Imam Darimi  (رحمه الله)

Imam Darimi Rahmatullahi alayhi keh Mukhtasar Haalaat e zindagi

Naam o nasab aur nisbat:

Abu Muhammad Abdullah bin Abdur Rahman bin Fazal bin Bahraam bin Abdus Samad Al Tameemi Al Darimi Al Samarqandi.

Aap Imam Darimi keh naam se mash’hur hain ye Banu Darim bin Malik bin Hanzala bin Zayd bin Manat bin Tameem ki taraf nisbat hai. (Lubbul Lubaab 1/308) Aap ki nisbat mein Tameemi bhi milta hai. Ye Tameem bin Murrah ki taraf nisbat hai jo Banu Darim keh aabaa-o-ajdaad mein se they. (al ansaab: 1/478)

Aap ko samarqandi bhi kaha jata hai ye samarqand ki taraf nisbat hai jo mawara un nahr ka aik azeem sheher hai aur yahan be-shumar ulama-o-afazil paida huye. Imam Darimi Rahmatullahi alayhi bhi isi sheher mein paida huye.

Imam Darimi Rahmatullahi alayhi keh tazkarah naweeson ne ye tafseel nahi likhi ke aap ne ibtidai ta’leem kahan se hasil ki. Isi tarah aap ke rehlaat-e-ilmiya ke baare mein bhi tafseelaat Qalam band nahi ki balkeh yehi zikr kiya hai keh aap Hadees-e-Rasul sallallahu alayhi wa sallam ki tehseel keh liye bohat zyada safar karne walon mein se aik they. Isi tarah Hadees-e-Nabawi ko jama karne walon aur hifz karne walon mein se aik they aur saqaafat-o-Sadaqat, zuhd-o-wara’ aur hifz-o-itqaan jaisi azeem sifaat se muttasif they.

Asaatza e  kiraam:

Imaam Darimi Rahmatullahi alayhi ne hadees, fiqh aur deegar ‘uloom keh bade bade mahireen se kasb e faiz kiya, in tamaam shuyuk-o-asatzah ka tazkirah aik hi jagah karna bade taweel waqt ka mutaqazi hai. Chand keh naam ye hain:

Ibrahim bin Munzir al Hizami, Ahmad bin Is’haq al Hazrami, Ahmad bin al Hajjaj al Marwazi, Ahmad Hameed al Kufi, Ahmad bin Abi Shoaib al Hirani, Ahmad bin Abdur Rahman bin Bakaar al Basri, Adam bin Abi iyaas, Ishaaq bin Isa bin at Tabaa’, Ismail bin Abi Awais, Al Aswad bin Aamir Shaazaan, Bashar bin Sabit al Bazaar, Ja’far bin Awn, Hibaan bin Hilaal, Hajjaj bin Minhaal, Al Hasan bin Ahmad bin Abi Shoaib al Harrani, Al Hasan bin Ar Rabee’ al Bajali, Al Hakam bin al Mubarak, Abu Alimaan al Hakam bin Nafe’, Haiwatu bin Shuraih al Hamsi, Khalid bin Mukhallad, Khalifa bin Khiyat, Rooh bin Aslam, Zakariyya bin ‘Adi, Zayd bin Yahya bin Ubaid ad Dmashqi, Sa’d bin Hafs at Talhi, Saeed bin Mansur, Suleman bin Harb, Sadqa bin al Fadl al Marwazi, Abu Asim ad Dahhaak bin Mukhallad, Asim bin Ali bin Asim, Asim bin Yusuf, Abdullah bin Ja’far Ar Raqi, Abdullah bin Imran al Asbahani, Abdullah bin Yahya as Saqafi, Abdur Rahman bin Ibrahim Daheem, Abdus Samad bin Abdul Waris, Abdul Wahhab bin Sa’d ad Damishqi, Abdaan bin Usman Al Marwazi, Ubaidullah bin Musa, Usman bin Umar bin Faris, asmat bin al Fadl an Naisapuri, Affan bin Muslim, Ali bin Abdul Hameed Al Ma’ni, Umar bin Hafs bin Ghiyas, Amr bin Zaraarah an Naisapuri, Amr bin Asim al Kilabi, Amr bin Awun al Wasti, Al Alaa bin Aseem, Fazwah bin Abi Al Mughraa, Abu Naeem al Fadal bin Dakeen, Abu Ubaid al Qasim bin Salaam, Al Qasim bin Kaseer, Qabeesa bin Uqba, Muhammad bin Salaam bekandi, Muhammad bin Abdullah Ar Raqashi, Muhammad bin Yusuf al Faryabi, Mukhallad bin Malik Ar Razi al Jamal, Marwan bin Muhammad at Taatari, Makki bin Ibrahim, Naeem bin Hammad, Harun bin Muawiya al Misisi, Yahya bin Yahya an Naisapuri, Yazid bin Harun, Ya’la bin Ubaid at Tanafasi, Yusuf bin Yaqub as Saffar, Yunus bin Muhammad Al Moaddab.

Imam Darimi keh talameez:

Imam Muslim bin Hajjaj Qushairi, Imam Abu Dawood Sulaiman bin Ash’as, Imam Muhammad bin easa Tirmizi, Ibrahim bin Abi Talib an Naisapuri, Ahmad bin Muhammad bin al Fadal al asijistani, Is’haq bin Ibrahim Abu Yaqub Al Wariq, Baqi bin Makhlad al undulusi, Dawood bin Suleman Al Qataan, Abdullah bin Ahmad bin Hanbal, Abdullah bin Muhammad bin Salih as Samarqandi, Abu Zura’a Ubaidullah bin Abdul Kareem Ar Razi, Ubaidullah bin Wasil al Bukhari al Hafiz, Umar bin Muhammad bin Bajeer al Bujairi, Abu Saeed Amr bin al Hasan Al Jazari, easa bin Amr bin al Abbas as Samarqandi, Abu Hatim Muhammad bin Idrees Al Razi, Muhammad bin Ismail Al Khibaari, Muhammad bin Bashaar Bundaar, Muhammad bin Abdullah bin Suleman Al Hazrami, Muhammad bin Abdoos bin Kaamil As Siraj, Muhammad bin Musa bin Huzail an Nisfi, Muhammad bin An Nadr al Jarudi, Muhammad bin Naeem bin An Naisapuri, Muhammad bin Yahya az Zahali, Makki bin Muhammad bin Ahmad bin Maahaan al Balkhi al Hafiz.

            Imam darimi ramatullah alaih muhaddseen  w muarrkhen ki nazar me :

• Imam Ahmad bin Hanbal Rahmatullahi alahi frmate hen : “Abdullah bin Abdur Rahman Darimi par dunya (apni tamam tar zeb-o-zeenat ke saath) pesh ki gayi lekin unhone usey qubool nahi kiya.” (Siyar a’laam an Nubala’:220/12)

Muhammad bin Abdullah Makhrami Rahmatullahi alayhi kehte hain: “Ay ahle khurasan! Jab tak Abdullah bin AbdurRahman Darimi tumhare darmiyan maujud hain us waqt tak kisi aur keh paas apna waqt barbaad mat karo. (Tareekh Baghdad: 30-31/10, Siyar A’laam an Nubala’: 226/12)

• Abu Hamid bin Ash Sharqi kehte hain: “Khurasan ki zameen ne 5 a’imma-e-hadees paida kiye hain:

1. Muhammad bin Yahya
2. Muhammad bin Ismail
3. Abdullah bin Abdur Rahman
4. Muslim bin al Hajjaj
5. Ibrahim bin Abi Talib” (Siyar a’laam an Nubala’: 227/12)

• Raja’ bin Jabir al Murjaa kehte hain: “Maine Ahmad bin Hanbal, Is’haq bin Rahawiya, Ali bin al Madini aur Imam Shaazkoni ko dekha lekin Abdullah bin Abdur Rahman Darimi jaisa Hafiz kisi ko na paya.”

Balkeh farmate hain: “Maine Abdullah bin Abdur Rahman Darimi se badh kar Hadees-e-Rasool ka aalim koi nahin dekha.” (Tarikh e Baghdad: 31/10)

• Imam Zahbi Rahmatullahi alayhi ne “Siyar a’laam an Nubala’” ki barahwin mujallad mein Imam Darimi Rahmatullah alayhi ka tafseeli ta’arruf likha hai. Aaghaz-e-kalam mein aap raqm taraz hain keh “Imam Darimi Rahmatullah alayhi chand bade muhaddiseen mein se aik they. Aap darja e Imamat par fa’iz they aur hifz-o-zabt aap ka khususi wasf tha. (Siyar a’laam an Nubala’ 224/12)
• Imam Ibn Hibban Rahmatullah alayhi ne apni kitab “As saqafat” mein likha hai ki “aap bade mazboot hifz-o-zabt keh malik they aur un ahl-ullah mein se they jinhone das tareeqon se hadees ki khidmat ki:

1. Ahadees ko hifz kiya
2. Ahadees ko jama kiya
3. Ahadees mein samajhdari hasil ki
4. Majlis e hadees qayam ki
5. Hadees keh fan mein kitabein likhin
6. Apne sheher mein hadees ka charcha kiya
7. ‘Aml bil hadees ki taraf bulate rahe
8. Mukhalifeen-e-hadees ka qila quma kiya
9. Muhaddiseen-e-i‘zaam ka difaa’ kiya
10. Khud ‘aamil bil-hadees ka a’ala mansab paya. (kitab as saqafat: 364/8)

• Imam Abu Hatim bin Abi Shayba farmate hain: “Hifz-o-zabt mein Imam Darimi Rahmatullah alayhi ka mamla logon ki ta’reef-o-madah ka mohtaj nahin hai, wo bila rayb hifz-o-zabt keh baland maqam par fai’z they. (Tarikh e Baghdad: 32/10)
• Muhammad bin bashar kehte hain: “Dunia mein chaar logon ko ‘ala-al-itlaaq hafiz kaha jata hai:

1. Abu Zara’ ar Razi
2. Muslim bin Al Hajjaj al Qushairi
3. Abdullah bin Abdur Rahman ad Darimi
4. Muhammad bin Ismail al Bukhari (siyar a’laam an nubala’ 226/12)

• Khateeb Baghdadi apni “Tarikh” mein likhte hain keh “Imam Darimi Rahmatullahi alayhi aql ki ghaayat ki intiha ko pohanche huye they aur diyanat-o-hilm, zuhd-o-taqwa, ibadat-o-riyazat aur ijtihad mein zarbul misl they.” Tarikh-e-Baghdad: 29/10

Tasaneef:

Imam Darimi Rahmatullahi alayhi jaisi shakhsiyat jis keh beshumar asaatza hon aur jo ilm-e-deen keh liye beshumar safar kar chuka ho aur jis keh baare mein muhaddiseen aur mu’arrikheen keh (jaisa keh upar guzra) intihai umda aqwaal hon, taba’ee taur par wo zaroor apne peechhe aisi cheezen chhodta hai jo us keh liye sadqa-e-jariya hon. Talamizah keh alawa aap ne hadees-o-tafsir mein kitabein bhi likhin. Jin mein se chand (jin ko mehfooz kiya gaya) ye hain:

1. As Sunan: Sunan keh sath sath “musnad” ke naam se bhi ma’ruf hai. Beshumar dafa’ shaya ho chuki hai us keh asal makhtoot London, Qahera, Kualalumpur, Hyderabad, Diaishq aur Madina Munawwara keh maktabaat mein maujud hain. Urdu zaban mein pehli martaba tehqeeq-o-takhreej aur fawaid keh sath aap keh hathon mein hai.
2. At-tafsir: Imam Zahbi ne “Siyar a’alaam an nubala’” (228/12) mein is ka tazkarah kiya hai, na maloom is ka asal makhtoot kis jagah par hai.
3. Al-Jame’: Khateeb Baghdadi ne apni “Tarikh” mein is ka tazkarah kiya hai. (Tarikh e Baghdad 29/10)

Wafaat:

Imam Darimi 255 Hijri Yaum-e-Tarviya ko namaz-e-Asr keh baad apne Khaliq-e-haqiqi se ja mile. Unhein Yaum-e-Arafah ko Jumu’atul Mubarak keh din supurd-e-khaak kiya gaya.

Tafsili tazkarah keh liye mulaheza farmayen: Al ansaab az Imam Sam’ani (280/6), Tarikh e Baghdad (29/10), Tazkiratul Huffaz (534/2), Tehzeebul kamaal (210/15), Tehzeebut Tahzeeb (294/5). Al Haraj wat Ta’deel (99/5), Khulasatut Tahzeebul Kamaal (204), Ar Risalatul Mustatarfah (32), Tabqaat al Huffaaz (235), Shuzraat Az Zahab (130/2), Taqreebut Tehzeeb (429/1), Al Kamil fil Tarikh (217/7), As Saqaafat (364/8).

REFERENCE:

BOOK: “SUNAN DARIMI” (Urdu)

Tarjumah: ‘Binte Shaykh ul Hadees Hafiz Abdul Sattar Hammad’

Takhreej: ‘Abul Hasan Abdul Mannan  Rasiq’