Search
Sections
< All Topics
Print

10. Imam Muhammad bin Sabaab Dulaabi [D: 227]

Imaam Muhammad bin Sabaab Dulaabi (رحمه الله)

 

Naam-o-Nasab

 

Naam Muhammad, Abu Jaafar Kuniyat, Bazzar laqab aur walid ka naam sabaah hai, isse zyada nasab naama ki tafseel nahi maloom ho saki.

 

Wiladat

 

Muarrikheen aur Ulama e tabaqat o rijaal ne unke san wilaadat ki tasreeh nahi ki hai lekin unki wafaat 227 Hijri mein huyi aur Khateeb ne likha hai ki us waqt sattar 70 saal se zyada umar thi, Allamah Zahabi aur Hafiz Ibn Hajar ka bayan hai ki wafaat ke waqt 77 saal ke the. Iss aitebaar se vo 150 Hijri mein paida huye honge.

 

Khandaan

 

Unke khandaan ka Qabeela mazniya se wilaa ka talluq tha, is bina par Muzni ki nisbat se mash hoor huye.

 

Watan

 

Unki Nisbat Dulaabi ke mutalliq Ikhtilaaf hai, baaz logon ke nazdeek Dulaabrey ek gaaon ka naam hai jahan vo paida huye the. Allamah Sama’ani ka khayal hai ki Dulaab Rahat aur khurchi ko kehte hain jo shakhs uska pesha karta ho ya jiske paas khurchi ho use Dulaabi kaha jata hai, Abu Jaafar Muhammad bin Sabaah ko bhi isi bina par Dulaabi kaha jata hai, Yaqoob hamwi ke nazdeek Dulaab naam ke mutaddad maqamaat the, Abu Jaafar Dulaabi ka talluq Dulaab mahaarak se tha jo baghdaad ke mashriqi janib waaqe’ hai, aakhir mein unhone Baghdad mein sukoonat ikhtiyaar kar li thi.

 

Asaatzah

 

Abu Jafar Dulaabi ne nihaayat bargazeedah aur Jaleel ul Qadr muhaddiseen se ahaadees ki riwayaat ki hai, baaz shuyookh ke naam ye hain.

Ibrahim bin Saad, Ibn Abi Ubaidah Haddad, Ismail bin Jaafar, Ismail bin Zakariya khalqaani, Ismail bin uliya, Hfs bin Ghayaas, Khalid bin Abdullah waasti, Saeed bin Muhammad Warqaa, Sufyan bin Uyanah, Qazi shareek bin Abdullah, Abdurrahman bin abi Asnaad, Abdullah bin mubarak,Umar bin Younus Yamami, Abu qat’an Umru bin Hasheem, Fazal bin Musa Seenaani, Hasheem bin basheer, Waleed bin Abi soor, Waleed bin Muslim, Yazeed bin Haroon, Yousuf bin yaqub,Maajsoon waghairah.

 

Talamizah

 

Unke talamizah mein bhi mumtaz muhaddiseen shamil hain, chand ke naam ye hain:

Ibrahim Harbi, Ibrahim bin Haani, Ibrahim bin Yaqub Joozjaani, Ibn Abi Khuzaymah, Ibn abi Ad Duniya, Abu Hatim Raazi, Abu Zar’a Damishqi, Abu Zur’a Raazi, Abu qudamah sarkhasi, Ahmad bin Hanbal, Abu Ya’ala Ahmad bin Ali moosli, Ahmad bin Muhammad bin Sabaah, Ahmad bin Mansoor Rumaadi, Ahmad bin Yahya halwaani, Ismail samwiya, Hasan bin Ali khilal, Hasan bin Muhammad Sabaah Zaafraani, Dawood bin Sulaiman daqaaq, Abdullah bin Hanbal, Abdul Malik bin Abdul Hameed maimuni, Usman bin Sayyad Darimi, Isa Ibn Abdullah Tiyalsi, Fazal bin sahal Airaj, Abul Ulaa Muhammad bin Ahmad Jaafar, Muhammad bin basheer bin matar, Muhammad bin Ghalib tamtaam, Muhammad bin Yahya Hurrani, Muhammad bin Yahya zahli, Yahya bin Muayyen waghairah.

Ayimma Sihah aur ashaab-e-Sunan mein, Imam Bukhari,Imam Muslim aur Abu Dawood ne raahe raast aur dusray ayimma ne Imam Bukhari ke waaste se unse riwaayat ki hai, Sahih Bukhari me 12 aur Sahih muslim mein 20 hadeesein unke waasta se marwi hain.

 

Hifz-o-saqaahat

 

Ulamaye fan ne bittafaaq unko Siqah wa zaabit qarar diya hai. Imam Ahmad farmatey thay ki vo hamare Sheikh aur nihaayat buzurg hain, Ibn maeen ka bayan hai ki Dulaabi Siqah wa mamoon thay, Ahmad A’jli ne unko Siqah, Abu Hatim ne Siqah, qabil-e-hujjat aur mustanad kaha hai aur Ibn Hibban ne saqaahat mein shamil kiya hai, tamtaam jab unke waaste see hadees bayan karte hain to kehte, ham se Muhammad bin Sabaah Dulaabi ne jo Siqah-o-mamoon thay, riwaayat ki hai, Yaqub bin Shayba ka bayan hai ki vo Siqah, Sahib-e-hadees aur hasheem ke marooyaat ke sabse zyada mumtaz a’alim thay, Salma ne unko Siqah aur mash hoor muhaddis aur Zahabi ne Siqah-o-hujjat qarar diya hai.

 

Zuhad-o-taqwa

 

Tadeen-o-taqwa aur zuhad-o-salaah mein bhi nihaayat mumtaz thay, Allamah Ibn A’di farmatey hain ki Vo bade Saaleh aur neik buzurg thay.

 

Izzat-o-ehteraam

 

Ilmi wa deeni haisiyat se unki shakhsiyat itni mumtaz thi ki Ulama-o-salhaa har tabqa mein yaksaan maqbool thay, Imam Ahmad unki badi tazeem karte thay.

 

Wafaat

 

Taqreeban 77 saal ki umar mein Baghdad mein Muharram 227 Hijri mein inteqaal kiya.

 

Aulaad

 

Muarrikheen ne unke ek sahab zaade Ahmad ka zamnan tazkirah kiya hai jo bade Sahib-e-kamaal muhaddis thay.

 

Tasneefaat

 

Unki tasneefaat mein ek majmua Sunan ka muarrikheen aur Ulamaye tabqaat-o-rijaal ne zikr kiya hai. Zahabi ke bayan se malum hota hai ki Sunan-o-ehkaam se mutallaqa riwayaat ka ye ek mukhtasar magar muntakhib aur mustanad majmua tha.

 

REFERENCE:
Book: “Tazkeeratul Muhadiseen”
Taleef: ‘Ziya Uddin Islaahi’

 

 

Table of Contents