abu Abdullah Muhammad bin Abdullah bin Maalik Al Jayani,
• Abu al Fath Umer bin Nabdar,
• Abu Is’haaq Ibrahim bin Ali Al wassti,
• Abu Al Abbas Ahmad bin Saalim Al Misri,
• Abu al Abbas Ahmad bin Abdul Daatum al Muqaddassi,
• Abu Muhammad Ismaail bin Abi Alyassr al Tunookhi,
• Abu Muhammad Abdur Rehman bin Saalim Al Anbaari,
• Abu Abdur Rehman Bin Muhammad Bin Qudama al Qudassi,
• Abu Muhammad Abdul Aziz bin Muhammad Al Ansari.

Iss kay Ilawa bhi unka Zauq-o-shauq dekhtay huye umeed-e-waasiq hai kay mashaa’ikh ki tadaad be shumaar hogi lekin taareekh iss tafseel say khaamosh hay.

Shaagirdaan-o-talaamizah:

• Ataa ud Deen
• Attaar abu Al Abbas Ahmad bin Muhammad al Jaaffri
• Abu al Abbas Ahmad bin Faraj Al Shibli
• Ar Rasheed Ismaail Bin Muallim Al hanfi
• Abu Abdullah Muhammad bin abi Al Fath Hanbli
• Abu al Abbas Ahmad Al Dhareer Al Wassti
• Jamaal ud Din Sulaiman bin Umer Addura’e
• Abu Alfaraj Abdul Rahmub bin Muhammad Al Qudassi
• Al Badar Muhammad bin Ibrahim bin Jama’at
• Al Shams Muhammad bin Abi Bakr Bin Al Naqeeb
• Al Shahaab Muhammad bin Abdul Khaaliq Al Ansari
• Al Sharf Habahu Allah bin Abdur Raheem Al Baari
• Abu al Hajjaaj Yousuf bin Abdur Rahman Numra

Iss kay ilawa Shaagirdaan-e- Rasheed ki itni taadad hay kay qalm likhnay say qaasir hay.

Ilmi khidmaat:

Jesa ke imam sahab apni aapbeeti mein khud likh chuke hain ke mujhe usatazah se asbaaq lety waqt un par apni raye hawaashi(foot note) ki surat mein likhne ki aadat thi isi se andaaza lgaya ja skta hai ke kam hi aese taalib-e-ilm hon gy jo ilm ke shaaiq hon, aur aese tou shaaz hi honge ke jo zamaana’taalib-e-ilmi hi mein tahqeeq aur justajoo ke maidan mein utar padein. Isi pemaane par parakh lijiye ki unki tasaaneef kis paya ki hon gi un kutub mein se

• *Saheeh muslim ki shraah,*
• *Tahzeeb al-asmaa wa al-lughaat,*
• *Kitaab ul azkaar* aur
• *Riyaaz-us-sualiheen*

 jaisi nihayat aham kutub shamil hain.

In se hazaarun nahin laakhon log faizyaab ho rahe hein. Haalaat aur qaraain yeh batlaaty hein ke imam sahab ke ilmi shauq ki wajah se unhon ne degar tasaaneef bhi likhi hongi agarchy jo naam hum ne daraj kiye hain un ke ilaawa bhi kuch ke naam ma’loom hain magar marwar-e-zamaana aur ishaa’at(publishing)  ki aaj jesi sahulatun ke fuqdaan ki wajah se jahan deegar ulma-e-kiraam ki kayi kutub napaid ho gayin, wahin imam sahab ki kuch kutub ke muta’liq bhi yeh shu’bah zaahir kiya jata hai.

*Maut-ul-Aalim_Maut-ul-Aalam:*

• Imam sahab rahimullah apni aamad ke baa’d 28 saal Damishq mein guzaarne ke baad apne mulad-e-nawawi mein wapis tashreef laye gaye taa’ke apne aa’baayi watan mein rehne walon ko raah-e-hidayat se faizyaab kr sakein aur unki sahih rah’numayee karein.
• Kuch arsa baa’d hi mukhtasir si bemaari ke baa’d 474 hijri mein inteqaal huwa.
• Janaaza mein itni kaseer ta’daad mein log shareeq hue ki baqaul e shakhs:
• “Is se pehle itne ashkhaas ki kisi janazay ke mauqa pr ikhattay  hone ki nazeer kam hi milti hai.”