میاں بیوی کے حقوق

شادی کے اثرات بڑے دو رس اور اس کے تقاضے بہت اہم ہیں۔میاں بیوی کا باہم تعلق کچھ اس طرح کا ہے کہ ان میں سے ہر ایک کے دوسرے پر مالی،بدنی اور اجتماعی حقوق عائد ہوتے ہیں،لہذا زوجین میں سے ہر ایک کے لیے ضروری ہے کہ دینی دستور کے مطابق رہن سہن رکھے اور ہر ایک دوسرے کے واجبی حقوق و فرائض نہایت فراخدلی کے ساتھ کسی کراہت اور ٹال مٹول کے بغیر،خوش دلی سے انجام دے۔اللہ تعالیٰ نے فرمایا:

﴿ وَعَاشِرُوْھُنَّ بِالْمَعْرُوْفِ ۚ ﴾

ترجمہ: “اور بیویوں کے ساتھ اچھی طرح رہو سہو۔”

 سورۃالنساء:19

نیز فرمایا:

﴿ وَلَهُنَّ مِثْلُ الَّذِيْ عَلَيْهِنَّ بِالْمَعْرُوْفِ ۠ وَلِلرِّجَالِ عَلَيْهِنَّ دَرَجَةٌ﴾

ترجمہ: عورتوں کا حق (مردوں پر) ویسا ہی ہے جیسا کہ دستور کے مطابق (مردوں کا حق) عورتوں پر ہے،البتہ مردوں کو عورتوں پر فضیلت ہے۔

سورۃالبقرة:228

جس طرح عورت پر واجب ہے کہ اپنے خاوند کے حقوق ادا کرے اسی طرح خاوند کی بھی ذمہ داری ہے کہ وہ بیوی کے حقوق ادا کرے۔جب تک زوجین میں سے ہر ایک ان حقوق کا خیال رکھتا ہے جو ان پر عائد ہوتے ہیں تو ان کی زندگی خوشگوار اور پر سکون بسر ہوتی ہے۔اگر معاملہ اس کے برعکس ہو تو اس کا نتیجہ ضد اور باہمی جھگڑوں کی شکل میں نکلے گا اور زندگی تلخ ہو جائے گی۔

بیوی کے خاوند پر حقوق

بیوی سے اچھا سلوک کرنا خاوند کی ذمہ داری اور بیوی کا حق ہے،اس کے متعلق بہت سی احادیث ہیں۔رسول اللہ صلی اللہ علیہ وسلم نے فرمایا:

«استوصوا بالنساء، فإن المرأة خلقت من ضلع، وإن أعوج شیء فی الضلع أعلاه، فإن ذهبت تقیمه كسرته، وإن تركته لم یزل أعوج، فاستوصوا بالنساء»

“عورتوں سے بہتر سلوک کرو عورت پسلی سے پیدا کی گئی ہے اور پسلی کا سب سے زیادہ ٹیڑھا حصہ وہ ہے جو اس کا بلند حصہ ہے۔اگر تو اسے سیدھا کرنے لگے گا تو اسے توڑ دے گا اور اگر چھوڑ دے گا تو ٹیڑھی ہی رہے گی،لہذا عورتوں سے اچھا سلوک کرو۔”

بخارى:3331، مسلم:1466

ایک اور روایت میں ہے:

«ان المرأة خلقت من ضلع لن تستقیم لك على طریقة فإن استمتعت بها استمتعت بها وبها عوج وإن ذهبت تقیمها كسرتها وكسرها طلاقها» 

“عورت پسلی سے پیدا کی گئی ہے۔وہ تیرے لیے کسی طرح سیدھی نہ ہو گی ۔لہذا اگر تو اس سے،اس کی ٹیڑھی حالت میں ،فائدہ اٹھا سکتا ہے تو اٹھا لے۔اگر تو اسے سیدھا کرنے لگے گا تو اسے توڑ دے گا اور اس کا توڑنا اس کی طلاق ہے۔”

(صحیح مسلم)

نیز آپ صلی اللہ علیہ وسلم نے فرمایا:

 

«لا یفرك مؤمن مؤمنه إن كره منها خلقا رضى منها آخر» 

“کوئی مومن مرد،مومنہ عورت،یعنی اپنی بیوی سے بغض نہ رکھے کیونکہ اگر اسےاس کی کوئی عادت ناپسند ہے تو کوئی دوسری پسند ہو گی۔”

(صحیح مسلم)

اور لا یفرك کے معنی “بغض نہ رکھنا” ہیں۔ان احادیث میں نبی کریم  صلی اللہ علیہ وسلم  نے اپنی اُمت کو ہدایت فرمائی ہے کہ آدمی اپنی بیوی سے اچھا برتاؤ کرے۔اسے چاہیے کہ جو کچھ بیوی کی ذات سے میسر آئے،لے لے کیونکہ جس طبیعت پر وہ پیدا کی گی ہے وہ کامل درجے پر نہیں ہے بلکہ اس میں ٹیڑھ ہونا لازمی ہے اور آدمی اس طبیعت سمیت اس سے فائدہ اٹھا سکتا ہے جس پر وہ پیدا کی گئی ہے ۔ن احادیث میں یہ ہدایت بھی ہے کہ انسان کو چاہیے کہ اپنی بیوی کی خوبیوں اور خامیوں کا موازنہ کرے۔کیونکہ اگر اسے اس کی کوئی عادت ناپسند ہو گی تو اس کے ساتھ دوسری عادت ایسی بھی ہو گی جواسے پسند ہو گی ،لہذا اس کی طرف صرف ناراضی اور کراہت ہی کی نظر سے نہ دیکھے۔

بہت سے شوہر ایسے ہیں جو اپنی بیویوں کو درجہ کمال پر دیکھنا چاہتے ہیں جبکہ یہ ناممکن ہے،اسی لیے ان کی گزر بسر تنگ ہو جاتی ہے اور وہ اپنی بیویوں سے فائدہ ٹھانے کے قابل نہیں رہتے۔اس کا نتیجہ بسا اوقات طلاق ہوتا ہے.

جیسا کہ آپ صلی اللہ علیہ وسلم نے فرمایا:

«وإن ذهبت تقیمها كسرتها وكسرها طلاقها»

“اگر تو اسے سیدھا کرنے لگے گا تو اسے توڑ دے گا اور اس کا ٹوٹنا اس کی طلاق ہے۔”

(صحیح مسلم)

لہذا خاوند کو چاہیے کہ بیوی سے اگر کوئی غلطی ہو جائے تو اس سے درگزر کرے بشرطیکہ وہ دین اور شرافت سے خالی نہ ہو۔خاوند ،بیوی کے کھانے پینے،پوشاک اور اس کے جملہ لوازم کا ذمہ دار ہے۔فرمان الہی ہے:

﴿ وَعَلَي الْمَوْلُوْدِ لَهٗ رِزْقُهُنَّ وَكِسْوَتُهُنَّ بِالْمَعْرُوْفِ  ﴾

ترجمہ: اور دستور کے مطابق ان کی خوراک اور پوشاک بچے کے باپ کے ذمے ہے۔

(سورۃ البقرۃ،آیت 233)

(اور حدیث مبارکہ ہے۔)

«ولهن علیكم رزقهن وكسوتهن بالمعروف» 

“اور دستور کے مطابق تمہاری بیویوں کی خوراک اور پوشاک تمہارے ذمہ ہے۔”

(سنن ابی داؤد)

نبی صلی اللہ علیہ وسلم سے پوچھا گیا کہ بیوی کا مرد پر کیا حق ہے تو آپ صلی اللہ علیہ وسلم نے فرمایا:

«أن تطعمها إذا طعمت وتكسوها إذا اكتسیت ” أو”اكسبت”ولا تضرب الوجه ولا تقبح ولا تهجر إلا فی البیت» 

“جب تو کھانا کھائے تو اسے کھانا کھلا اور جب تو پہنے تو اسے بھی پہنا اور اس کے منہ پر نہ مار،(نہ)اسے برا بھلا نہ اس سے قطع تعلق کر مگر یہ کہ گھر کے اندر اندر۔”

(سنن ابی داؤد)

بیوی کا ایک حق یہ ہے کہ اس سے عدل کیا جائے۔اگر کاوند کی دوسری بیوی ہو تو ان دونوں کے اخراجات ،رہائش ،شب بسری،غرضیکہ تمام امور میں ممکن حد تک عدل کرے کیونکہ ان میں سے ایک کی جانب میلان رکھنا بہت بڑا گناہ ہے۔نبی کریم صلی اللہ علیہ وسلم نے فرمایا:

 

«من كانت له امرأتان فمال إلى إحداهما جاء یوم القیامة وشقه مائل» 

“جس کی دو بیویاں ہوں اور وہ ان میں سے ایک کی طرف مائل ہو تو وہ قیامت کے دن اس حال میں آئے گا کہ اس کا ایک پہلو جھکا ہوا ہو گا۔”

(سنن ابی داؤد)

البتہ وہ امور جن میں عدل ممکن نہ ہو ،جیسے محبت اور دل کی خوشی تو ان میں خاوند پر کچھ گناہ نہیں کیونکہ یہ اس کے بس کی بات نہیں ہے۔

فرمان الہی ہے:

[وَلَنْ تَسْتَطِيْعُوْٓا اَنْ تَعْدِلُوْا بَيْنَ النِّسَاۗءِ وَلَوْ حَرَصْتُمْ ﴾

ترجمہ: اگر تم چاہو بھی تو اپنی بیویوں کے درمیان عدل نہ کر سکو گے۔

(سورۃ النساء،آیت 129)

یہی وجہ تھی کہ رسول اللہ صلی اللہ علیہ وسلم نے اپنی بیویوں کے درمیان شب بسری کی باری مقرر کر رکھی تھی۔آپ عدل کرتے تھے اور فرماتے تھے:

 

«اللهم هذا قسمی فیما أملك فلا تلمنی فیما تملك ولا أملك»

“اے اللہ !یہ میری تقسیم ایسے معاملے میں ہے جس میں میرا اختیار ہے اور جس بات میں تیرا اختیار ہے ،میرا نہیں،اس پر مجھے ملامت نہ فرمانا۔”

لیکن اگر کوئی بیوی شب بسری کے معاملے میں اپنی باری خوشی سے دوسری بیوی کو ہبہ کر دے تو کوئی حرج نہیں جیسا کہ رسول اللہ صلی اللہ علیہ وسلم نے حضرت عائشہ رضی اللہ عنہا کی باری ایک دن مقرر کی،پھر حضرت سودہ رضی اللہ عنہا نے اپنی باری بھی حضرت عائشہ رضی اللہ عنہا کو ہبہ کر دی۔

رسول اللہ صلی اللہ علیہ وسلم اس بیماری کے دوران جس میں آپ صلی اللہ علیہ وسلم نے وفات پائی،پوچھا کرتے تھے،کل میں کہاں ہوں گا،کل میں کہاں ہوں گا۔۔۔۔؟تو آپ کی بیویوں نے آپ کو اجازت دے دی کہ آپ جہاں چاہیں رہیں پھر آپ صلی اللہ علیہ وسلم نے حضرت عائشہ رضی اللہ عنہا کے گھر تشریف فرما رہے تا آنکہ آپ کی وفات ہو گئی۔

 

خاوند کے بیوی کے حقوق :

جس طرح بیوی کے خاوند پر حقوق ہیں اُسی طرح خاوند کے بیوی پر حقوق ہیں،البتہ مردوں کو فضیلت حاصل ہے۔ارشاد باری تعالیٰ ہے:

 

﴿وَلَهنَّ مِثْلُ ٱلَّذِى عَلَیهنَّ بِالْمَعْرُوفِ ۚ وَلِلرِّجَالِ عَلَیهنَّ دَرَجَةٌۭ﴾

ترجمہ: عورتوں کا حق (مردوں پر) ویسا ہی ہے جیسا کہ دستور کے مطابق (مردوں کا حق) عورتوں پر ہے،البتہ مردوں کو عورتوں پر فضیلت ہے۔”

سورۃالبقرة:228

مرد اپنی بیوی پر حاکم ہے جو اس کی مصلحتوں ،تادیب اور عزت کو قائم رکھنے والا ہے جیسا کہ اللہ تعالیٰ نے فرمایا:

﴿ اَلرِّجَالُ قَوّٰمُوْنَ عَلَي النِّسَاۗءِ بِمَا فَضَّلَ اللّٰهُ بَعْضَھُمْ عَلٰي بَعْضٍ وَّبِمَآ اَنْفَقُوْا مِنْ اَمْوَالِهِمْۚ﴾

ترجمہ: مرد عورتوں پر حاکم ہیں،اس لیے کہ اللہ نے ایک کو دوسرے پر فضیلت دی ہے اور اس لیے کہ مرد اپنا مال خرچ کرتے ہیں۔”

 سورۃالنساء:34

مرد کا اپنی بیوی پر ایک حق یہ ہے کہ وہ ہرایسے کام میں اس (خاوند) کی اطاعت کرے جس میں اللہ کی نافرمانی نہ ہو اور اس کے راز اور مال کی حفاظت کرے،چنانچہ نبی کریم صلی اللہ علیہ وسلم نے فرمایا:

«لو كنت آمرا أحدا أن یسجد لأحد لأمرت المرأة أن تسجد لزوجها» 

“اگر میں کسی کو یہ حکم دینے والا ہوتا کہ وہ کسی کو سجدہ کرے تو میں عورت کو حکم دیتا کہ اپنے خاوند کو سجدہ کرے۔”

(جامع الترمذی)

نیز آپ صلی اللہ علیہ وسلم نے فرمایا:

«إذا دعا الرجل امرأته إلى فراشه فلم تأته فبات غضبان علیها لعنتها الملائكة حتى تصبح» 

“جب آدمی اپنی بیوی کو اپنے بستر پر بلائے اور وہ آنے سے انکار کر دے اور خاوند ناراضی کی حالت میں رات گزار دے تو صبح تک اس (بیوی) پر فرشتے لعنت بھیجتے رہتے ہیں۔”

(صحیح بخاری و صحیح مسلم)

*حدیث کا عربی متن صحیح مسلم سے لیا گیا ہے۔

خاوند کا بیوی پر اس قدر حق ہے کہ اگر وہ نفلی عبادت کرنا چاہے تو اس کے لیے بھی اُسے خاوند سے اجازت حاصل کرنا ضروری ہے۔

نبی کریم صلی اللہ علیہ وسلم نے فرمایا:

«لا یحل للمرأة أن تصوم وزوجها شاهد إلا بأذنه، ولا تأذن فی بیته إلا بأذنه» 

“اگر کسی عورت کا خاوند گھر پر موجود ہو تو وہ اس کی اجازت کے بغیر (نفلی) روزہ نہ رکھے،نہ اس کی اجازت کے بغیر کسی کو گھر میں داخل ہونے کی اجازت دے۔”

(صحیح بخاری)

نیز رسول اللہ صلی اللہ علیہ وسلم نے خاوند کے اپنی بیوی سے خوش ہونے کو جنت میں داخلے کے اسباب میں سے ایک سبب قرار دیا ہے۔امام ترمذی رحمۃ اللہ علیہ نے ام سلمہ رضی اللہ عنہا کی حدیث روایت کی ہے کہ رسول اللہ صلی اللہ علیہ وسلم نے فرمایا:

 

«أیما امرأة ماتت وزوجها عنها راض دخلت الجنة»

“کوئی بھی عورت جو اس حال میں مرے کہ اس کا خاوند اس سے راضی ہو،وہ جنت میں داخل ہو گی۔

*یہ نوٹ کر لیں(قال أبو عیسى ہذا حدیث حسن غریب ضعیف)اس حدیث کی سند کے بارے میں نہیں جانتا تھا لیکن جہاں سے یہ حدیث لی ہے وہاں یہ لکھا ہوا تھا۔اللہ ہماری خطاؤں کو معاف فرمائے آمین۔

حوالہ جات:

کتاب:  “اسلام ميں بنیادی حقوق”

تالیف:  شیخ محمد بن صالح العثیمین (رحمة الله)۔