IMAM ISHAAQ BIN RAHWIYA (رحمه الله)

 

Naam-o-nasab aur nisbat:

 

Aapka naam Ishaaq, Kuniyat Abu Yaqoob aur Ibn Rahwiya ye laqab tha. Shajarah-e-nasab kuch is tarah hai: Ishaaq bin Ibrahim bin Mukhlid bin Ibrahim bin Matar bin Ubaidullah bin Ghaalib bin Abdul waaris bin Ubaidullah bin Atiya bin Murrah bin Kaab Ibn Hammam bin Asad bin Murrah bin Hanzalah bin Maalik bin Zaid bin Manaat bin Tameem.

Imam Ishaaq ke waalid Ibrahim Shukm-e-maadar hi mein they ke inki waalidah ne Makkah muazzamah ka safar kiya, isi safar mein kisi muqaam par inki wiladat hui, iss liye ahle Maru inhe Rahwi ya Rahwiya yaani raaste waala kehte the. Aam airaab (اعراب) Rahwiya hai aur kuch Nahwi wa muhaddis Rahwiya bhi padhte hain aur Nahwi isko seebviya (سیبویہ) ke wazan par Rahwiya padhte hain.

 

Wilaadat:

 

Ibn Rahwiya ba-riwayat saheeh 161 Hijri mein paida huye,162 Hijri aur 163 Hijri ki riwayatein bhi milti hain.

 

Khandaan wa watan:

 

Inka watan Khurasaan ka mash-hoor shehar Maru tha lekin unhone ne Nishapoori  mein mustaqil sukooniyat ikhtiyar karli thi, issi liye Mrwazi aur Nishapoori  kehlaate the, Tamimi aur Hanzili ki nisbaton se inka Arabi nasal hona zaahir hota hai.

 

Mashayekh Karaam:

 

Inke mash-hoor mashayekh ke naam yeh hai.

Abu Osama, Abu Bakr, Bin Eyaash, Abu Mawiya, Isbaath bin Muhammad, Ismail bin oliya, Bashar bin Mafzal, Baqiya bin Waleed, Jareer bin AbdulHameed Raazi, Haatim bin Ismail, Hafs bin Ghiyaas, Sufyan bin Aina, Suleiman bin Naafe Abdi, Suwaid bin Abdul Aziz, Shoaib bin Ishaaq, Abdur Rahman bin Mahdi, Abdur Razzaq bin Hammam, Abdul Aziz Darawardi, Abdullah bin Mubarak, Abdullah bin Wahhab, Abdah bin Sulaiman, Abdul Wahhab Thaqafi, Etaab bin Basheer Jazri, Umar bin Haroon, Isa bin Yunus, Ghandar, Fuzail bin Eyaz, Muhammad bin Bakr Barsani, Muhammad bin Salma Harrani, Maaz bin Hisham, Moatamar bin Sulaiman, Nadhar bin Shumail, Wakiya bin Jarah, Waleed bin Muslim aur Yahya bin Qaazeh Waghairah.

 

Imam Ishaaq ke Tilamazah:

 

Imam Ishaaq Ibn Rahwiya ke tilamazah ke mukhtalif tabqaat hen.

• Unke baaz asaatzah baqiya bin waleed, Muhammad bin Yahya Zahli aur Yahya bin Adam waghairah.
• Aur Muasireen mein Ahmed bin Hanbal, Ishaaq bin Mansoor kosaj, Muhammad bin Raafe aur Yahya bin Muayyen
• Aur rishtedaaro mein bete Muhammad ne bhi istefaadha kiya hai aur Sahah sitta musannif mein Imam Ibn Majah ke alawa sabko inse sharf tilmiz haasil hai.
• Baaz aur mumtaaz tilamazah aur muntasbeen ke naam hasb -e-zail hai:

 Ibrahim bin Abi Talib, Ahmed bin Salama, Ishaaq bin Ibrahim Neshapoori , Jaafer Faryabi, Hassan bin Sufiyan, Zakariya Sajri, Abu Abbas Siraj, Abdullah bin Abdur Rahman Daarmi, Abdullah bin Muhammad bin Sherwiya, Muhammad bin Aflah, Muhammad bin Nasr Maroozi aur Moosa bin Haroon waghairah.

 

Talab-e-Hadees ke liye Safar:

 

Allama Ibn Asaakar aur Haafiz Ibn Hajar ne aapke kasrat-e-safar (Fataaf albilaad talab al Hadees)(Hadees ki talab wa tahseel ke liye mukhtalif shehron mein phire) kehkar zikr kiya hai.Aur  Khateeb ne likha hai ke Hijaaz, Iraq, Yemen aur Sham waghaira marakaz Hadees ka safar kiya aur Baghdad mein kayi baar tashreef laaye, Iraq ka safar 23 saal ki umar mein 174 hijri mein kiya tha.

 

Ilm-o-Fazal ka Aiteraaf:

 

Ishaaq bin Rahwiya buland paaya ahle Ilm mein the, Mu’asireen Ulama aur Asaateen fan inke fazal wa kamaal aur Ilmi azmat wa buland payegi ke intehayi mu’atraf hain.

Imam Ahmed ibn Hanbal jo inke bade madah aur qadardaan they, farmaate hain: “Khurasaan wa Iraq mein inka koi hamsar nahi, Baghdad ke us pul ko inse zyada azeem wa bartar kisi aadmi ne abwar nahi kiya, goya baaz masail mein hamara aur inka ikhtelaaf hai aur ahle Ilm ke darmiyan toh ikhtelafaat hua hi karte hain”.

Ek martaba Ishaaq ke sahabzaade Muhammad inki khidmat mein husool Ilm ke liye haazir huye to irshaad hua ke tumhaare apne waalid se wabasta rehna zyada mufeed aur behtar hai inse zyada pur azmat aadmi tumhaari aankhon ne na dekha hoga.

Muhammad Aslam kehte hain ke agar Imam Thawri zinda hote to Ishaaq ke Ilm wa fazal se beniyaaz nahi rehte.

Ahmed bin Saeed Rubaati ka qaul hai ke Ibn oyaina aur Hammad bhi inke mohtaaj hote.

Muhammad bin Yahya sifaar ne suna toh kaha ke agar Hasan Al Basri zinda hote toh aksar cheezon mein inko Ishaaq ke janib ruju karna padta.

Ibn Khuzaimah ka bayan hai ke agar who taba’een ke zamane mein hote toh woh log inke Ilm wa fazal ke mu’ataraf hote.

Naeem bin Hammad farmaate hain ke agar koi Khurasaani Ishaaq bin Rahwiyah ke Ilm wa kamaal mein kalaam ya nukta cheeni karte toh ise muttaham (متہم) fiddeen samjho.

Imam Zahabi  ne “ Siyar A’lam al-Nubala” mein inhe sheikh al mashriq aur sayyid al huffaz kaha hai.

Saeed bin Zuaib farmaate hai ke roye zameem par Ishaaq ke maanind maine koi aadmi nahi dekha.

Abu Yahya Sheraani ka bayan hai ke Ilmi mazakerah ke waqt woh yakta aur ryagaana maloom hote the.

Yahya bin Yahya ka bayaan hai ke Khurasaan mein Ilm ke do khazaane the: Ek Muhammad bin salaam Baikandi ke paas, doosra Ishaaq bin Rahwiya ke paas hai.

Husain bin Mansoor bayaan karte hain ki aik roz mein Yahya aur Ishaaq ke hamrah ek shakhs ki iyaadat karne gaya, jab hum log iske ghar gaye, paas pahunche toh Ishaaq peeche hogaye aur Yahya se kaha: pehle aap daakhil ho kyun ke aap hum se umar mein bade hain, unhone kaha: Beshak main umar mein bada hoon lekin Ilm wa fazal mein aap faayeq hain, isliye pehle aap hi chalein.

Haafiz ibn Abdul Birr Raqam taraaz hain” Woh jaleel al qadr Ulama aur naamwar muhaddiseen wa huffaz Ulama mein they.

 

Sharf Imamat:

 

Ishaaq bin Rahwiya ka shumaar in ayimma mein hota hai jo Sahib-e-mazhab, Faqih wa Mujtahid the. Magar ab inka Fiqhi aur ijtehaadi mazhab mit chuka hai lekin ek zamane mein ye bhi musalmaano ka mamool ba maslak raha hai.

Imam Ahmed aur Imam Nasai inke mutaliq farmaate hai:”Yaani musalmaano ke ayimma mein se ek Imam yeh bhi hai.

Ek martaba Imam Ahmed se inke bare mein dariyaft kiya gaya toh farmaya ke who musalmaano ke Imam hain, hamare nazdeek Shafa’i, Hameedi aur Ishaaq teeno Imam hain.

Muhammad bin Yahya Zehli ka bayan hai ke ek din Baghdad ke maqaam Rasaafa mein ayimma Muhaddiseen Imam Ahmed aur Yahya bin Maeen waghaira jama the lekin majlis sadaarat par Ishaaq bin Rahwiya rounak afroz the aur wo hi is majlis ke khateeb bhi they.

Muhammad bin Nasr farmaate hai: woh hamaare aur hamare mashayekh ke sheikh they.

Fazal sheerani kehte hain : Woh bila shak shubah Khurasaan ke Imam they.

Haafiz Ibn katheer farmaate hai:” أحد الأعلام و علما الاسلام”

Allama ibn Sabki Tehreer farmaate hai:” أحد أئمة الدين و اعلام المسلمين و هداة المومنين”

Doosre murakheen ne bhi inko “ أحد أئمة الإسلام أحد أئمة المسلمين و علما من اعلام الدين”

Imam mashriq aur aalim Nishapoori waghaira likha hai.

 

Ilm Hadees mein Kamaal wa Imtiyaz:

 

Ilm-e-Hadees se inko khaas talluq tha aur woh akaabir Muhaddiseen aur  namur huffaz mein shumar kiye jaate hain, Khaleeli ka bayan hai ke woh “Shehenshah hadees they” hadeeson ke nashr-o-ishaa’t, dars wa muzakarah , hifz wa zabt aur hazam wa ehtiyaat ke liye inki zaat badi ahmiyat aur shohrat rakhti hai, zail mein inki chand khusoosiyat ka zikr kiya jaata hai.

 

Hifz wa zabt:

 

Ishaaq bin Rahwiya ka haafiza ghair maamooli aur yaadaasht hairat angez thi, Ibn Hibban, Khateeb Baghdaadi aur Ibn Asaakar waghaira ne inki jaamiyat ka aiteraaf kiya hai.

Imam Ibn Khuzaimah farmaate hain ke agar Ishaaq taaba’een ke hadd mein hote toh woh log bhi inke haafize ke mu’ataraf hote.

Qutaiba bin Saeed ka bayaan hai ke Khurasaan ke namur huffaz mein Ishaaq bin Rahwiya aur inke baad Imam Daarmi aur Imam Bukhari the.

Abu Yahya Sheerani kehte hai ke maine inke haath mein kabhi kitaab nahi dekhi who hamesha yaaddasht se hadeesein bayan karte they. Inka khud bayaan hai ke maine kabhi koi cheez qalamband nahi ki jab bhi mujhe koi hadees bayan ki gayee maine ise yaad karliya. Maine kisi Muhaddis se koi hadees kabhi dubaara bayan karne ke liye nahi kaha.Yeh kehne ke baad unhone poocha : kya tum logon ko is par tajjub hai? Logon ne kaha ji haan? Yeh hairat ki baat hi hai. Unhone kaha : Jis cheez ko main ek marataba sun leta hoon woh mujhe yaad hojati hai. Sattar hazaar hadeesein har waqt mere nigah ke saamne rehti hai aur main inke mutalliq bata sakta hoon ke woh kitab mein kis jagah hai. Abu Dawood Khafaf ki riwayat ke mutabiq unhone ek laakh hadeeson ke mutalliq kaha ke woh meri nazar ke saamne hai. Main inka tazkirah kar sakta hoon. Ek dafa unhone gyarah hazaar hadeese I’mla karayee aur phir jab dubara kitaab se inki qaraat ki toh ek lafz ki bhi kami ya beshi nahi nikli.

Ahmed bin Salamah kehte hai ke inhone poori musnad ka zabaani I’mla karaya.        

Abu Haatim Raazi ne Abu Zar’aa se Ishaaq bin Rahwiya ke hifz asaneed wa mutoon ka zikr kiya toh unhone kahan ke inse bada Hafiz-e-hadees nahi dekha gaya.

Ahmed bin Salma ne Abu Haatim ko bataya ke unhone ne yaaddasht se apni tafseer ka I’mla karaya toh Abu Haatim ne kaha key yeh aur zyada hairat angez baat hai ke ki unke musnad hadeeson ka zabt tafseer ke asnaad wa alfaz ke zabt ke muqaable mein asaan hai.                                                                                                                

Ameer Khurasan Abdullah bin Taher ne ek martaba inse koi masala dariyaft kiya, unhone farmaya ke iske mutalliq sunnat yeh hai aur yahi ahle sunnat ka qaul hai lekin Imam Abu Haneefa  aur inke tilamazah ki raaye mukhtalif hai.Ibraheem bin Abi Saaleh wahan maujood they.

Bole: Ameer ul mumineen Ishaaq ghalat kehte hain. Abu Haneefa ka maslak isse mukhtalif nahi hai.

Unhone jawaab diya ki mujhe yeh masala yaad hai. Falan kitab ka falan juzz laiyye. Kitaab layi gayi aur Ibn Taher ne isko ulatna shuru kiya toh Imam Ishaaq ne kaha: Ameer ul mumineen!

Gyaarveh warq ki nauvi satar mein mulaheza farmaiyye.Chunanche iske andar who masala Imam ishaaq ke bayaan ke ayn mutabiq nikla. Ameer ne kaha: Humko maloom tha ke aapko masail azbar hai, lekin haafize ka yeh mushaahida hamare liye yaqeenan hairat angez hai.

 

Saqaahat:

 

Iss ghair mamooli hifz ke saath issi darje ki saqaahat bhi thi. Abu Haatim farmaate hain ke kaseer al hifz hone ke bawajood Imam Ishaaq ka zabt wa itqaan aur ghaltiyon se mehfooz wa mas-oon rehna hairat angez hai.

Khateeb Baghdadi waghairah likhte hain ke woh hifz wa saqahat dono ke jaame the.

Allama Zahabi ne inko siqah wa hujjat bataya hai.

Ibn Hibban ne unka siqaat mein zikr kiya hai.

Imam Nasai farmaate hai ke woh siqah wa mamoon they.

Imam Darimi ka bayaan hai ke Ishaaq apne sidq ki wajah se ahle maghrib wa mashriq ke sardar bangaye they.

Imam Ahmed ko inke sidq wa saqahat par itna aitemaad tha ke ek dafa unhone inse koi hadees poochi, jab Imam Ishaaq ne ise bayan kiya toh ek shakhs ne aiterazan kaha ke wakeey ne yahi riwaayat is se mukhtalif tareeqa par bayan ki hai. Imam Ahmed ne barafarukhta hokar kaha: Khamosh raho, jab Abu Yaqub Ameer al mumineen fil hadees koi riwayat bayaan kare toh ise bila tammul qubool karlena chahiye.

 

Hazm wa Ehtiyaat:

 

Iss hifz ke saath itne mohtaat they ke bachpan mein unhone Abdullah bin Mubaarak se hadeese suni thi magar inko riwayat nahi karte they ke ehtiyaat ke khilaaf hai.

 

Hifaazat wa asha’at hadees:

 

Unki zaat se Hadees-e-Nabawi ki badi asha’at aur Sunnat-e-Nabawi ka bada ihyaa hua. Haafiz Ibn Hajar likhte hain ke “ Ishaaq bin Rahwiya ne sunnaton ka difa aur mukhalifeen hadees ka qila’a qama (قلع قمع) kiya”.

Wahab bin Jareer ka bayan hai ke Allah Ta’ala Ishaaq, Sadqa aur Yamur ko inki Islami khidmaat ka sila ataa farmaaye. Inlogon ne mashriq ki sar zameen mein hadeeson ki isha’at aur Sunnat-e-Nabawi ka ihya kiya.

 

Fiqh wa Ijtehad:

 

Hadees ki tarah Fiqh wa Ijtehaad ke bhi maahir they. Abu Ishaaq Shiraazi ,Haakim sahib Mustadarak aur khateeb ne inko fiqh wa ijtehaad mein jaame’e aur akaabir Fuqaha mein shumaar kiya hai. Haafiz ibn katheer ne” احد المجتھدین من الانام” aur Ibn Hibban ne namwar wa mumtaz Fuqaha mein inko shumaar kiya hai. Ek martaba Imam Ahmed bin Hanbal se inke bare mein sawaal kiya gaya toh farmaaya ke Ishaaq ke maanind kaun ho sakta hai. Aise hi logon se masaail dariyaft karna chahiye. Hum log bhi inse fatwe poochte hain.

Gharz Fiqhi haisiyat se bhi inka paya bahut buland tha aur woh musallama Imam aur sahib mazhab Fuqaha mein hai aur mutaddid Ulama ne inka Muhaddis ke bajaye Faqih wa mujtahid  hi ki haisiyat se zikr kiya hai. Kutub khilaaf mein inke aqwaal wa fatawa aur Fiqhi wa ijtehaadi takhreejat maujood hai. Imam Tirmizi ne apni “Sunan” mein aur  Ibn Rashad Maalki ne kitaab” بدایۃ المجتہد” mein aksar Imam Ahmed ke saath Ishaaq ke aqwaal bhi naqal kiye hain. Ek zamane tak musalmaano mein Ishaaq ka mazhab rayej raha.

Haafiz Ibn Al Qayyim likhte hain ke “Muhammad bin Ishaaq Imam Al ayimma ke laqab se mausum kiye jaate the. Inke mutba’een inke mazhab ki pairvi karte the. Woh muqallid ke bajaye khud Imam mustaqil aur sahib-e-mazhab theyn. Bayhaqi ne Yahya bin Muhammad Anbari ke hawale se likha hai ke Ashaab hadees ke paanch tabqe hai:

• …Maalikiyya (2) Shaafiyya…  (3) Hanbaliya…  (4) Rahwiya…  (5) Khuzayma… (ailaam al Muqieen,s:362)

 

Fiqhi usool aur Bunyadein:

 

Fiqh wa hadees mein Imam Ahmed bin Hanbal aur Ishaaq ka naam saath liya jaata hai. Dono buzurgon ki Fiqh wa ijtehaad ka daaromadaar hadees par hai. Hazrat Shah wali Allah muhaddis  Dehlvi ne risaala “Al Insaaf” mein likha hai ke inke masaail ki bunyaad Ahadees aur aqwaal sahaba par zyada hai.

Abu Haatim se poocha gaya ke aap ka mailaan in dono ke jaanib zyada hai. Farmaya : Mujhe inse zyada pur azmat shakhs nazar nahi aata. In dono ne Ahadees qalamband kiye. Inka muzakarah kiya aur inpar tasneefaat kiye.

Haafiz Ibn Hajar likhte hain “”Yani inki Fiqhi tarifiaat Sunan wa ahadees par mbni hoti hain lekn  Imam Ahmed k bar khilaf in ka mialan imam malik ki trf ziyada hai , jin ka asal makhaz ahle madina k aqwal hote hen , or imam ahmed zyadatar asaar wa riwayat par aitemaad karte hain.

Fiqh wa ijtehad mein inke kamaal ka iss se bhi andaaza hota hai ke inhone Imam Shafa’i jaise azeem al martabat Imam wa mujtahid se do martaba munazarah kiya.

Aur Saaleh bin Ahmed riwayat karte hain ke ek martaba munazarah ke mauqe par mere waalid bhi maujood they. Inka bayaan hai ke Ishaaq Imam Shafa’i ke muqable mein ghaalib nazar aarahe they.

 

Aqeedah wa kalaam:

 

Ishaaq bin Rahwiya itteba sunnat aur tareeqe salaf ki pairvi mein nihayat mutashaddid they, is liye kalam wa aqayed ke ghair zaroori masail mein behes wa tadqeeq aur Ghaur-o-khauz na pasand karte they. Inke zamane mein khalq e Quran ka mu’arikat ul aara masala paish aaya.Woh bhi Quran ko Allah Ta’ala ka kalaam aur ghair makhlooq samjhte they. Ahmed bin Saeed Rubaati ka sher hai:

“لم یجعل القرآن خلقا کما        قد قالہ زندیق ناق”

“Ishaaq bin Rahwiya ne faasiq aur zandeeq shakhs ki tarah Qur’an ko Allah Ta’ala ki makhlooq qaraar nahi diya”

 

Zuhud-o-Wara’a:

 

Imam Ibn Rahwiya ke zuhad wa wara’a ke ke mutalliq muarrikheen ne likha hai ke woh hadees wa Fiqh aur hifz wa sidq ki tarah wara’a wa taqwa ke bhi jame’e the.Muhammad bin Aslam Tausi ne inki wafaat ke waqt farmaya “Maine inse zyada Allah se darne waala nahi dekha. Allah Ta’ala ka irshad hai”( اننما ىخشى الله من عباده العلماء) ”(الفاطر :٢٨) yaani “Allah se iske wahi bande darte hai jo Ilm waale hai”.

 

Wafaat:

 

Mash-hoor riwayat ke mutabiq inho ne 77 saal ki umar mein baroz  yakshamba 14 ya 15 shaban 238 hijri ko inteqaal kiya. 237 hijri bhi riwayat ki gayi hai. Ek shayar ka marsiya ka sher hai:

“Jis saanha azeem se humlog itwaar ki raat mein 15 shaban ko dochaar huye, usko kabhi faramosh nahi kiya jaa sakta”

 

Aulad:

 

Aapki aulaad mein teen sahabzaadon ka naam zamnan milta hai.

• Abul hsan Ali
• Muhammad
• Yaqoob

 

Tasaneef:

 

Ulama-e-tabqaat wa taraajim ne inko sahib Tasaneef kaseerah likha hai. Magar maloom hota hai ke woh sab zaaye  ho gaye hain. Jin tasneefaat ke naam maloom ho sake hain woh yeh hai:

• Kitab al Sunan fil Fiqh….iske naam se mauzoo zahir hai.
• Kitab al Tafseer…Allama Suyuti ne ahad taba’een ke baad jin tafseeron ko ahem aur aqwaal sahaba wa taba’een ki jame’e qarar diya in mein Sufiyan bin Aiyna aur Wakiy bin Jarah waghairah ki tafseeron ke saath iska bhi zikr kiya hai.
• Musnad….yeh unki sabse aham aur mash-hoor tasneef aur 6 jildon par mushtamil hai. Hakim Nishapuri ne doosre daur ki masanid mein Imam Ahmed ki masnad ke saath iska naam bhi shumar kiya. Iski tarteeb wa takmeel se bhi who apni zindagi mein farigh ho chuke the aur apne shagirdon ko zubaani aur padhkar iska Imla bhi karaya tha. Allama Suyuti farmate hain”و اسحاق ىيخرج أمثل ماورد عن ذالك الصحابى فيما ذكرل رازى”

“Abu Zar’a Raazi ka bayaan hai ke Ishaaq inhi riwayaton ki takhreej karte the jo us Sahabi ki sabse behtar aur achi riwayat hoti thi.

Iss musnad ka ek qalmi nuskha Allama Suyuti ke Qalam ka likha hua Germany ke kitab khaane mein maujood hai. Allama Zaahabi ne iske rijaal ki naqd mein ek mustaqil kitaab likhi thi. Usko bhi Suyuti ne nuskha ke haashiye mein darj kiya hai.

Saheeh Bukhari se qabl likhi gayi Kutub Ahadees mein Muwatta Imam Maalik, Musnad Abi Dawood  At-Tayalisi aur Musnad Hameedi ke baad Musnad Ishaaq bin Rahwiya ka martaba hai aur iske baad phir Musnad Ahmed hai. Ismein mauzoo aur waahi sanad se koi riwayat nahi hai.Sirf  saheeh , hasan aur zayeef riwayat hai. Yeh musnad siwaaye jild sasham ke muroor-e-zamana ke saath zaaye ho gayi. Ibn Hajar ne iski chhe jildon ka tazkirah kiya hai.

Mahfooz makhtoot ka aghaaz Abu Hurairah( Raziallahu anhu) se hota hai aur Aakhir mein Abdullah bin Abbas (Raziallahu anhu) ki riwayat hai.

Yeh chhati jild hai.Iss matbo’o juzz mein riwayat ki tadaad (980) hai.Sirf Musnad Abi Huraira(Raziallahu anhu) ki tadaad ahadees 543 hai.

(Musnad Ishaaq bin Rahwiya) aldaktoor Abdul Ghafoor bin Abdul Haqq Al Balochi ki tahqeeq ke saath paanch ajza’a(3 jildon) mein se maktabta Al Imaan, Al Madani tal Munawwarah se 1991 bamutabiq 1412 hijri mein chhapi.

(Musnad Ishaaq bin rahwiya, Musnad ibn Abbas Muhammad Mukhtar Dharaar Al mufti ki tehqeeq ke saath ek jild mein daar al kitaab al Arabi, Beirut ,Lebanon se 2002 bamutabiq 1423 hihjri mein chhapi.

 

REFERENCE:

Book: “ISHAAQ BIN RAHWIYA” (Urdu)

Tarjuma: ‘Abu Anas Mohammad sarwar gohar’

Taqdeem: SHAIKH UL HADEES ABDULLAH NASIR RAHMAANI (حفظه الله تعالى)