MARDON KA SONA AUR RESHAM PEHNNA

Rasoolullah ﷺ ne farmaya:

“Jis ne duniya mein resham pehn’na aur akhirat mein nahi pehn’na.” [Bukhari: 5834]

Aur ye Ap ﷺ kay hukum kay mutabiq lashkaron aur un kay ilawa sab kay liye aam hai. Ye farmaya:
“Resham aur sona pehn’na meri ummat kay mardon par haram qarar diya gaya hai.”                                        [Bukhari: 5835; Muslim 2068]

Huzaifa bin Yaman رضي الله عنه bayan karte hain Rasoolullah ﷺ ne, sone aur chandi kay bartanon mein peene aur un mein khane, neez reshmi kapra aur reshmin qeemti kapra jis ka tana bana resham ka hota hai, pehn’ne aur us par bethne se, hamen mana farmaya. [Bukhari: 5837]

Pas jo shakhs mardon kay liye resham pehn’ne ko halal samjhe wo kafir hai. Albatta Ap ﷺ ne kharish waghera kay mareez aur dushman se muqabila karne walon ko us kay pehn’ne ki ri’ayat di hai. Jahan tak zeenat kay liye resham pehn’ne ka ta’aluq hai tou ye Musalman kay ijm’a kay mutabiq mardon par haram hai. Khuwah wo chougha ho ya qibti (misir kay ilaqe ka bana hua resham) ho ya koi reshmi tukra ho. Issi tarah jab aksar hissa reshmi ho tou wo haram hai, aur issi tarah sona ka mardon kay liye pehn’na haram hai, khuwah angothi ho ya kamar par bandhne ki marsa’a patti ho ya talwar ka kinara wakona, pas us ka pehn’na haram hai, Nabi ﷺ ne aik admi kay hath mein sone ki angothi dekhti tou us ko utar diya aur farmaya: “tum mein se koi aag kay angare ka irada karta hai tou usse apne hath mein daal leta hai.”

Issi tarah sone ki karhai kiye hue kapre aur chandi kay taar se karhai kiye hue kapre bhi murdon par haram hain. Ulama ka bache ko resham aur sona pehnane kay bare mein ikhtilaaf hai, ba’az ne is mein rukhsat di hai aur ba’az ne Aap ﷺ kay umoomi farman, jo sone aur resham kay bare mein hai “keh ye donon meri ummat kay mardon par haram hain aur un ki auraton kay liye halal hain” kay mutabiq mana’ kia hai, pas bacha bhi is zumre mein ata hai keh is kay lie bhi mana hai aur yeh imam Ahmed aur deegar aimmahe kiraam ka mazhabo maslak hai.

Pas ham Allah ta’ala se us kay pasandeedah umoor ki taufeeq ka sawal karte hain kyun keh woh sakhi daata fayyaz hai.

REFERENCE:

Book: “Kabeerah Gunah”
Taleef: Shaikh Ul Islam Shams ad-Dīn adh-Dhahabī Rahimahullah.
Urdu Tarjumah: Abu Anas Muhammad Sarwar Gohar.